Prɔvabs 31 - Krio Fɔs Oli Baybul

Di Advays Dɛn We Kiŋ Lɛmuɛl In Mama Gi Am

¹ Na dɛn sɔri wɔd yaso Kiŋ Lɛmuɛl in mama tɛl am wɛn i bin de advays am:

² “Mi pikin, yu na mi bɛlɛbɔn pikin, na PAPA GƆD a pre to we mek a bɔn yu.

³ Nɔ wes ɔl yu trɛnk ɛn mɔni pan uman, na dɛn de rɔndɔŋ kiŋ.

⁴ Lɛmuɛl! I nɔ fayn o! I nɔ fayn fɔ lɛ kiŋ de drink wayn, i nɔ fayn fɔ lɛ kiŋ lɛk rɔm.

⁵ Wɛn i drɔnk, i de fɔgɛt di lɔ ɛn siz advantej pan pipul ɛn mas dɛn rayt.

⁶ Rɔm gud fɔ udat de day ɛn fɔ udat dɔn giv ɔp na layf.

⁷ Lɛ dɛn drink ɛn fɔgɛt dɛn prɔblɛm, lɛ dɛn nɔ mɛmba wetin de mɔna dɛn.

⁸ “Yu fɔ de tɔk fɔ dɛn wan we nɔ ebul tɔk fɔ dɛnsɛf. Fɛt fɔ dɛn wan we nɔ ebul fɛt fɔ dɛnsɛf.

⁹ Tɔk fɔ dɛn ɛn jɔj fia wan lɛ poman gɛt in rayt.”

Aw Gud Wɛf Fɔ Tan

¹⁰ I at fɔ fɛn gud wɛf, gud wɛf gɛt valyu pas gold ɛn dayamɔn.

¹¹ Ɛni man we gɛt gud wɛf de biliv am, natin nɔ de we i want we i nɔ go gɛt.

¹² I nɔ de taya fɔ du gud to di man ɛn nɔ de ambɔg am atɔl.

¹³ Ɔl di tɛm in an bizi de mek klos fɔ amatan ɛn dray sizin.

¹⁴ I de briŋ tiŋs dɛn kam nain os lɛkɛ we blu bot kin de briŋ tiŋs dɛn kam.

¹⁵ In de grap ali mɔnin mek it fɔ in famili, dɔn i sheb ɔda wok dɛn gi in savant gyal dɛn fɔ du.

¹⁶ I de luk fɔ land ɛn bay am dɔn i yuz di mɔni we i dɔn wok fɔ fɔ plant greps.

¹⁷ Na uman we kin tay in ɔja fɔ du ɛni kayn wok. I nɔba taya fɔ wok.

¹⁸ I no se in biznɛs de mek prɔfit ɛn i de wok te let na nɛt.

¹⁹ Nainsɛf sɛf de mek in yon trɛd ɛn matirial. I lɛk fɔ du in wok fɔ insɛf.

²⁰ I de ɛp dɛn po pipul ɛn dɛn wan we kam to am fɔ mek i ɛp dɛn.

²¹ Wɛn ples kol, i nɔ de yagba sɛf bikɔs, in wanol famili de gɛt wam klos fɔ wɛr.

²² Nainsɛf de mek in yon bedshit ɛn na dia klos dɛn i de wɛr.

²³ In man gɛt rɛspɛkt ɔlsay ɛn i de wit di big wan dɛn na di siti.

²⁴ I de mek linin matirial ɛn sɛl; i ivin de sɔplay biznɛs man dɛn sash.

²⁵ Na uman we ebul wok ɛn ɔlman rɛspɛkt am, i rɛdi fɔ ɛnitin we mit am.

²⁶ Wɛn i opin in mɔt fɔ tɔk, yu no se na pɔsin de tɔk, i gɛt gud wɔd nain mɔt.

²⁷ I nɔ tek in famili ple ɛn nɔ de miks pan aydulnɛs.

²⁸ In pikin dɛn de tɔk gud bɔt am ɔltɛm ɛn na so in man sɛf de prez am.

²⁹ In man kin de tɛl am se, “Bo, bɔku uman dɛn de we gud, bɔt yu pas dɛn ɔl.”

³⁰ Fɔ bi fayn uman nɔto in na di tin o, nɔto fɔ bi uman we sabi tɔk sɛf; di men tin na uman we de fred PAPA GƆD ɛn ɔna am, na da kayn uman de fɔ prez.

³¹ Na fɔ gi am wetin i dɔn lebɔ fɔ, ɛn lɛ ɔlman na di siti tɔk in gud nem.