Prɔvabs 8 - Krio Fɔs Oli Baybul

Fayn Tɔk Bɔt Sɛns

¹ Ɔlman lisin O! Sɛns de kɔl bak. I se if una nɔ de ɔndastand.

² I tinap pantap dɛn ay, ay mawnten, i dɔn tek in stand na forod.

³ Usay ɔlman de pas na di siti, na de i go tinap de tɔk.

⁴ I se, “Na ɔlman we de na yaso a de tɔk to; a de kɔl ɔlman na wɔl fɔ lisin.

⁵ Una we nɔ gɛt wan ɛkspiriɛns, una tray gɛt sɛns, Una we ful, unasɛf tray gɛt sɛns.

⁶ Una lisin, na sɛns tɔk a de kam tɔk so, di wɔd dɛn we de kɔmɔt na mi mɔt na rayt tin.

⁷ Na di tru a de tɔk mi na pɔsin we et lay bad, bad.

⁸ Ɔl wetin a de tɔk na tru, nɔn bɛnbɛn ɔ twis twis nɔ de pan am.

⁹ Fɔ udat de ɔndastand, na tret tɔk to am; ɛn dɛn wan we no, ɔltin klia to dɛn.

¹⁰ Tek mi advays, i pas silva, pik sɛns, i pas piɔ gold.

¹¹ “Bikɔs sɛns bɛtɛ pas dayamɔn, natin nɔ de we pas sɛns na wɔl.

¹² Na mi dɛn de kɔl sɛnsman, ɛn a gɛt kɔmɔn sɛns, a no bɔku tin ɛn a no wetin rayt.

¹³ Fɔ fred PAPA GƆD na fɔ et fɔ du bad. A et yu de kak ɛn tink tumɔs ɔf insɛf ɛn lɛk fɔ du bad dɔn i gɛt tu siti.

¹⁴ A sabi gi gud advays ɛn sabi wok mi plan, a de si fa ɛn a trɔŋ.

¹⁵ Na mi de mek kiŋ dɛn rul gud ɛn mek gud lɔ dɛn.

¹⁶ Na mi de mek ɔl di rula dɛn na wɔl rul gud, big bigman dɛnsɛf want mi fɔ ɛp dɛn.

¹⁷ A lɛk dɛn wan we lɛk mi, udat de luk fɔ mi go si mi.

¹⁸ A kin gi pɔsin bɔku jɛntri ɛn ɔna, a de mek dɛn mɔni nɔ dɔn ɛn bɛtɛ go fala dɛn.

¹⁹ Ɛnitin we a gi yu bɛtɛ pas piɔ gold, i bɛtɛ pas piɔ silva.

²⁰ A de du tin tret wan, a de trit pipul fia wan.

²¹ A de gi jɛntri to dɛn wan we lɛk mi, ɛn ful-ɔp dɛn sto wit ɔlkayn gud tin.

²² “We PAPA GƆD bigin du in wok, na mi fɔs i mek bifo i mek ɛnitin na mi fɔs i mek.

²³ I dɔn te we a de, na mi fɔs de bifo di wɔl bigin.

²⁴ A bin dɔn de bifo di oshɔn dɛn kam na wɔl, da tɛm de nɔn wata sɛf nɔ bin de flo.

²⁵ A bin dɔn de bifo di mawnten dɛn kam na wɔl, bifo di il dɛn go na dɛn ples,

²⁶ bifo PAPA GƆD mek di wɔl ɛn di bush dɛn, we nɔn grɔn nɔ bin de yet.

²⁷ A bin dɔn de wɛn PAPA GƆD mek di skay, ɛn di si fɔ de brakɛt;

²⁸ wɛn PAPA GƆD gɛda di klawd dɛn ɔp na di skay, ɛn wɛn i mek ɔl dɛn riva de flo go na di oshɔn;

²⁹ wɛn i mek bawndri fɔ di oshɔn, fɔ lɛ di wata nɔ pas in mak wɛn i mek di grɔn sidɔm fayn nain ples.

³⁰ A bin de nia PAPA GƆD lɛkɛ man we de drɔ plan, a bin de mek i gladi ɛvride, ɛn misɛf bin gladi fɔ de wit am,

³¹ a gladi fɔ di wɔl we PAPA GƆD mek, ɛn fɔ di pipul sɛf we i mek put de.

³² “Naw, una dɛn yɔŋ pipul, una lisin to mi, i go fayn fɔ udat du wetin a se.

³³ If una lisin to wetin a se ɛn nɔ tɔn una bak pan mi, una go gɛt sɛns.

³⁴ I go fayn fɔ udat de lisin to wetin a de se, we de wet na mi domɔt ɔltɛm ɛn de tinap na di rod we a de pas fɔ go na os.

³⁵ Udat fɛn mi go gɛt lɔŋ layf, ɛn PAPA GƆD sɛf go blɛs am;

³⁶ bɔt udat nɔ fɛn mi nainsɛf i de du; udat nɔ lɛk mi lɛk fɔ day.”