Prɔvabs 22 - Krio Fɔs Oli Baybul

¹ Gud nem bɛtɛ pas jɛntri, ɛn rɛspɛkt pas bɛlful.

² Wan tin wit poman ɛn jɛntri man, na dat na PAPA GƆD mek dɛn ɔl.

³ Udat gɛt sɛns, nain de si denja i ayd pan am; bɔt udat ful de waka go insay de ɛn sɔfa fɔ dat.

⁴ Di pe we PAPA GƆD de gi udat ɔna am ɛn put insɛf dɔŋ na jɛntri, rɛspɛkt ɛn lɔŋ layf.

⁵ Ɔl kaynaba trɔbul ɛn prɔblɛm nain de mit bad pɔsin, bɔt udat tek tɛm de balans dɛn ɔl.

⁶ Gi pikin gud trenin so dat wɛn i dɔn big, i nɔ go fɔgɛt di trenin.

⁷ Na jɛntri man de kɔntrol poman, ɛn semweso yu we o dɛt de tɔn slev to udat yu trɔs to.

⁸ Udat du bad go gɛt di pe ɛn dat go mek i nɔ ambɔgin nɔbɔdi igen

⁹ Udat gɛt frian ɛn de fid poman de gɛt blɛsin.

¹⁰ Drɛb udat nɔ tek natin mek natin kɔmɔt nia yu, ɛn si if plaba, koŋosa, kɔs kɔs nɔ go tap.

¹¹ Udat we gɛt klin at ɛn sabi tɔk, nain di kiŋ kin mek in padi.

¹² PAPA GƆD de kɔba udat de sho se i gɛt sɛns, ɛn pwɛl layman dɛn plan.

¹³ Lesman kin se if in kɔmɔt na do fɔ go wok, layɔn go kech am ɔ in go day na trit.

¹⁴ Fri uman in mɔt, na lɛkɛ trap; ɛni man we PAPA GƆD vɛks pan, nain de fɔdɔm wit fred insay de.

¹⁵ Pikin dɛn gɛt wan kaynaba abit fɔ de mek traŋayes, bɔt wɛn yu wok dɛn gud, i de mek dɛn soba.

¹⁶ Udat sɔprɛs poman fɔ lɛ in jɛntri, ɔ de gi jɛntri man we de mek i gɛt mɔ, go ɛnd ɔp fɔ bi poman.

Tati Gud Advays

¹⁷ Opin yu yes ɛn lisin fayn to gud advays, tink gud bɔt wetin a de tɔk,

¹⁸ bikɔs yu go gladi if yu mɛmba dɛn dɔn yu go rɛdi fɔ tɛl ɔda pipul bɔt dɛn.

¹⁹ Na fɔ lɛ yu go put yu trɔs pan PAPA GƆD mek a de tɛl yu ɔl dis tide.

²⁰ A dɔn rayt tati gud advays fɔ yu we go ɛp yu fɔ lan bɔku sɛns,

²¹ we go mek yu no wetin rayt ɛn kɔrɛkt, so dat ɛni kwɛshɔn we dɛn aks yu, yu go ebul fɔ gi kɔrɛkt ansa.

-1-

²² Nɔ tek advantej pan poman bikɔs na yu gɛt pawa; nɔ tek in rayt tɔn am to rɔŋ we yu de jɔj kes,

²³ bikɔs PAPA GƆD go fɛt fɔ am ɛn pe yu fɔ wetin yu du.

-2-

²⁴ Nɔ mek padi wit ɛnibɔdi we gɛt wamat ɛn kwik fɔ misbiev,

²⁵ ɔ nɔ so yu go kɔpi in bad trik ɛn put yusɛf pan trɔbul.

-3-

²⁶ Nɔ go tinap as garantɔ fɔ ɛnibɔdi in dɛt,

²⁷ dɛn go drɔ di bed sɛf we yu lidɔm pan ɔnda yu if yu nɔ kam gɛt am fɔ pe.

-4-

²⁸ Nɔ pul ɛni ol bekin we yu papa dɛn bin dɔn put.

-5-

²⁹ Yu si pɔsin we sabi du in wok fayn, na wit big pipul i go de de ɔltɛm, yu nɔ go ɛva si am wit rifraf mɔtalman.