Prɔvabs 27 - Krio Fɔs Oli Baybul

¹ Nɔ bost bɔt tumara bikɔs yu nɔ no wetin go gɛt fɔ apin.

² Sɔl nɔ de prez insɛf na sup, lɛ ɔda pɔsin prez yu, i lɛk sɛf na trenja.

³ Ston ɛn sansan ebi bɔt di trɔbul we fulman kin kɔz pas ɔltu.

⁴ Pɔsin we gɛt wamat ɛn lɛk plaba kin pwɛl in kɔmpin, bɔt jɛlɔs pɔsin wɔs pas am.

⁵ I bɛtɛ lɛ yu kɔrɛkt pɔsin opin wan pas fɔ de ayd se yu lɛk am.

⁶ We yu padi ɔpoz yu na we i lɛk yu, bɔt if yu ɛnimi kis yu mm! Yu fɔ fred.

⁷ Bɛlful man nɔ de luk ɔni sɛf se na it; bɔt udat aŋri, miliju farinya sɛf de tes swit nain mɔt.

⁸ Man we kin de lɛf in os go jɛs tan lɛkɛ bɔd we na so insɛf kin lɛf os go.

⁹ Pafyum ɛn krim de mek pɔsin fil gladi, bɔt wɛn padi tru to yu, i bɛtɛ pas fayn insɛns.

¹⁰ Nɔ fɔgɛt yu padi ɛn yu papa in padi; wɛn yu gɛt prɔblɛm nɔ se yu de go fɛn fambul fɔ ɛp yu; gud neba bɛtɛ pas fawe fambul.

¹¹ Mi pikin, sho se yu gɛt sɛns ɛn mek a gladi, so a go ebul ansa ɛnibɔdi we briŋ fityay to mi.

¹² Udat gɛt sɛns nain de si denja i ayd pan am, bɔt udat ful de waka go insay de ɛn sɔfa fɔ dat.

¹³ Ɛnibɔdi we so styupid fɔ go tinap se in de pe dɛt fɔ trenja, nain prɔpati dɛn go siz te i pe dɔn.

¹⁴ Nɔ wek ali mɔnin ɛn bigin ala tɛl yu neba adu dɛn go se yu de was mɔt pan am.

¹⁵ Uman we lɛk plaba tan lɛk ren we nɔ de kɔt;

¹⁶ fɔ kɔntrol am tan lɛkɛ we yu de tray fɔ kɔntrol briz, ɔ ol ɔyl wit yu ɛmti an.

¹⁷ Lɛkɛ aw ayɛn de kɔt ayɛn, na so pɔsin de kɔba pɔsin.

¹⁸ Yu we plant tik we de bia frut go it di frut, semweso da savant we wok fayn fɔ in masta go gɛt gud nem.

¹⁹ Wɛn yu luk na wata na yu fes yu de si, semweso wɛn yu luk yusɛf gud insay yu at, na yusɛf yu de si tru tru wan.

²⁰ Lɛkɛ aw grev yad ɛn bɛriŋrɔn nɔ de bɛlful, na so mɔtalman sɛf nɔ de satisfay.

²¹ Lɛkɛ aw na faya dɛn de yuz fɔ tɛst gold ɛn silva, na so na bay aw yu biev we pipul prez yu, dɛn go no udat yu bi.

²² I lɛk aw yu bit fulman na mataodo lɛk kanda rɛs, di ful nɔ go kɔmɔt pan am.

²³ Ɛnti yu we de mɛn ship ɛn got no aw dɛn tan, so, mɛn dɛn fayn;

²⁴ bikɔs mɔni nɔ de de sote go, ɛn udat de rul sɛf nɔ de rul sote go.

²⁵ Wɛn yu dɔn kɔt di gras fɔ di animal dɛn, dɔn nyu gras bigin gro,

²⁶ yu go gɛt wul frɔm di ship fɔ mek klos dɔn di got go gi yu mɔni fɔ bay mɔ land;

²⁷ yu go gɛt bɔku got milk fɔ drink, yu famili go gɛt bɔku tin fɔ it ɛn yu wokuman dɛnsɛf go gɛt dɛn yon.