Prɔvabs 26 - Krio Fɔs Oli Baybul

¹ Lɛkɛ aw i nɔ fayn we ples de kol dray sizin ɔ ren kam tɛm fɔ avɛst, na so i nɔ fayn fɔ ɔna fulman.

² Swɛ nɔ de ol pɔsin fɔ wɔwɔ, i kin tan nɔmɔ lɛkɛ we kres bɔd de flay, flay ɛn nɔ gɛt say fɔ sidɔm.

³ Yuz wip fɔ lɛ ɔs ɛn dɔŋki du wetin yu want, yuz ken pan fulman.

⁴ Nɔ fala fulman agyu, ɔ nɔ so yu go tan lɛk insɛf.

⁵ Gi fulman styupid ansa fɔ in ful, dat go mek wi se i nɔ gɛt sɛns.

⁶ If yu se na fulman yu want tek mek mɛsenja, na yusɛf yu de du.

⁷ Lɛkɛ aw day-fut man in fut kin de dans, dans ɛn nɔ gɛt wan layf, na so fulman in parebul nɔ kin mek sɛns.

⁸ If yu prez fulman, i tan lɛk we yu fak sɔntin ɛn i nɔ go fa; na fɔ natin.

⁹ Lɛkɛ aw drɔnkɔman go want yuz chukchuk fɔ chuk, na so fulman in parebul nɔ kin mek sɛns.

¹⁰ Ɛnibɔdi we de aya fulman fɔ wok jɛs de ambɔg di ɔda pipul we de wok.

¹¹ Lɛkɛ aw dɔg kin de lik in vɔmit, na so fulman kin de mek ful ɔltɛm.

¹² Man we no se in na fulman, bɛtɛ pas di man we tink se in no pas aw i no.

¹³ Lesman kin se if in kɔmɔt na do fɔ go wok, layɔn go kech am.

¹⁴ Lɛkɛ aw do kin de opin ɛn lɔk bɔt nɔ de go nɔn we, na so les man kin de tɔn, tɔn nain bed.

¹⁵ Sɔm man so les dat ivin wɛn i put in an na pan fɔ it, i nɔ ebul es am put nain mɔt.

¹⁶ Les man de fil to se in gɛt sɛns sɛf pas sɛvin man we kin gi gud rizin fɔ wetin dɛn de du.

¹⁷ Ɛni bizabɔdi we go gbara kes pan pipul tɔk tan lɛkɛ we pɔsin go fɔ ol kres dɔg.

¹⁸ Lɛkɛ aw kresman kin de tek faya wud sɛn pan pipul;

¹⁹ na so man kin de ple in kɔmpin gem, dɔn i se na jok i de jok.

²⁰ Lɛkɛ aw fayasay nɔ de kech wɛn wud nɔ de, na so usay koŋosa nɔ de, plaba nɔ de de de.

²¹ Lɛkɛ aw kol de mek faya ɔt, wud de mek faya kech, na so pɔsin we ambɔgin kin mek plaba bi.

²² Lɛkɛ aw gud it swit to udat de it am, na so koŋosa tan to udat de lisin to am.

²³ Wɛn pɔsin yuz fayn wɔd fɔ kɔba in bad at, i tan lɛkɛ we dɛn yuz sankamaru silva fɔ kɔba kle pɔt.

²⁴ Ipokrit pɔsin kin de ayd in trik, bɔt nainsay in at di ipokrit de.

²⁵ Wɛn i opin in mɔt, nɔ biliv am o, bikɔs na ɔlkayn bad tin kin de nain at.

²⁶ I go de mek fayn-fayn fɔ kɔba in bad at, bɔt wan fayn de in wes go kɔmɔt na do.

²⁷ Udat dig ol fɔ in kɔmpin, nainsɛf go fɔdɔm insay de; ɛn if i put ston na rod fɔ lɛ i fɔdɔm, nain sɛf go fɔdɔm pan am.

²⁸ Na we yu et pɔsin mek yu de lay pan am, if yu mek ipokrit, na pwɛl yu de pwɛl am.