Prɔvabs 7 - Krio Fɔs Oli Baybul

¹ Mi pikin, mɛmba ɔl wetin a de tɛl yu ɛn nɔ fɔgɛt natin we a tɛl yu fɔ du.

² Tek wetin a de tich yu ɛn yu go gɛt lɔŋ layf, ol am gud lɛkɛ se na eg.

³ Lɛ ɔl wetin a dɔn tɛl yu de wit yu ɔltɛm, lɛ i de na yu at.

⁴ Lɛ sɛns bi yu sista, ɛn lɛ di pawa fɔ si fa bi yu tayt padi,

⁵ fɔ mek yu nɔ si pipul wɛf, ɛn dɛn uman wit swit mɔt.

Aw Wan Bɔy Fɔdɔm Na Wan Lus Gyal In Trap

⁶ Wande a bin de luk winda,

⁷ nain a si bɔku yɔŋ pipul we nɔ gɛt wan ɛkspiriɛns; bɔt a notis wan patikla wan we in ful bad, bad wan.

⁸ I bin de waka kɔna na wan trit usay wan patikla uman in os bin de.

⁹ Da tɛm de na tɛm we lamp bin dɔn layt, infakt nɛt sɛf bin dɔn kam.

¹⁰ Nain di uman go mit am, i drɛs lɛk rare gyal; i bin de plan sɔntin.

¹¹ Na uman we gɛt maynd ɛn nɔ gɛt wan shem. Ɔltɛm i de na trit.

¹² Infakt wan minit i de na trit, wan minit i de na makit, ɔda minit i de na dɛn kɔna de ɛŋ de.

¹³ Wantɛm nain i grip dis bɔy ɛn kis am. Wit dray yay i luk di bɔy pin nain yay ɛn tɛl am se,

¹⁴ in mek sakrifays to PAPA GƆD da de de fɔ du wetin i prɔmis ɛn bɔku tin de nain os fɔ it.

¹⁵ I se in bin de luk fɔ am ɔl di tɛm, ɛn in dɔn si am.

¹⁶ I se in dɔn prɛd fayn bedshit nain bed we i ɔda frɔm Ijipt,

¹⁷ ɛn in dɔn spre fayn, fayn ma, alo ɛn sinamɔn pafyum,

¹⁸ so, lɛ dɛn go mek lɔv ol nɛt te do klin, lɛ dɛn ɛnjɔy dɛnsɛf.

¹⁹ I se infakt sɛf in man nɔ de, i go patrol;

²⁰ I se in man kɛr wan bag mɔni go, ɛn na tu wik i go fɔ.

²¹ I yuz in swit mɔt fɔ gɛt di bɔy, ɛn insɛf wɛr nain trap.

²² I nɔ tink sɛf, nain i fala am go lɛkɛ we dɛn de kɛr ship fɔ go kil am, jɛs lɛk aw dia kin fɔdɔm na trap

²³ te dɛn chuk in gɔt wit aro; lɛk bɔd nɔmɔ we de fɔdɔm na trap, we nɔ no se nain layf i de risk.

²⁴ Una dɛn bɔypikin, una lisin to mi, una yɛri wɔd.

²⁵ Una nɔ mek dis kayn uman win una lɔv, una nɔ go in we.

²⁶ Na biɛn am bɔku man dɔn alaki ɛn i dɔn mek bɔku dɔn lɔs dɛn layf.

²⁷ If yu se nain yu de fasin, wɛl, na shɔt kɔt yu de fɛn fɔ go ɔdɔun.