Prɔvabs 25 - Krio Fɔs Oli Baybul

Mɔ Advays Ɛn Parebul Dɛn We Kiŋ Sɔlɔmɔn Pul

¹ Dis na mɔ pan Kiŋ Sɔlɔmɔn in advays ɛn parebul dɛn we Kiŋ Ɛzikaya na Juda in sɛktri dɛn bin gɛda.

² PAPA GƆD de gɛt ɔna pan di tin dɛn we i de ayd pan wi, bɔt kiŋ dɛn de gɛt ɔna pan di tin dɛn we dɛn sabi ɛn de ɛksplen bɔt.

³ Lɛkɛ aw ɛvin de fawe frɔm di ath, na so nɔbɔdi nɔ de ɛva no wetin de na kiŋ in at.

⁴ If yu pul ɔl di dɔti we de pan silva, di silvasmit go ebul fɔ mek fayn tin.

⁵ Na semweso if dɛn pul bad advaysa dɛn kɔmɔt nia kiŋ, i go du tin tret wan.

⁶ Nɔ magomago mek yusɛf impɔtant bifo kiŋ, ɔ put yusɛf usay yu nɔ rich usay bigman dɛn de,

⁷ i bɛtɛ lɛ dɛn invayt yu fɔ go bifo pas fɔ pul yu frɔnt go biɛn usay bigman dɛn de.

⁸ Wetin yu yay dɔn si, nɔ magomago go tɔk am na kot, bikɔs if ɔda pɔsin go gi witnɛs se na lay yu de lay, yu go put yusɛf pan shem.

⁹ If yu ɛn yu kɔmpin gɛt plaba, una tɔk am; bɔt nɔ bigin fɔ pul in sikrit na do,

¹⁰ lɛ ɔda pɔsin yɛri. If yu du dat, nɔbɔdi nɔ go biliv yu igen fɔ yu rɔnmɔt.

¹¹ Ɛni wɔd we yu tɔk di rayt tɛm tan lɛk we yu tek gold mek fayn dizayn pan silva sɛtin.

¹² Wɛn pɔsin we gɛt sɛns gi advays to pɔsin we rɛdi fɔ lan, i bɛtɛ pas piɔ gold riŋ ɔ gold chen.

¹³ Lɛkɛ aw kol wata kin satisfay wɛn dɛn de avɛst insay dray sizin, na so mɛsenja we tret de tan to udat sɛn am, i kin mek i blo kam dɔŋ.

¹⁴ Lɛkɛ aw klawd kin de gɛda ɛn briz blo fɔ lɛ ren kam bɔt i nɔ kam, na so man we gɛt big tɔk tan.

¹⁵ Udat gɛt peshɛnt de ebul kɔnvins bigman, ɛn if yu sabi tɔk, yu de mek pɔsin we in at trɔŋ gɛt saf-at.

¹⁶ If yu fɛn ɔni, lik wetindu fɔ yu. If yu mek bigyay yu go kɔlik ɛn vɔmit.

¹⁷ Lɛ yu fut nɔ de de na yu kɔmpin in domɔt ɛvride, ɔ nɔ so i go gens wit yu ɛn et yu biznɛs.

¹⁸ Pɔsin we de lay pan in kɔmpin kin kil, lɛk aw wɛpɔn de kil.

¹⁹ Wɛn yu abop pan pɔsin we nɔto bɛtɛ mɔtalman, i tan lɛkɛ we yu gɛt bad tit ɔ yu gɛt bad fut.

²⁰ Wɛn yu de siŋ fɔ pɔsin we gɛt brokat, i tan lɛk we yu tek pɔsin in klos wɛn ples kol, ɔ wɛn yu put sɔl pan sofut.

²¹ If yu ɛnimi aŋri, gi am tin fɔ it; if i tɔsti, gi am wata;

²² wɛn yu du dat, na swɛ de pak nain ed ɛn PAPA GƆD go blɛs yu fɔ dat.

²³ Lɛkɛ aw di briz we de kɔmɔt na di nɔth de kɔl ren, na so koŋosa de briŋ twis fes.

²⁴ I bɛtɛ lɛ man tap na fɔl-os pas fɔ tap na os wit uman we lɛk plaba.

²⁵ Lɛkɛ aw tɔsti pɔsin de fil we i drink kol wata, na so yu de fil we yu yɛri gud nyuz bɔt fawe fambul.

²⁶ Lɛkɛ aw wɛl wata nɔba fayn fɔ drink we i kin dɔti, na so i nɔba fayn we pɔsin we de waka tret na PAPA GƆD in yay lɛf bad pɔsin fɔ du wetin i want.

²⁷ Aw i nɔ fayn fɔ lik tumɔs ɔni, na so i nɔ fayn fɔ de fɛn tumɔs prez.

²⁸ Pɔsin we nɔ ebul kɔntrol insɛf tan lɛkɛ siti we nɔ gɛt bawndri we ɛnibɔdi kin atak.