Prɔvabs 28 - Krio Fɔs Oli Baybul

¹ Na bad pɔsin nɔmɔ kin de rɔn wɛn pɔsin nɔ kin de rɔnata am, bɔt pɔsin we de waka tret na PAPA GƆD in yay in de brev lɛkɛ layɔn.

² Wɛn kɔntri nɔ du wetin rayt na PAPA GƆD yay, dɛn go de mek ku ɔltɛm bɔt kɔntri go tinap deŋ if i gɛt lida dɛn we gɛt sɛns.

³ Wɛn poman ol pozishɔn, dɔn i de aras di po wan pantap dat, i tan lɛkɛ ren we de was ɔltin kɔmɔt na grɔn we nɔn it sɛf nɔ de lɛf.

⁴ Dɛn wan we nɔ de obe lɔ de bato dɛn bad pɔsin, bɔt dɛn wan we de obe di lɔ de fɛt dɛn wan we nɔ de obe.

⁵ Bad pɔsin nɔ no wetin na fia ple, bɔt udat de wɔship PAPA GƆD no wetin dat min.

⁶ I bɛtɛ lɛ yu na poman we de waka tret pas we yu jɛntri pan aramu.

⁷ Ɛni yɔŋ pɔsin we obe di lɔ gɛt sɛns, bɔt udat tek awaŋɔt pɔsin mek padi de put udat bɔn am pan shem.

⁸ Udat gɛt in jɛntri bay aw i de tek sɔplɔs mɔni frɔm ɔda pipul de gɛda fɔ di pɔsin we de gi poman.

⁹ Udat nɔ obe PAPA GƆD in lɔ, PAPA GƆD et in prea ɛn nɔ go ansa dɛnsɛf we i de pre.

¹⁰ Udat put ɔnɛs pɔsin insay fɔ lɛ i du bad go fɔdɔm nain yon trap, bɔt udat waka tret go gɛt blɛsin.

¹¹ Jɛntri man kin de tink se in gɛt sɛns, bɔt na poman sabi gud ɛn prɔpa aw i tan.

¹² Wɛn pɔsin we de waka tret na PAPA GƆD in yay gɛt pawa, ɔlman de sɛlibret; bɔt wɛn bad pɔsin gɛt pawa, ɔlman de ayd.

¹³ Udat ayd in sin nɔ de mek am na layf; bɔt udat kɔnfɛs in sin ɛn lɛf fɔ du bad, PAPA GƆD go sho am masi.

¹⁴ I go fayn fɔ di pɔsin we de fred ɛn rɛspɛkt PAPA GƆD, bɔt udat mek traŋayes go alaki.

¹⁵ Lɛkɛ aw layɔn ɛn bush kaw kin de siz advantej pan dɛn ɔda animal, na so bad rula tan to dɛn po wan we i de rul.

¹⁶ Ɛni rula we nɔ gɛt sɛns de mek di pipul sɔfa, bɔt udat nɔ miks pan kapu kapu ɛn awn awn de gɛt lɔŋ layf.

¹⁷ Pɔsin we dɔn kil, in kɔnshɛns kin de fɛt am, if i wan day, una lɛf am lɛ i day.

¹⁸ Udat de waka wit in ed ɔp nɔ de gɛt wan ambɔgin, bɔt udat bɛnbɛn de rɔndɔŋ.

¹⁹ Udat wok traŋa go gɛt wetin i de it, bɔt udat de rɔnata briz go tɔn to begaman.

²⁰ Ɔnɛs pɔsin go gɛt blɛsin, bɔt udat de kapu-kapu fɔ gɛda jɛntri nɔ go bɛtɛ.

²¹ I nɔ fayn fɔ fevɔ wan pɔsin we yu de jɔj kes, sɔm jɔj kin sɛl in bathrayt fɔ kokoɛbɛ.

²² Na krabit man kin de rɔnata jɛntri ɛn nɔ de mɛmba sɛf se i kin po ɛnitɛm.

²³ If yu kɔrɛkt yu kɔmpin, i go mɛmba yu tumara; yu bɛtɛ pas dɛn wan we de prez, prez am nɔmɔ.

²⁴ Ɛnibɔdi we de tif in mami ɛn dadi ɛn se natin nɔ de pan dat tan lɛkɛ ɛni am rɔba.

²⁵ Bigyay pɔsin de briŋ plaba na ples, bɔt bɛtɛ go fala udat trɔs PAPA GƆD.

²⁶ Udat biliv pan in yon sɛns nɔmɔ na fulman, bɔt udat liv in layf bay wetin dɛn sɛnsman tich nɔ de gɛt prɔblɛm.

²⁷ Udat de du gud to poman nɔ de po, bɔt udat tɔn in bak pan poman de fɛn swɛ fɔ insɛf.

²⁸ Wɛn bad pɔsin gɛt pawa ɔlman de ayd, bɔt wɛn i kapsay, pɔsin we de waka tret na PAPA GƆD in yay kin tek kɔntrol.