Prɔvabs 18 - Krio Fɔs Oli Baybul

¹ Pɔsin we de kip to insɛf nɔmɔ nɔ wan no bɔt ɔda pɔsin.

² Fulman nɔ de pe atɛnshɔn fɔ kapu sɛns, i kin lɛk fɔ sho insɛf se in smat.

³ Usay bad plɛnti, shem ɛn disgres de biɛn am ɛn pipul nɔ de rɛspɛkt udat bad.

⁴ Ɛni sɛns tɔk we de kɔmɔt na pɔsin in mɔt tan lɛkɛ wata we de gɛda na di oshɔn, na so i kin de flo lɛkɛ spriŋ wata.

⁵ Lɛkɛ aw i nɔ fayn fɔ fri udat gilti, na so i nɔ fayn fɔ rog di pɔsin we de waka tret.

⁶ Wɛn fulman opin in mɔt na fɔ briŋ plaba, na gud bit i kin de fɛn fɔ insɛf.

⁷ Wɛn fulman tɔk, nainsɛf i de pwɛl; wetin de kɔmɔt nain mɔt na trap fɔ kech insɛf, sɛf.

⁸ Kongosa tan lɛkɛ swit it we pɔsin de ɛnjɔy, na so i kin go bon.

⁹ Pɔsin we les ɛn pɔsin we sabi pwɛl, dɛn tu na lɛkɛ tatu ɛn yawa.

¹⁰ PAPA GƆD na lɛkɛ big kɔtintri, pɔsin we de waka tret na PAPA GƆD in yay kin go ayd biɛn am.

¹¹ We man gɛt mɔni, prɔblɛm nɔ de ebul am; i kin de fil se in mɔni na ɔltin.

¹² Bifo pɔsin alaki na kak fɔs i kin bigin kak, yu gɛt fɔ put yusɛf dɔŋ bifo dɛn go es yu ɔp.

¹³ If yu ansa bifo yu yɛri wetin dɛn de tɔk, yu jɛs de sho se yu na fulman.

¹⁴ If yu bɔdi sik, yu kin manej bɔk ɔp, bɔt if yu spirit sik, udat go ebul bia?

¹⁵ Udat gɛt sɛns de tray fɔ lan mɔ, ɛn yu tik nɔ brok nain yes, insɛf de tray fɔ lan.

¹⁶ Udat de mek frian de opin we fɔ insɛf, ɛn dat de mek i rɔbskin wit impɔtant pɔsin.

¹⁷ Udat fɔs le kɔmplen kin tan lɛk i gɛt rayt, te dɛn yɛri di ɔda pati in stori.

¹⁸ Wɛn tu pawaful pipul de mek plaba, na fɔ lɛf PAPA GƆD fɔ kɔt di kes.

¹⁹ I at fɔ mek pis wit yu brɔda, pas fɔ kapchɔ siti we gɛt wɔl rawnd am.

²⁰ Wetin de kɔmɔt na pɔsin in mɔt nain de satisfay am, ɛn na bay aw i tɔk am i go si di bɛnifit.

²¹ Dis mɔt, nain de mek, nain de pwɛl; aw yu yuz am, na so yu go bɛnifit.

²² Udat gɛt gud wɛf gɛt lɔk, ɛn na blɛsin frɔm PAPA GƆD.

²³ Wɛn poman de beg, i gɛt fɔ dɔbalɛ; bɔt wɛn di jɛntri man de ansa am, na rɔf wan i de tɔk to am.

²⁴ Nɔto ɔl padi na padi, bɔt sɔm padi dɛn de we pas brɔda.