Prɔvabs 30 - Krio Fɔs Oli Baybul

Di Wɔd Dɛn We Agɔ Tɔk

¹ Na dɛn sɔri wɔd yaso Agɔ we na Jakɛ in bɔypikin tɔk: Agɔ tɔk to Ithiɛl ɛn Ukal se

² “Fɔ tru, tru, a nɔ de biev lɛk mɔtalman, infakt sɛf, a nɔ gɛt di kayn sɛns we mɔtalman gɛt.

³ A nɔ lan sɛns, ɛn a nɔ no natin bɔt PAPA GƆD.

⁴ Ɛnibɔdi de we dɔn go ɛvin ɛn kam dɔŋ bak? Ɛnibɔdi de we dɔn ɛva kech briz? Ɛnibɔdi de we dɔn ɛva tek in klos tot wata? Ɛnibɔdi de we mek di ath in bawndri? Ɛnibɔdi no udat? Wetin nain bɔypikin in nem? Tɛl mi if yu no!

⁵ “Ɛnitin we PAPA GƆD tɔk i de du am, i de kɔba dɛn wan we aks am fɔ kɔba dɛn.

⁶ If yu ad to wetin i tɔk, i go se yu lay ɛn pɔnish yu fɔ dat.”

Mɔ Parebul Dɛn

⁷ PAPA GƆD, na dɛn tu tin ya a want lɛ yu du fɔ mi bifo a day:

⁸ wan, nɔ mek a ɛva lay; tu nɔ mek a po da bad bad po ɔ jɛntri bad bad wan; gi mi wetin jɛs du nɔmɔ fɔ mi;

⁹ if a jɛntri tumɔs a go fɔgɛt bɔt yu ɛn bigin aks udat na PAPA GƆD if a po da bad po we go mek a tif a go gi yu bad nem.

¹⁰ Nɔ koŋosa wokman to in bɔs, if yu du dat i go swɛ yu ɛn di swɛ go kech yu.

¹¹ Pipul dɛn de we de fityay dɛn papa, dɔn dɛn nɔ de blɛs dɛn mama.

¹² Pipul de we de mek lɛk fɔ se dɛn klin we dɛn nɔ klin.

¹³ Pipul de we fil to se dɛn tu gud, dɛn fil se dɛn na enjɛl.

¹⁴ Pipul de we dɛn yon wok na fɔ kil ɛn pwɛl. Dɛn mɔt tan lɛkɛ nɛf ɛn sɔd fɔ dɔnawe wit poman ɛn lɛf am lɛ i day.

¹⁵ Sɔkinblɔd gɛt tu gyal pikin; dɛn tu nem “A want mɔ.” Tin dɛn de we nɔ de ɛva satisfay; infakt, fo pan dɛn de we nɔ de wande se, “i du so!”

¹⁶ Wan, bɛriŋrɔn, tu, uman we nɔ wande bɔn, tri, grɔn we yu plant we nɔ de se wata du so, fo, faya nɔ de se wud du.

¹⁷ Ɛnibɔdi we nɔ rɛspɛkt in papa, dɔn i nɔ luk in mama, na bɔd dɛn go it in dedebɔdi, na yuba bɛlɛ go tɔn in bɛriŋrɔn.

¹⁸ Tin dɛn de we tu wɔndaful fɔ mi; infakt fo de we a nɔ ebul ɔndastand sɛf aw dɛn tan:

¹⁹ Wan, na di we aw yuba de flay ɔp, ɔp di skay; tu, na di we aw snek de waka pantap rɔk; tri, na di we aw ship de waka na wata, fo, na di we aw man ɛn uman kin fɔl in lɔv.

²⁰ Lɛ a tɛl una aw bambot wɛf kin biev: i de go it na kɔna saful, dɔn i wep in mɔt fayn, dɔn i kam naw ɛn se, “mi, mi an klin.”

²¹ Tin dɛn kin bi na di wɔl we kin mek di wɔl shek; infakt fo de we if dɛn bi, ɔlman kin tɔk bɔt dɛn:

²² wan, na wɛn slev tɔn to kiŋ; tu, na wɛn fulman gɛt ɔltin fɔ it;

²³ tri, na wɛn uman we dɛn nɔ lɛk kam gɛt man fɔ mared am, fo, na wɛn nani tek in misis in ples na di os.

²⁴ Fo animal dɛn de na di wɔl we smɔl, bɔt dɛn gɛt sɛns bad:

²⁵ anch, dɛn nɔ gɛt trɛnk fɔ wok, bɔt nɔn ren nɔ de kam we dɛn nɔ de gɛt tin fɔ it;

²⁶ Wan animal we tap insay rɔk; insɛf nɔ gɛt trɛnk, bɔt nainsay di rɔk i de dig in ol;

²⁷ Lokɔs, dɛnsɛf nɔ gɛt bɔsman, bɔt wɛn dɛn de waka na bay rank lɛkɛ sojaman dɛn.

²⁸ Ɔdinari os pikin we yu kin kech izi, izi wan, if yu go na kiŋ os yu go mit am de.

²⁹ Tin dɛn de we wɛn dɛn de mach yu de ɛnjɔy dɛn; wɛn dɛn de spot so yu de kɔle pan dɛn:

³⁰ wan, na di layɔn we gɛt trɛnk pas ɔl dɛn animal, wɛn i es in ed ɔp de waka, i nɔ de luk biɛn.

³¹ Tu, na kak we de es ed ɔp we i de waka in ed ɔp, tri, man got fo, kiŋ we in amiman dɛn ɔl de fɔ am.

³² If yu na pɔsin we nɔ gɛt sɛns, yu nɔ de biev, dɔn yu de kak, ɔ, if yu na pɔsin we kin de mekɔp fɔ du bad, tap, ɛn bigin tink wantɛm.

³³ Bikɔs, kaw milk kin tɔn to bɔta; if yu baŋ yu nos blɔd go kɔmɔt de, yu ambɔgin pɔsin dɛn; yu go put yusɛf pan trɔbul.