Prɔvabs 29 - Krio Fɔs Oli Baybul

¹ Ɛnibɔdi we de mek traŋayes we dɛn kɔrɛkt am go gɛt trɔbul, ɛn we i nɔ mekɔp, na de i go fɛn in yon day.

² Wɛn pɔsin we de waka tret na PAPA GƆD in yay de rul ɔlman de gladi, bɔt wɛn bad pɔsin de rul ɔlman de grɔmbul.

³ Pikin we de gladi fɔ du wetin rayt de mek in papa in ed big, bɔt udat kip rare gyal de wes in mɔni.

⁴ Kiŋ we ɔnɛs ɛn de rul fia wande mek in kɔntri tinap traŋa wan, bɔt di wan we de aks fɔ mɔni mɔni ɔltɛm de pwɛl di kɔntri.

⁵ Udat de mek switmɔt to in kɔmpin de sɛt trap fɔ insɛf.

⁶ If yu na bad pɔsin yu bad go kech yu lɛkɛ trap; bɔt pɔsin we de waka tret na PAPA GƆD in yay in go de siŋ ɛn gladi.

⁷ Gud man no poman in rayt, bɔt di bad pɔsin nɔ bisin sɛf.

⁸ Pɔsin we nɔ tek natin mek natin kin tɔnɔbɔ wanol siti, bɔt dɛn wan we gɛt sɛns de mek tiŋs kwayɛt.

⁹ Wɛn udat gɛt sɛns de agyu wit fulman, di fulman go jɛs de ala de mek nɔys, ɛn wan pis nɔ go de.

¹⁰ Pɔsin we lɛk fɔ kil nɔ lɛk pɔsin we tret, bɔt udat de du rayt de tray fɔ sev in layf.

¹¹ Fulman kwik fɔ sho in tɛmpa gbangbaode, bɔt udat gɛt sɛns de peshɛnt ɛn kɔntrol insɛf.

¹² Ɛni rula we de tek lay ɛn koŋosa mek in wokman dɛn, kɔrɔpt.

¹³ Wetin di poman ɛn di man we de tɔmɛnt am fiba pan, na dat na PAPA GƆD mek dɛn tu de si.

¹⁴ If kiŋ rul ɛn rul po pipul fayn ɛn fia wan, i go bi kiŋ te i day.

¹⁵ Fɔ bit pikin ɛn kɔrɛkt am de mek i lan, bɔt if i lɛf to insɛf, i go put in mami pan shem.

¹⁶ Wɛn bad pɔsin de na pawa, ɔlkayn bad tin de apin, bɔt pɔsin we de waka tret na PAPA GƆD in yay go opin yay si we i de kapsay.

¹⁷ Wɛn yu tren yu pikin, yu go de gladi fɔ am ɔltɛm, i nɔ go ɛva mek yu shem.

¹⁸ Usay PAPA GƆD nɔ de fɔ de gayd pipul, ɔlman go de du tiŋs adɔnkiadam, i fayn fɔ di pɔsin we de kip PAPA GƆD in lɔ!

¹⁹ Slev nɔ izi fɔ tek kɔrɛkshɔn we yu de tɔk to am, ivin wɛn i de ɔndastand yu sɛf i nɔ de yɛri wɔd.

²⁰ Fulman bɛtɛ pas pɔsin we de tɔk bifo i tink.

²¹ If yu bayobayo yu mɔntbɔy frɔm we i smɔl te i big, i go ɛnd ɔp fɔ tek yu prɔpati tumara.

²² Pɔsin we gɛt wamat de sɛt big, big gbosgbos; ɛn pɔsin we tu krɔs de kɔz trɔbul.

²³ Pɔsin we de kak, dɛn go brok in fɛda dɔŋ; bɔt udat put insɛf dɔŋ, dɛn go gi am rɛspɛkt.

²⁴ Pɔsin we jɔyn tif gɛŋ nɔ de sɔri fɔ insɛf; i go yɛri we dɛn de swɛ so bɔt i nɔ go se fiŋ.

²⁵ I nɔ fayn fɔ lɛ yu de mɛmba tumɔs bɔt wetin pipul de tink bɔt yu, wans yu put yu trɔs pan PAPA GƆD, yu sef.

²⁶ Bɔku pipul lɛk fɔ mek gud fes to man we gɛt pawa, na PAPA GƆD nɔmɔ de mek fia ple.

²⁷ Lɛkɛ aw bad pɔsin et gud pɔsin, na so gud pɔsin insɛf et bad pɔsin.