Prɔvabs 15 - Krio Fɔs Oli Baybul

¹ We pɔsin vɛks, if yu tɔk fayn to am, i nɔ go vɛks igen; bɔt if yu gi am bakansa, yu go mek i vɛks mɔ.

² Wɛn sɛnsman de tɔk, ɔlman de gladi ɛn want fɔ yɛri mɔ; bɔt wɛn fulman opin in mɔt, na soso rotorata de kɔmɔt de.

³ PAPA GƆD de si ɔlsay, i de wach udat de du bad, ɛn udat de du gud.

⁴ Fayn ansa tan lɛkɛ tik we de gi layf, bɔt bakansa de kil pɔsin in spirit.

⁵ Fulman nɔ de tek wetin in papa tich am, bɔt yu de yɛri wetin dɛn tɛl am gɛt sɛns.

⁶ Pɔsin we de waka tret na PAPA GƆD in yay de kip in jɛntri, bɔt bad pɔsin de lɔs in yon wɛn tin traŋa.

⁷ Udat gɛt sɛns, nain mɔt ɔlkayn sɛns tɔk de kɔmɔt, bɔt nɔto so i de bi fɔ fulman.

⁸ PAPA GƆD et di sakrifays we bad pɔsin de mek to am, bɔt i de gladi fɔ yɛri gud pɔsin in prea.

⁹ PAPA GƆD et bad pɔsin in trik, bɔt i lɛk dɛn wan we de du wetin rayt.

¹⁰ Udat lɛf fɔ du wetin rayt, dɛn fɔ pɔnish am gud fashin; if i nɔ want tek kɔrɛkshɔn, i fɔ day.

¹¹ If PAPA GƆD no ɔl wetin de apin na dɛn grev yad ɛn bɛriŋrɔn, wetin de na pɔsin in at we go ayd pan am?

¹² Pɔsin we nɔ de tek natin mek natin nɔ lɛk kɔrɛkshɔn ɛn na so i nɔ lɛk aks udat no pas am fɔ advays.

¹³ Na udat gladi de sho in tit, yu nɔ gladi de pwɛl at pan ɔltin.

¹⁴ Udat gɛt sɛns de tray fɔ lan mɔ, bɔt fulman in kin jɛs de ful mɔ.

¹⁵ Tin trɔŋ fɔ poman; bɔt fɔ di pɔsin we gladi, de pan ladida ɔltɛm.

¹⁶ I bɛtɛ lɛ yu po ɛn gɛt PAPA GƆD na yu at, pas fɔ jɛntri wit bɔku bɔku prɔblɛm.

¹⁷ I bɛtɛ lɛ yu de na os wit lɔv ɛn nɔ gɛt bɛtɛ tin fɔ it, pas fɔ gɛt bɔku tin fɔ it dɔn pis nɔ de.

¹⁸ Shɔtat pɔsin kwik fɔ mek plaba, bɔt yu at fɔ vɛks de mek pis.

¹⁹ Udat les gɛt bɔku yagba na layf, bɔt yu de du wetin rayt at fɔ gɛt trɔbul.

²⁰ Pikin we gɛt sɛns de mek in papa in ed big, bɔt fulman nɔ de yɛri in mama in wɔd.

²¹ Fulman de gladi pan in ful, bɔt yu gɛt sɛns de fɛt fɔ du wetin rayt.

²² If yu nɔ gɛt bɔku advays yu plan go fel yu, bɔt if yu gɛt bɔku advays, bɛtɛ go fala yu.

²³ Udat shap fɔ gi kwik ansa de gladi, ɛn i kin gladi mɔ wɛn i gi di kɔrɛkt ansa.

²⁴ Udat gɛt sɛns de waka na di rod we de gi layf, i nɔ de fala di rod fɔ go ɔdɔun.

²⁵ PAPA GƆD go brok pɔsin we de kak in fɛda in os, bɔt i nɔ go ambɔgin uman we in man dɔn day.

²⁶ PAPA GƆD et di bad we bad pɔsin kin de mekɔp, bɔt i de gladi fɔ gud tɔk.

²⁷ Ɛnibɔdi we bigyay ɛn de kapu-kapu de put in famili pan trɔbul, bɔt udat et fɔ tek brayb de gɛt lɔŋ layf.

²⁸ Pɔsin we de waka tret na PAPA GƆD in yay de tink gud bifo i ansa kwɛshɔn, bɔt na tɔk de kɔmɔt na bad pɔsin in mɔt.

²⁹ PAPA GƆD nɔ de nia bad man, bɔt de ansa udat de waka tret wan in prea.

³⁰ Wɛn pɔsin smayl to yu, yu de gladi, ɛn gud nyuz, de gi wɛlbɔdi.

³¹ Udat de yɛri wɔd wɛn dɛn kɔrɛkt am, go lɛk fɔ de wit sɛnsman dɛn.

³² Udat de se in nɔ want lan de du insɛf, bɔt yu tek kɔrɛkshɔn de gɛt mɔ sɛns.

³³ If yu ɔna ɛn rɛspɛkt PAPA GƆD yu go lan fɔ gɛt sɛns, yu gɛt fɔ put yusɛf dɔŋ bifo dɛn go es yu op.