Prɔvabs 13 - Krio Fɔs Oli Baybul

¹ Pɔsin we gɛt sɛns de yɛri in papa in wɔd, bɔt udat we nɔ tek natin mek natin nɔ de tek kɔrɛkshɔn.

² Gud wɔd pul kola, bɔt bad pɔsin in de aŋri fɔ du bad.

³ Udat gi in mɔt kola de sev in layf, bɔt udat gɛt rɔnmɔt de du insɛf.

⁴ Les man nɔ de gɛt ɔl wetin i want, bɔt udat de wok traŋa go gɛt wetin i want.

⁵ Udat ɔnɛs, et lay, bɔt di wɔd we de kɔmɔt na bad pɔsin in mɔt na shem ɛn disgres nɔmɔ i de gɛt.

⁶ Udat de du tin tret wan, nain tret wande sev am; bɔt yu bad, nain bad de pwɛl am.

⁷ Sɔm man de mek gɛt-gɛt, bɔt in nɔ gɛt dondo, na de sɔm we de mek nɔ gɛt, gɛt os ɛn lɔt.

⁸ Jɛntri man de yuz in jɛntri fɔ sev in layf, bɔt poman nɔ gɛt fɔ yagba fɔ dat.

⁹ Pɔsin we de waka tret na PAPA GƆD in yay de shayn lɛk brayt layt, bɔt bad pɔsin in yon lamp go ɔt bifo tɛm.

¹⁰ Rudnɛs nɔ de prɔfit natin pas plaba, bɔt yu tek advays gɛt sɛns.

¹¹ Jɛntri we yu nɔ wok fɔ de go lɛk briz, bɔt di wan we yu lebɔ fɔ de sidɔm na yu an.

¹² Drɛg fut pan prɔmis de gi brok at, bɔt we yu gɛt wetin yu want yu de gladi.

¹³ Udat nɔ yɛri wɔd go pe fɔ in traŋayes, bɔt udat yɛri wɔd go rip di bɛnifit.

¹⁴ Wetin sɛnsman de tich tan lɛkɛ spriŋ wata we de gi layf; i go ɛp sev pɔsin in layf wɛn dɛn sɛt trap fɔ am.

¹⁵ Udat gɛt sɛns go gɛt rɛspɛkt, bɔt yu dɛn nɔ fɔ trɔs de pwɛl rod fɔ insɛf.

¹⁶ Udat gɛt sɛns de tink bifo i du tiŋs, bɔt yu nɔ gɛt sɛns de papisho in ful.

¹⁷ Bad mɛsenja de put pipul pan trɔbul, bɔt di gud wande briŋ pis.

¹⁸ Udat nɔ de yɛri wɔd, na po ɛn disgres go mit am, bɔt yu de yɛri wɔd go gɛt rɛspɛkt.

¹⁹ Pɔsin de gladi we i gɛt wetin i want, bɔt fulman et fɔ lɛf fɔ du bad.

²⁰ Udat de rakpala wit pipul we gɛt sɛns de gɛt sɛns, bɔt if yu se na fulman kabudu yu de rɔbskin wit, yu go tɔn rederaun.

²¹ Trɔbul nɔ de kɔmɔt biɛn bad pɔsin, bɔt bɛtɛ go fala di pɔsin we de waka tret na PAPA GƆD in yay.

²² Gud papa de day lɛf prɔpati fɔ in pikin ɛn grampikin dɛn, as fɔ bad pɔsin, na udat raychɔs go ɛnjɔy in prɔpati.

²³ Wɛn poman go drɛg na fam i kin gɛt wetin i de it; bɔt oya, dɛn kin wan siz advantej pan am.

²⁴ Udat de fred fɔ pɔnish in pikin nɔ lɛk am, if i lɛk am, i go disiplin am.

²⁵ Pɔsin we de waka tret na PAPA GƆD in yay de gɛt ɔl wetin i want fɔ it, bɔt bad pɔsin de go slip wit aŋri bɛlɛ.