Prɔvabs 20 - Krio Fɔs Oli Baybul

¹ Wayn de mek yu nɔ tek natin mek natin, ɛn ad lika de mek yu lɔs kɔntrol; so ɛnibɔdi we rɔm opin yay pan na styupid mɔtalman.

² Wɛn kiŋ dɔn vɛks bad bad wan, i tan lɛkɛ we wayl animal de rej, udat go ambɔgin am go lɔs in layf.

³ Fɔ kip to yu rɛspɛkt, nɔ de miks pan plaba; fɔ di plaba in yon say, lɛf am gi dɛn fulman.

⁴ Ɛni fama we nɔ plant ren sizin, nɔ go gɛt natin fɔ avɛst dray sizin.

⁵ Mɔtalman in maynd dip lɛkɛ wɛl, bɔt udat gɛt sɛns kin ebul no wetin i de tink.

⁶ Bɔku pipul kin mek mɔt se yu kin abop pan dɛn, jɛs tray dɛn ɛn si if yu go fɛn wan pɔsin sɛf we yu go abop pan.

⁷ Man we de waka tret wande fɛn blɛsin fɔ in pikin dɛn.

⁸ Wɛn kiŋ sidɔm nain chia fɔ jɔj, nain yay i de tek shifta ɔl dɛn lay.

⁹ Udat na wɔl go es in an ɔp se in an klin, in nɔ de kɔmit wan sin?

¹⁰ Fɔ de ple kruk pan skel ɛn mɛzhɔmɛnt na tin we PAPA GƆD et.

¹¹ Pikin dɛn de sho dɛnsɛf bay wetin dɛn de du, if na di rayt tin dɛn de du.

¹² PAPA GƆD mek yes fɔ yɛri ɛn yay fɔ si.

¹³ Udat de slip slip, go ɛnd pan po; bɔt if yu yay opin korokoro wan, yu go gɛt bɔku fɔ it.

¹⁴ “Masi, tiŋs dia o, tiŋs dia!” Na so yu de bay kin tɔk; bɔt wɛn i dɔn bay dɔn, i bigin de blɔf se in sabi yɔwo.

¹⁵ I fayn fɔ gɛt gold ɛn dayamɔn, bɔt nɔn dayamɔn nɔ de we pas di gud wɔd we de kɔmɔt na mɔt.

¹⁶ Ɛnibɔdi we so styupid fɔ go tinap se in de pe dɛt fɔ trenja, nain prɔpati dɛn fɔ siz te di dɛt pe.

¹⁷ Ɛnitin we yu gɛt bay aramu go swit na yu mɔt fɔ tide, bɔt fɔ tumara, i go tɔn bitabita na yu mɔt.

¹⁸ I fayn fɔ gɛt gud advays we yu mekɔp yu plan, nɔ grap se yu de go fɛt wa we yu nɔ plan gud.

¹⁹ Ɛnibɔdi we gɛt rɔnmɔt nɔ de kip sikrit, so nɔ miks wit pɔsin we de tɔk-tɔk.

²⁰ If ɛnibɔdi fityay in mami ɔ dadi, in lamp go ɔt bifo do klin.

²¹ Ɛni prɔpati ɔ jɛntri we yu gɛt bay kruk ɔ aramu nɔ de bɛtɛ yu tumara.

²² Nɔ se yu de tɔn dɛt gi pɔsin, lɛf lɛ PAPA GƆD fɛt fɔ yu.

²³ PAPA GƆD et we pɔsin de rog pan mɛzhɔmɛnt ɔ fiks di skel.

²⁴ Na PAPA GƆD de dayrɛkt ɔlman na layf, udat no aw in go ɛnd?

²⁵ Tink gud bifo yu prɔmis PAPA GƆD sɔntin, ɔ nɔ so yu go rigrɛt tumara.

²⁶ Kiŋ we gɛt sɛns de tek tɛm shifta bad pipul nain kindɔm, ɛn pɔnish dɛn gud fashin.

²⁷ Na wi kɔnshɛns PAPA GƆD de yuz as tɔchlayt fɔ wach wi pan wetin wi de pan.

²⁸ Kiŋ we ɔnɛs, tret ɛn de rul fia wan go te na pawa.

²⁹ Wɛn man yɔŋ dɛn de kɔle pan am fɔ in trɛnk, bɔt dɛn de kɔle mɔ pan olpa fɔ in wet ia.

³⁰ Na gud dɔti bit de pul bad trik pan pɔsin, ɛn wɛn yu fol blo di bad pɔsin go tek shep.