Prɔvabs 24 - Krio Fɔs Oli Baybul

-19-

¹ Nɔ jɛlɔs bad mɔtalman, ɛn nɔ jɔyn kɔmpin wit am.

² Wetin i sidɔm fɔ gbɛt na fɔ du bad, ɛn ɛnitɛm we i opin in mɔt, na trɔbul.

-20-

³ Na sɛns pɔsin de yuz fɔ bil os, na sɛns i de yuz fɔ le gud fawndeshɔn.

⁴ Na sɛns i de yuz fɔ put ɔlkayn dia ɛn fayn dɛkɔreshɔn de.

-21-

⁵ Man we gɛt sɛns gɛt pawa pas man we gɛt trɛnk; pawa pas trɛnk,

⁶ bikɔs na yu sɛns yu de yuz fɔ plan fɔ go fɛt wa, ɛn di mɔ yu gɛt gud advays, na di mɔ chans yu gɛt fɔ win.

-22-

⁷ Tumɔs sɛns tɔk tu dip fɔ fulman fɔ ɔndastand. Usay sɛnsman dɛn de tɔk, fulman kin jɛs mumu.

-23-

⁸ Udat lɛk fɔ de plan bad, dɛn go se i ambɔgin.

⁹ Ɛnitin we fulman plan na sin ɛn udat nɔ de tek natin mek natin na pɔsin we nɔbɔdi nɔ want nia am.

-24-

¹⁰ If yu giv ɔp di tɛm we prɔblɛm mit yu, wɛl, yu nɔto bɛtɛ pɔsin.

-25-

¹¹ Nɔ fred fɔ sev pɔsin we dɛn de go kil fɔ natin.

¹² If yu se nɔto yu biznɛs, yu nɔ tink se PAPA GƆD de si yu? In we de kɔba yu ɛvride ɛn no wetin yu de tink, i nɔ go pe yu fɔ wetin yu du?

-26-

¹³ Mi pikin, de it ɔni bikɔs i gud fɔ yu. Lɛkɛ aw ɔni swit na mɔt,

¹⁴ na so sɛns gud fɔ yu layf; if yu gɛt sɛns, dat na yu abop fɔ di bambay, ɛn yu nɔ go ɛva disapɔynt.

-27-

¹⁵ Nɔ le ambush fɔ atak pɔsin we de waka tret na PAPA GƆD in yay nain os, nɔ ambɔg am atɔl;

¹⁶ i lɛk ɔmɔs tɛm pɔsin we de waka tret na PAPA GƆD in yay fɔdɔm i de grap bak, bɔt wɛn bad pɔsin fɔdɔm, i nɔ de ɛva grap.

-28-

¹⁷ Nɔ laf wɛn yu ɛnimi fɔdɔm, nɔ gladi we i staga ɛn fɔdɔm.

¹⁸ If yu du dat PAPA GƆD go vɛks pan yu dɔn i nɔ go pɔnish am igen

-29-

¹⁹ Nɔ wɔri yusɛf bikɔs ɔf bad mɔtalman; nɔ jɛlɔs dɛn,

²⁰ bikɔs nɔn bɛtɛ tin nɔ de fɔ am tumara, i go day.

-30-

²¹ Mi pikin, ɔna ɛn rɛspɛkt PAPA GƆD ɛn di kiŋ, nɔ fala nɔbɔdi fɔ biev lɛkɛ rebɛl pan dɛn,

²² bikɔs wɛn yu nɔ mekɔp nain dɛn go ib masibo pan yu, ɛn yu nɔ go ebul fɔ no aw fa di trɔbul go go.

Mɔ Advays Dɛn Frɔm Dɛn Sɛnsman

²³ Dɛn wan yaso sɛf na ɔda gud advays: I nɔ fayn we yu de jɔj kes yu tek wan pɔsin in pat.

²⁴ Ɛnibɔdi we de jɔj kes we fri pɔsin we gilti, ɔlman go swɛ am ɛn bɔku kɔntri go was mɔt pan am,

²⁵ bɔt di jɔj we sɛntɛns udat gilti go gɛt prez ɛn gud nem, i go gɛt blɛsin.

²⁶ Ɛnibɔdi we tɔk tru de sho lɔv lɛkɛ we pɔsin kin kis in kɔmpin.

²⁷ Mek yu plan gud, mek yu fam ɛn plant bifo yu de se yu de bil os.

²⁸ Nɔ tinap as witnɛs fɔ yu kɔmpin we yu nɔ gɛt rizin, ɛn nɔ lay de.

²⁹ Nɔ se yu de tɔn dɛt gi yu kɔmpin ɛn dil wit am fɔ wetin i du yu.

³⁰ A bin de waka wande na wan lesman in fam, man we nɔ gɛt sɛns in greps gadin,

³¹ nain wantɛm a si soso chukchuk, na soso gras bin kɔba di wanol ples ɛn di wɔl sɛf bin dɔn brok.

³² A luk pin ɛn tink to misɛf ɛn pik sɛns.

³³ I se lɛ in jɛs gɛt smɔl slip nɔmɔ, lɛ i nɔd lilibit, lɛ i jɛs fol in an ɛn blo lilibit;

³⁴ na so i tek tɔn popoliopo bikɔs i de slip nɔmɔ. Ɛn na so po go atak am lɛkɛ am rɔba.