Rɛvɛleshɔn 13 - Krio Fɔs Oli Baybul

Dɛn Tu Wayl Bif

¹ Dɛn a si wan wayl bif de kɔmɔt insay di wata kam ɔp. I bin gɛt tɛn ɔn ɛn sɛvin ed, ɔl di ɔn dɛn bin gɛt wan wan krawn pan dɛn; wan bad nem bɔt Gɔd bin rayt pan ɔl in ed dɛn.

² Di wayl bif we a si bin fiba lɛpɛt, in fut bin fiba wan bif we dɛn kɔl bia, in fut, ɛn in mɔt bin fiba layɔn mɔt. Di dragɔn gi dis wayl bif ya ɔl di pawa we i bin gɛt oba ɔl dɛn tin we i bin de rul.

³ I bin tan lɛkɛ se sɔmbɔdi bin dɔn wund wan pan di wayl bif in ed dɛn, bɔt di wund we bin fɔ mek i day, bin dɔn wɛl. Di wan ol wɔl bin wɔnda, dɛn bigin fala di wayl bif.

⁴ Ɔlman bigin prez di dragɔn bikɔs i bin gi di wayl bif in pawa. Di pipul dɛn prez di wayl bif insɛf, dɛn se, “Udat gɛt pawa lɛkɛ di wayl bif? Udat ebul fɛt am?”

⁵ Dɛn bin gri fɔ mek di wayl bif tɔk ɔl kayn bad tin bɔt Gɔd ɛn tɔk dɛn tin we sho se i prawd; ɛn dɛn bin gri fɔ mek i rul fɔ fɔti-tu mɔnt.

⁶ I bigin kɔs Gɔd, pwɛl in nem, tɔk bad bɔt di ples we i de ɛn tɔk bad bɔt ɔl dɛn wan we de na ɛvin.

⁷ Dɛn bin lɛf am mek i fɛt Gɔd in pipul dɛn ɛn win dɛn, ɛn dɛn bin gi am pawa fɔ rul ɔl dɛn trayb, ɔl dɛn neshɔn, blak pipul ɛn wayt pipul ɛn pipul we de tɔk ɔl dɛn difrɛn laŋwej na wɔl.

⁸ Ɔl dɛn pipul na di wɔl go pre to di wayl bif, pas nɔmɔ if dɛn nem bin rayt na di Ship we dɛn kil, in buk. Bifo Gɔd mek di wɔl, nain dɛn pipul we gɛt layf sote go dɛn nem bin dɔn rayt na di Ship in buk.

⁹ “If ɛnibɔdi gɛt yes fɔ yɛri, mek i yɛri!

¹⁰ Ɛnibɔdi we Gɔd dɔn mak se dɛn fɔ kech, dɛn go kech am paopa; ɛnibɔdi we Gɔd dɔn mak se dɛn fɔ chuk ɛn kil, na chuk dɛn go chuk ɛn kil am. Na dat mek Gɔd in pipul dɛn fɔ tinap traŋa ɛn dɛn nɔ fɔ lɛf fɔ biliv pan Gɔd.”

¹¹ Wɛn dat dɔn, na de a si wan ɔda wayl bif de kɔmɔt insay di grɔn kam ɔp. I bin gɛt tu ɔn dɛn we fiba ship pikin ɔn, ɛn i bin de tɔk lɛkɛ dragɔn.

¹² Dis sɛkɛn wayl bif tek ɔl di fɔs wayl bif in pawa ɛn bigin yus di pawa bifo am. I fos ɔl di pipul dɛn na di wɔl fɔ pre to di fɔs wayl bif we in wund bin dɔn wɛl.

¹³ I du plɛnti tin we mek pipul wɔnda, i mek faya kɔmɔt na ɛvin kam dɔŋ pan di wɔl bifo ɔl di pipul dɛn.

¹⁴ I mek ɔl di pipul dɛn na wɔl ful wit di tin dɛn we dɛn gi am pawa fɔ du bifo di fɔs wayl bif; dɛn tin ya bin mek pipul wɔnda. Di sɛkɛn wayl bif tɛl ɔl di pipul dɛn na di wɔl se mek dɛn mek sɔntin we dɛn go tek mɛmba ɛn rɛspɛkt di fɔs wayl bif we dɛn bin wund wit sɔd, bɔt nɔ bin day.

¹⁵ Dɛn lɛf di sɛkɛn wayl bif mek i blo layf go insay di tin we dɛn mek fɔ tek mɛmba di fɔs wayl bif, so dat di tin kin tɔk ɛn kil ɔl dɛn wan we nɔ de pre to am.

¹⁶ Di sɛkɛn wayl bif fos mek dɛn put mak pan ɔlman, pan dɛn raytan ɛn pan dɛn fɔrɛd; dɛn put mak pan dɛn bigman ɛn dɛn smɔl pikin, dɛn po man ɛn dɛn wan we jɛntri, dɛn slev ɛn dɛn fribɔn.

¹⁷ Nɔbɔdi nɔ bin ebul bay ɔ sɛl ɛnitin pas nɔmɔ i gɛt da mak de, dat na di wayl bif in nem ɔ di nɔmba we tinap fɔ di nem.

¹⁸ So mɔtalman fɔ gɛt sɛns. Ɛnibɔdi we gɛt sɛns go ebul no wetin di wayl bif in nɔmba min, bikɔs da nɔmba de tinap fɔ mɔtalman in nɔmba. Di nɔmba na siks ɔndrɛd ɛn siksti siks.