Prɔvabs 6 - Krio Fɔs Oli Baybul

Ɔda Wɔnin Dɛn

¹ Mi pikin, if yu dɔn tinap fɔ pɔsin, ɔ trenja we o dɛt,

² ɔ if yu mɔt put yu pan trɔbul, ɔ yu mek prɔmis we yu nɔ ebul kip,

³ wɛl, mi pikin, na dis yu fɔ du fɔ sev yusɛf na di pɔsin we yu o in an: rɔn kwik go mit am ɛn beg am fɔ lɛ i lɛf yu.

⁴ Nɔ slip o, ɛn nɔ westɛm.

⁵ Sev yusɛf lɛkɛ aw dia kin sev insɛf na ɔntinman in an, ɔ bɔd we dɛn wan kech am.

⁶ Yu lezi awns, go luk aw dɛn anch de liv ɛn falamakata dɛn.

⁷ Dɛn nɔ gɛt chif, dɛn nɔ gɛt ɔfisa, ɛn dɛn nɔ gɛt edman,

⁸ bɔt dɛn de fɛn it ɛn kip am insay dray sizin fɔ ren sizin.

⁹ Yu lesman, aw lɔŋ yu go de lidɔm, lidɔm? Ustɛm yu go grap?

¹⁰ I se lɛ in jɛs gɛt smɔl slip nɔmɔ, lɛ i sɛt yay lilibit, lɛ i jɛs fol in an ɛn blo lilibit;

¹¹ na so i tek tɔn popoliopo, bikɔs i de slip nɔmɔ; ɛn po go atak am lɛkɛ se na tifman klia in os.

¹² Pɔsin we nɔ fit natin, bad mɔtalman, nain de pas ɛn tɔk lay tɔk.

¹³ Dɛn kin de wink dɛn yay fɔ sho se na lay dɛn de lay.

¹⁴ Dɛn kin de tink fas fas ɛn de pas fɔ kɔz trɔbul ɔltɛm.

¹⁵ Bɔt na big, big dombolo gɛt fɔ fɔdɔm pan dɛn we dɛn nɔ go mekɔp, ɛn dɛn go wund bad, bad wan.

^16-19 Siks tin dɛn de we PAPA GƆD nɔ lɛk, infakt na sɛvin sɛf we i et bad, bad wan: Pɔsin we fil tu gud bɔt insɛf, pɔsin we lɛk fɔ lay, pɔsin we de kil fɔ natin, dɛn at we de plan bad tin, fut we de magomago fɔ du bad, witnɛs we de lay ɔlkayn lay ɛn koŋosa, ɛn we de briŋ plaba bitwin padi dɛn.

Wɔnin Fɔ Pul Yay Pan Pipul Wɛf

²⁰ Mi pikin, du wetin yu papa tɛl yu fɔ du, ɛn nɔ fɔgɛt wetin yu mama dɔn tich yu.

²¹ Lɛ ɔl wetin dɛn dɔn tɛl yu de na yu at.

²² Wetin dɛn dɔn tɛl yu go de gayd yu we yu de waka na layf ɛn ivin wɛn yu de slip sɛf na nɛt, ɛn i go bi gud advays fɔ yu de tɛm.

²³ Wetin dɛn dɔn tɛl yu go tan lɛkɛ layt to yu, ɛn ɔl wetin dɛn dɔn tich yu go sho yu aw fɔ liv,

²⁴ fɔ lɛ yu nɔ go na bad uman in we, ɛn nɔ fala pipul wɛf in switmɔt.

²⁵ Nɔ mek di uman in fayn kɔnfyus yu; nɔ mek in yay sɛf drɔ yu nain trap.

²⁶ Man kin lidɔm wit rare gyal ɛn gi am mɔni we kin bay wan plet rɛs; bɔt if i lidɔm wit pipul wɛf, i go lɔs in layf.

²⁷ Yu dɔn si man put faya insay in pɔkit dɔn i nɔ bɔn am?

²⁸ Ɔ yu dɔn si man mas ɔt fayakol i nɔ bɔn in fut?

²⁹ Wɛl, na so i go tan fɔ di man we kip in kɔmpin in wɛf; ɛnibɔdi we tɔch am nɔ de go fri.

³⁰ Wɛn tifman aŋri ɛn go tif, dɛn nɔ de bit am?

³¹ Ɛn wɛn dɛn kech am, i de pe sɛvin tɛm mɔ pas di tin we i tif; ɛn na ɔl wetin i gɛt i go tek pe di dɛt.

³² Udat de kip pipul wɛf nɔ gɛt wan sɛns nain ed. Nainsɛf i de pwɛl.

³³ Dɛn go bit am ɛn disgres am, ɛn da shem de nɔ go ɛva kɔmɔt pan am.

³⁴ Wɛn man de jɛlɔs i de vɛks bad bad wan, ɛn i nɔ kin no wetin i de du.

³⁵ I nɔ de tek nɔn pe, ɛn natin nɔ de na wɔl we yu go tek kol in at.