Prɔvabs 21 - Krio Fɔs Oli Baybul

¹ Lɛkɛ aw i izi fɔ PAPA GƆD fɔ kɔntrol wata we de rɔn, na so i izi fɔ am fɔ kɔntrol wetin kiŋ de plan ɛn du, ɛn na usay i want am fɔ go i de kɛr am.

² Man kin de tink se wetin in de du rayt, bɔt na PAPA GƆD de si di at.

³ PAPA GƆD de gladi mɔ fɔ udat de du wetin rayt ɛn fia, pas fɔ udat de mek sakrifays to am.

⁴ Fɔ de kak ɛn de blɔf, na tin we bad pɔsin de du, ɛn dat na sin.

⁵ Wɛn yu tek tɛm plan ɛn wok soba wan, yu de prɔfit; bɔt if yu want rɔn pas yu fut, yu go lɔsis.

⁶ If na lay ɛn koŋosa yu abop pan fɔ jɛntri, ɔltin go lɔs pan yu lɛkɛ smok, ɛn na so yu go day.

⁷ Bad pɔsin de fɔdɔm nain yon trap, bikɔs i nɔ want du wetin rayt.

⁸ Udat gilti nɔ de waka tret, bɔt udat inosɛnt de du wetin rayt.

⁹ I bin fɔ bɛtɛ fɔ lɛ man tap na fɔl-os pas fɔ tap na os wit uman we lɛk plaba.

¹⁰ Bad pɔsin de plan bad ɔltɛm, i nɔ de sho wan masi fɔ in kɔmpin.

¹¹ Wɛn dɛn pɔnish udat nɔ tek natin mek natin, udat nɔ gɛt sɛns sɛf de gɛt sɛns; ɛn wɛn yu tich udat gɛt sɛns, i de gɛt mɔ sɛns.

¹² PAPA GƆD, we de du tin tret wan, de si ɔl wetin bad pɔsin de du, ɛn wan fayn de i go gi am in pe.

¹³ Udat sɛt yes pan poman wɛn i want am fɔ ɛp am, dɛn go sɛt yes pan insɛf wɛn in yon tɔn rich.

¹⁴ Wɛn yu shekan na kɔna, if pɔsin de mek wamat pan yu, i go mek i kol.

¹⁵ Wɛn dɛn jɔj kes fia wan, ɔl dɛn gud pipul de gladi, bɔt dɛn bad wande tɔmɛnt.

¹⁶ Pɔsin we kɔmɔt usay i go lan sɛns, go fɛn insɛf na rod we go mek i day kwik.

¹⁷ Udat lɛk ɛnjɔymɛnt go ɛnd pan po, ɛn udat de spɛnd mɔni pan rɔm ɛn ɛkspɛnsiv it sɛf nɔ go jɛntri.

¹⁸ Bad pɔsin go sɔfa bikɔs ɔf gud pɔsin, yu nɔ tret fɔ yu tret.

¹⁹ I bɛtɛ lɛ yu de na ɛmti land we pɔsin nɔ go ebul tap pas fɔ tap na os wit uman we lɛk fɔ kɔmplen, ɛn mek plaba.

²⁰ Udat gɛt sɛns de kip in kɔpɔ ɛn ɛnjɔy am smɔl, smɔl; bɔt styupid pɔsin de tek awaŋɔt dɔn in yon kwik, kwik wan,

²¹ Udat want fɔ du tin tret wan ɛn de du gud, go gɛt rɛspɛkt ɛn lɔŋ layf.

²² Ɛni ami kɔmanda we gɛt sɛns kin atak ɔda pawaful siti ɛn kapchɔ am, ɛn brok, brok ɔl in sikyɔriti wɔl dɛn.

²³ Udat kɔntrol in mɔt nɔ de put insɛf pan trɔbul.

²⁴ Pɔsin we de kak ɛn rud, we nɔ de du wetin i se na pɔsin we nɔ tek natin mek natin.

²⁵ Da pɔsin we les go day fɔ gɛt wetin i want bikɔs i nɔ want wok;

²⁶ ol de i de milɛ wit ojukokoro, bɔt pɔsin we de waka tret na PAPA GƆD in yay nɔ tan so, in frian.

²⁷ PAPA GƆD nɔ lɛk di sakrifays we bad pɔsin kin kɛr to am; i et am mɔ wɛn di pɔsin kin de du am fɔ lɛ i go du mɔ bad.

²⁸ Udat go gi fɔls witnɛs go sɔfa fɔ dat, ɛn udat go gi tru witnɛs nain dɛn go lisin to.

²⁹ Bad pɔsin kin lɛk fɔ mek drayay ɔltɛm, bɔt pɔsin we de waka tret na PAPA GƆD in yay no wetin i de du.

³⁰ Nɔn mɔtalman sɛns ɔ kɔni nɔ de mek PAPA GƆD nɔ du wetin i wan du.

³¹ I lɛk ɔmɔs ɔs ɛn sojaman dɛn yu gɛt fɔ fɛt wa, na PAPA GƆD de gi viktri.