Prɔvabs 2 - Krio Fɔs Oli Baybul

Aw Sɛns De Bɛnifit Pɔsin

¹ Mi pikin, lisin to wetin a de tel yu ɛn du wetin a se.

² Lisin to ɛni sɛns tɔk ɛn tray fɔ de ɔndastand,

³ aks fɔ lɛ yu go sabi; beg fɔ lɛ yu ɔndastand tin we gɛt dip dip minin.

⁴ Tray yu bɛst fɔ gɛt sɛns lɛkɛ aw nɔmɔ dɛn kin dig fɔ fɛn silva ɔ ɛnitin we gɛt valyu.

⁵ If yu du dat yu go no wetin i min fɔ fred PAPA GƆD, ɛn yu go no bɔt PAPA GƆD.

⁶ Na PAPA GƆD de gi sɛns; nain de mek pɔsin no bɔt sɔntin ɛn ɔndastand gud wan.

⁷ I de gi udat tret pawa fɔ gen viktri. I de kɔba dɛn wan we nɔ de pan bɛnbɛn.

⁸ I de kɔba dɛn wan we de trit dɛn kɔmpin fia wan, ɛn sev dɛn wan we biliv pan am ɛn de obe am.

⁹ If yu lisin to mi, yu go no aw fɔ du tin tret wan, wetin gud ɛn aw fɔ trit pɔsin fia wan. Yu go no wetin fɔ du.

¹⁰ Bikɔs sɛns go de insay yu ed, ɛn di pawa fɔ sabi sɔntin go mek yu gladi,

¹¹ yu go gɛt pawa fɔ de si fa ɛn ɔndastand,

¹² ɛn dat go mek yu nɔ du di rɔŋ tin. I go kɔba yu frɔm dɛn mɔtalman we na fɔ tɔk bad tin nɔmɔ dɛn sidɔm fɔ,

¹³ ɛn dɛn nɔ de waka na di rayt rod, na fɔ du bad nɔmɔ dɛn de fɔ.

¹⁴ Dɛn kin gladi fɔ du bad ɛn de ɛnjɔy di bad we dɛn de du.

¹⁵ Dɛn pipul ya, nɔ fɔ trɔs dɛn bikɔs dɛn gɛt bɛnbɛn.

¹⁶ If yu gɛt sɛns nɔn rare gyal nɔ go tɔn yu to rederaun. Nɔn lus gyal sɛf nɔ go tek in swit mɔt waka pan yu sɛns,

¹⁷ afta we i dɔn lɛf in man ɛn fɔgɛt se in bin dɔn mek vaw to PAPA GƆD.

¹⁸ If yu go nain os, na day rod yu de waka ɛn na ɔdɔun yu de fɛn.

¹⁹ Ɛnibɔdi we go to am nɔ wan bɛtɛ, infakt sɛf nain layf i nɔ de tɔn bak wit.

²⁰ Na gud pipul yu fɔ de falamakata, ɛn yu go de du tin tret wan.

²¹ Na udat de waka tret go de na di land, wit di wan dɛn we de du di rayt tin,

²² bɔt as fɔ di bad wan dɛn, PAPA GƆD go pul dɛn kɔmɔt na di land, ɛn dɛn wan we nɔ bɛtɛ i go rut dɛn lɛkɛ plant.