Prɔvabs 4 - Krio Fɔs Oli Baybul

Aw Sɛns De Bɛnifit Pɔsin

¹ Pikin dɛn, una tek wetin una papa de tɛl una. Una pe atɛnshɔn fɔ lɛ una go ɔndastand.

² Na gud tin a de tich una so; so, una nɔ fɔgɛt wetin a de tɛl una.

³ Wɛn misɛf na bin smɔl pikin to mi papa, ɛn di wangren pikin we mi mama bɔn,

⁴ mi papa bin de tich mi, ɛn i tɛl mi se lɛ a kip ɔl wetin i de tɛl mi na mi at; ɛn if a du wetin i tɛl mi, a go gɛt lɔŋ layf.

⁵ I se lɛ a nɔ fɔgɛt natin ɛn lɛ a nɔ tɔn mi bak pan wetin i de se. I se lɛ a gɛt sɛns ɛn tray fɔ si fa.

⁶ I se lɛ a kip mi sɛns ɔltɛm bikɔs na mi sɛns go gayd mi; ɛn if a lɛk di sɛns we a gɛt, i go kɔba mi.

⁷ Fɔ gɛt sɛns pas ɛni ɔda tin na wɔl; i lɛk wetin yu gɛt, tray fɔ si fa.

⁸ Mek sɛns bi di tin we yu want pas ɔltin na wɔl, i nɔ go fel yu; if yu ol am wit tu an, i go ɔna yu.

⁹ Sɛns go mek yu gɛt fayn fɛda at na yu ed ɛn fayn krawn fɔ wɛr.

¹⁰ Mi pikin, lisin to mi. Nɔ jok wit wetin a de tɛl yu, if yu yɛri mi wɔd yu go gɛt lɔŋ layf.

¹¹ A dɔn sho yu di rayt rod fɔ waka, ɛn aw fɔ waka tret na layf.

¹² Natin nɔ go blɔk yu we; ɛn if yu de rɔn sɛf yu nɔ go bɔk yu fut.

¹³ Ɔl di tɛm yu fɔ de mɛmba wetin yu dɔn lan. Ol am wit tu an. Nain na yu layf.

¹⁴ Nɔ falamakata bad pipul, nɔ pas na di rod sɛf we dɛn de waka.

¹⁵ Avɔyd de, nɔ go dɛn we, tɔn go pas ɔda say.

¹⁶ As fɔ dɛn, dɛn nɔ go slip pas dɛn dɔn du bad; slip nɔ go de na dɛn yay te dɛn dɔn du pɔsin bad.

¹⁷ Fɔ du bad na lɛk bred na dɛn mɔt. Fɔ dɛn, fɛt fɛt, na lɛk wayn fɔ drink.

¹⁸ Bɔt di rod we pɔsin we de waka tret na PAPA GƆD in yay de waka tan lɛk we san de grap, we i de shayn brayt brayt wan te di ples klia.

¹⁹ Di rod we bad pɔsin de waka tan lɛkɛ daknɛt; dɛn de fɔdɔm ɛn nɔ no wetin dɛn fɔdɔm pan.

²⁰ Mi pikin, pe atɛnshɔn ɛn yɛri wetin a de tɔk. Opin yu yes to wetin a de se.

²¹ Lɛ wan pan dɛn wɔd ya nɔ kɔmɔt na yu yes; kip am na yu at.

²² Udat yɛri dɛn wɔd ya go gɛt lɔŋ layf, ɛn if i sik sɛf i go wɛl.

²³ Tek tɛm aw yu de tink; bikɔs aw yu de tink na so yu de biev.

²⁴ Nɔ tɔk nɔn bɛnbɛn tɔk; mek nɔn lay tɔk nɔ kɔmɔt na yu mɔt.

²⁵ No usay yu de go, nɔ ɛva butu yu ed wit shem.

²⁶ Tek tɛm plan wetin yu de du, fɔ lɛ ɛnitin we yu de du go kɔmɔt fayn.

²⁷ Nɔ bigin de luk ya, luk yanda; nɔ fala fɔ du bad.