Prɔvabs 14 - Krio Fɔs Oli Baybul

¹ Mared uman we gɛt sɛns de mek in os, bɔt di wan we fulish, nain yon an i de tek skata am.

² Udat de fred PAPA GƆD de waka tret, bɔt udat nɔ gɛt fred fɔ am nain de waka bɛnbɛn.

³ Udat nɔ gɛt sɛns, nain mɔt go bit am; bɔt yu gɛt sɛns, nain yon go sev am.

⁴ Fam we animal nɔ de fɔ dig, bɛtɛ it nɔ go de fɔ kip; bɔt usay animal dɛn de, di sto go ful-ɔp wit it.

⁵ Tru witnɛs pan kes nɔ de lay, bɔt di wan we nɔ de tɔk tru na layman.

⁶ Pɔsin we nɔ tek natin mek natin de wes in tɛm de fɛn sɛns, bɔt yu gɛt sɛns de lan kwik.

⁷ Nɔ kip kɔmpin wit fulman, yu nɔ go lan natin.

⁸ Wetin mek sɛnsman gɛt sɛns? Na fɔ lɛ i no in lɛf frɔm in rayt; di ful we fulman in ful na fɔ lɛ in de poz se in no we i nɔ no.

⁹ Na fulman nɔmɔ de sho in tit wɛn i du bad, PAPA GƆD de gladi wɛn pɔsin du wetin rayt.

¹⁰ Udat wɛr in sus, nain no aw i fit am, nɔbɔdi nɔ no aw i tayt ɔ i slak.

¹¹ Bad pɔsin in os go pwɛl, bɔt as fɔ udat gud, in os go de bɛtɛ te go.

¹² Di rod we pɔsin kin de fil se rayt, na de i kin ɛnd ɔp fɔ lɔs in layf.

¹³ Man go de laf so bɔt in at nɔ swit, wɛn di laf dɔn, i go bak to in pwɛlat.

¹⁴ Udat bad go kɔlik wit di pe fɔ in bad, ɛn yu gud, semweso go gɛt in yon pe.

¹⁵ Na fulman nɔmɔ de biliv ɛnitin, udat gɛt sɛns de luk bifo i jomp.

¹⁶ Udat gɛt sɛns de tek tɛm lɛ i nɔ wɛr pan trɔbul, bɔt yu ful de tink se in no, ɛn nɔ de tek tɛm.

¹⁷ Udat gɛt shɔtat de mek bɔku bɔku mistek, bɔt yu peshɛnt de tek tiŋs izi.

¹⁸ Styupid pɔsin de gɛt wetin i wok fɔ, bɔt sɛnsman de pik sɛns.

¹⁹ Bad pɔsin go de bega-bega to gud pɔsin ɔltɛm ɛn na so wikɛd pɔsin sɛf go de bega-bega to pɔsin we de waka tret na PAPA GƆD in yay.

²⁰ Poman nɔ de gɛt padi, in neba dɛnsɛf nɔ de maks am; as fɔ jɛntri man, in de gɛt bɔku bɔku padi.

²¹ Udat de fil se i bɛtɛ pas in kɔmpin de sin, bɔt i fayn fɔ dɛn wan we de du gud to poman.

²² Ɛnibɔdi we de plan bad de mek mistek, bɔt yu de plan gud go gɛt pipul fɔ lɛk am ɛn trɔs am.

²³ Wok fɔ lɛ yu go gɛt yu an to mɔt, bɔku tɔk tɔk kin mek yu po.

²⁴ Udat gɛt sɛns de jɛntri bɔt as fɔ fulman, nain ful dɛn de tek drɛs am.

²⁵ Yu de tɔk tru de sev in kɔmpin in layf, bɔt di wan we de lay de sɛl in kɔmpin.

²⁶ Udat fred PAPA GƆD ɛn ɔna am nɔ de shek, natin nɔ de we in famili nɔ go gɛt.

²⁷ Udat fred PAPA GƆD ɛn ɔna am tan lɛkɛ spriŋ wata we nɔ de dray, i go ɛp sev in layf wɛn dɛn sɛt trap fɔ am.

²⁸ Fɔ lɛ kiŋ gɛt ɔna, i fɔ gɛt bɔku pipul nain kindɔm, if i nɔ gɛt nɔbɔdi fɔ rul, dɛn i nɔ gɛt pawa.

²⁹ Udat gɛt shɔtat de sho se in na fulman, bɔt yu nɔ gɛt shɔtat gɛt sɛns.

³⁰ Udat gɛt kolat de gɛt wɛl bɔdi, bɔt jɛlɔs krab nɔba fat.

³¹ Udat ambɔgin poman nɔ bisin bɔt PAPA GƆD, bɔt udat ɛp poman sho se in de fred PAPA GƆD.

³² Udat de du bad jɛs de alaki insɛf, bɔt yu de du gud nain gud de fala am.

³³ Udat gɛt sɛns, de no wetin fɔ du, bɔt fulman nɔ gɛt kɔmɔn sɛns.

³⁴ Bɛtɛ de fala ɛni kɔntri we de du wetin rayt, bɔt di wan we de pan shemful tin na disgres to in pipul.

³⁵ Kiŋ de gladi fɔ udat sabi in wok, bɔt fɔ udat nɔ de wok fayn, i de sho am pɛpɛ.