Prɔvabs 16 - Krio Fɔs Oli Baybul

¹ Man go de mek in plan nain at, bɔt na PAPA GƆD gɛt di las se.

² Man go de tink se ɔl wetin i de du rayt, bɔt na PAPA GƆD de si insay in at.

³ Put yu biznɛs na PAPA GƆD in an, ɛn si we bɛtɛ de fala yu.

⁴ PAPA GƆD gɛt in rizin we mek i mek ɔltin, ivin di wan we bad, i go mek i alaki.

⁵ PAPA GƆD et pɔsin we de kak, ɛn i fɔ no se jɔjmɛnt de gɛt fɔ kam.

⁶ If yu fethful ɛn de kip to yu wɔd, PAPA GƆD go fɔgiv yu sin, if yu fred PAPA GƆD, yu nɔ go de pan bad tin.

⁷ Wɛn PAPA GƆD pliz wit pɔsin, i de mek in ɛnimi dɛnsɛf bi in padi.

⁸ I bɛtɛ lɛ yu gɛt smɔl tin we yu du tin tret wan pas fɔ jɛntri pan kukujumuku.

⁹ Man de tink wetin i want nain at, bɔt na PAPA GƆD de sho am aw fɔ waka.

¹⁰ Na PAPA GƆD de put wɔd na kiŋ in mɔt, ɛn i nɔ de bɛnbɛn wɛn i de jɔj kes.

¹¹ PAPA GƆD lɛk ɔnɛs biznɛs, ɔl wetin i de du fia.

¹² Kiŋ dɛn et udat de du bad, bikɔs na wɛn pipul du tret wan di gɔvmɛnt tinap traŋa wan.

¹³ Kiŋ lɛk fɔ yɛri di tru, ɛn i lɛk udat de tɔk tru.

¹⁴ If Kiŋ vɛks i kin mek dɛn kil, bɔt if sɛnsman de nia am i kin kol in tɛmpa.

¹⁵ Wɛn Kiŋ api, ɔlman de fil layvli, ɛn wɛn i de sho fevɔ, i tan lɛkɛ we ren de kam afta dray sizin.

¹⁶ I bɛtɛ o! I bɛtɛ fɔ lɛ pɔsin chuz fɔ gɛt sɛns pas fɔ pak bɔku gold ɛn silva.

¹⁷ Dɛn wan we tret nɔ de waka na denja rod, udat kiaful na layf de sev in layf.

¹⁸ If yu de kak, yu go kapsay, wans yu gɛt mek mek, dɛn go brok yu fɛda dɔŋ.

¹⁹ I bɛtɛ fɔ ɔmbul yusɛf ɛn lɛf po wan pas fɔ de kak wit tif prɔpati.

²⁰ Bɛtɛ go fala udat tek wetin dɛn tich am na layf, ɛn i go fayn fɔ am mɔ if i trɔs PAPA GƆD.

²¹ Man we no in lɛft frɔm in rayt na man we gɛt sɛns, wɛn i tɔk so, yu de fɔl fɔ wetin i se.

²² Sɛns tan lɛkɛ spriŋ wata we de gi layf to di pɔsin we gɛt am, bɔt fulman nain ful de mek i sɔfa.

²³ Man we gɛt gud sɛns de tek tɛm tɔk, i kin kɔnvins pɔsin bay wetin i de tɔk.

²⁴ Gud tɔk tan lɛkɛ ɔni we swit na mɔt ɛn gud fɔ di bɔdi.

²⁵ Di rod we pɔsin kin de fil se rayt, na de i kin ɛnd ɔp fɔ lɔs in layf.

²⁶ Udat no se i lɛk in bɛlɛ, de wok fɔ lɛ i gɛt tin fɔ it.

²⁷ Bad pɔsin de plan bad fɔ in kɔmpin, di wɔd sɛf we de kɔmɔt nain mɔt na lɛk faya.

²⁸ Bad pɔsin de sɛtfaya, ɛn koŋosa de mek padi skata.

²⁹ Bad pɔsin de put in kɔmpin pan trɔbul ɛn dat kin mek i nɔ ɛnd fayn sɛf.

³⁰ Ɛnibɔdi we de shumɔ pan in kɔmpin nɔ de min gud fɔ am, pɔsin we nɔ de tɔk na bad mɔtalman.

³¹ Wet ia de sho ol ej ɛn ɛkspiriɛns na di pe dat we pɔsin we de waka tret na PAPA GƆD in yay de gɛt.

³² Fɔ gɛt peshɛnt bɛtɛ pas fɔ gɛt pawa, ɛn udat ebul kɔntrol in tɛmpa bɛtɛ pas udat de win batul.

³³ Pipul dɛn kin fɛnɔt wetin na PAPA GƆD in wil, bɔt na PAPA GƆD insɛf sɛf de sho wetin in want.