Prɔvabs 3 - Krio Fɔs Oli Baybul

Advays Fɔ Yɔŋ Pipul

¹ Mi pikin, nɔ fɔgɛt wetin a de tich yu. Kip ɔl wetin a de tɛl yu so na yu at.

² Dat go mek yu gɛt lɔŋ layf ɛn bɛtɛ go fala yu na wɔl.

³ Nɔ miks pan kalokalo ɛn bɛnbɛn; bɔt mek lɔv ɛn tret biznɛs nɔ kɔmɔt nia yu; lɛ dɛn tan lɛk chen na yu nɛk, ɛn lɛ dɛn de na yu at ɔltɛm.

⁴ Na dat go mek PAPA GƆD ɛn mɔtalman lɛk yu biznɛs ɛn du gud to yu ɔltɛm.

⁵ Trɔs PAPA GƆD wit ɔl yu at. Nɔ abop pan yu yon sɛns.

⁶ Mek i put an pan ɔl wetin yu de du, ɛn yu go si yu we klia.

⁷ Nɔ fil to se yu sabi ɔltin; jɛs fred PAPA GƆD nɔmɔ ɛn nɔ du bad.

⁸ If yu du dat, i go bi mɛrɛsin fɔ yu bɔdi ɛn ɔl dɛn pen sɛf go lɔs.

⁹ Sho PAPA GƆD se yu rɛspɛkt am ɛn gi am ɔl wetin yu gɛt wit di fɔs tin dɛn we yu de avɛst.

¹⁰ Dat go mek yu gɛt ɔl wetin yu want insay yu sto, dat ples sɛf nɔ go de fɔ kip yu wayn.

¹¹ Mi pikin, nɔ mek traŋayes we PAPA GƆD de kɔrɛkt yu, ɛn nɔ se yu vɛks we i pɔnish yu fɔ we yu du rɔŋ.

¹² PAPA GƆD de kɔrɛkt udat i lɛk, lɛkɛ aw papa de kɔrɛkt pikin we i lɛk nɔmɔ.

¹³ I fayn fɔ di pɔsin we de tray fɔ gɛt sɛns, ɛn we de tray fɔ ɔndastand tiŋs.

¹⁴ In bɛnifit pas silva, ɛn in prɔfit pas gold.

¹⁵ Sɛns pas dayamɔn, natin nɔ de we tan lɛk sɛns.

¹⁶ Sɛns de mek pɔsin gɛt lɔŋ layf, i de gi jɛntri ɛn ɔna.

¹⁷ Sɛns go mek layf fayn fɔ yu, ɛn sɛns go gayd yu sef wan.

¹⁸ Sɛns tan lɛkɛ tik we de gi lɔŋ layf to dɛn wan we gɛt am; i fayn fɔ udat gɛt sɛns.

¹⁹ PAPA GƆD yuz in sɛns fɔ mek di wɔl na di sabi we i gɛt i yuz fɔ put di skay usay i de;

²⁰ nain sɛns de mek dɛn riva dɛn flo, dɔn ren kɔmɔt ɔp di klawd kam dɔŋ.

²¹ Mi pikin, gɛda yu sɛns ɛn tray fɔ si fa; mek shɔ se dɛn tu tin ya nɔ lɛf yu,

²² bikɔs dɛn go gi yu lɔŋ layf; lɔŋ layf we yusɛf go gladi fɔ.

²³ Dat go mek yu tinap deŋ ɛn yu nɔ go staga.

²⁴ Yu nɔ go fred sɛf we yu go lidɔm; ɛn na so yu go de drɔ slip.

²⁵ Yu nɔ go fred sɛf wɛn yu yɛri “Lɔd a masi o, faya!” Lɛkɛ aw trɔbul kin mit bad mɔtalman.

²⁶ PAPA GƆD go mek yu sef. Nɔn trap sɛf nɔ go kech yu.

²⁷ Nɔ drɔ yu an pan pɔsin we want mek yu ɛp am.

²⁸ Nɔ tɛl di pɔsin se lɛ i go ɛn kam tumara, wɛn yu no se yu kin ɛp am da momɛnt de.

²⁹ Nɔ plan bad tin fɔ yu kɔmpin, mɔ so we i de nia yu, ɛn de abop pan yu.

³⁰ Nɔ mek plaba wit pɔsin wɛn i nɔ du yu natin.

³¹ Nɔ jɛlɔs ɛni bad pɔsin ɛn nɔ falamakata ɛni wan pan wetin i de du.

³² PAPA GƆD et udat de du bad bɔt i lɛk pɔsin we de waka tret na PAPA GƆD in yay ɛn de mek am in padi.

³³ PAPA GƆD de ib swɛ na bad pɔsin in os, ɛn udat raychɔs, na blɛs i de blɛs in os.

³⁴ As fɔ dɛn wan we de laf dɛn kɔmpin, i de laf dɛn bak; bɔt i de sho fevɔ to dɛn wan we put dɛnsɛf dɔŋ.

³⁵ Udat gɛt sɛns go gɛt ɔna, bɔt fulman go kɔlik wit disgres.