Prɔvabs 12 - Krio Fɔs Oli Baybul

¹ Udat lɛk fɔ lɛ dɛn kɔrɛkt am lɛk fɔ lan, bɔt yu nɔ lɛk kɔrɛkshɔn, bigful.

² PAPA GƆD de blɛs dɛn wan we gud, bɔt i go jɔj dɛn wan we de mekɔp bad tin.

³ Bad nɔ de pe nɔbɔdi gud tin, bɔt natin nɔ de shek pɔsin we de waka tret na PAPA GƆD in yay.

⁴ Gud wɛf de mek in man fil prawd, bɔt uman we de put shem pan in man tan lɛkɛ bad sik na bɔdi.

⁵ Pɔsin we de waka tret na PAPA GƆD in yay de mekɔp gud tin ɔltɛm, bɔt bad pɔsin nɔ de mɛmba gud fɔ in kɔmpin.

⁶ Di wɔd we de kɔmɔt na bad pɔsin mɔt, na fɔ pwɛl mɔtalman, bɔt di wan we de kɔmɔt na pɔsin we de waka tret na PAPA GƆD in yay, in yon mɔt, na fɔ sev in kɔmpin.

⁷ Bad pɔsin in wok nɔ de ɛnd fayn, bɔt pɔsin we de waka tret na PAPA GƆD in yay in wok go de sote go.

⁸ If yu gɛt sɛns, dɛn go prez yu, bɔt if yu de mek ful, dɛn nɔ go luk yu wit bɛtɛ yay.

⁹ I bɛtɛ yu de ɔdinari wande wok fɔ yusɛf, pas fɔ yu de wok fɔ yu dɔn yu nɔ gɛt tin fɔ it.

¹⁰ Pɔsin we de waka tret na PAPA GƆD in yay de trit in animal dɛn gud, bɔt bad pɔsin nɔ de bisin bɔt in yon.

¹¹ Udat wok gud go gɛt wetin i de it, bɔt udat de fala briz nɔ gɛt sɛns.

¹² Ɔl wetin bad pɔsin lɛk na fɔ kapu kapu bad pɔsin in prɔpati, bɔt natin nɔ de shek pɔsin we de waka tret na PAPA GƆD in yay.

¹³ Pɔsin we bad nain yon mɔt de sɛl am, bɔt pɔsin we de waka tret na PAPA GƆD in yay nɔ de lɛf pan trɔbul.

¹⁴ Lɛkɛ aw man de bɛnifit frɔm di gud wɔd we de kɔmɔt nain mɔt, na so udat wok traŋa wan go gɛt di pe.

¹⁵ Fulman de tink se in kɔrɛkt ɔltɛm, bɔt yu gɛt sɛns de lisin to advays!

¹⁶ Wɛn fulman vɛks ɔlman de no, bɔt yu gɛt sɛns nɔ de tek kɔs mek ɛnitin.

¹⁷ Udat de tɔk tru de pan fia ple, bɔt yu de lay de pwɛl.

¹⁸ Wɔd we pɔsin nɔ tink bɔt bifo i pul am na mɔt, kin kɔt shap lɛk sɔd, bɔt yu gɛt sɛns, wɛn i tɔk, i kin mek pɔsin at kol.

¹⁹ Lay nɔ de te, bɔt tru go de sote go.

²⁰ Udat de plan bad fɔ in kɔmpin gɛt bad at, bɔt yu de plan gud gɛt jɔy.

²¹ Trɔbul nɔ de mit pɔsin we de waka tret na PAPA GƆD in yay, na yu de plan bad de gɛt trɔbul.

²² PAPA GƆD et lay, bɔt i kin gladi fɔ dɛn wan we de kip dɛn wɔd.

²³ Udat nɔ gɛt sɛns nain de tɔk bɔku, bɔt yu gɛt sɛns de kip in sɛns fɔ in jab.

²⁴ Udat de wok traŋa wan go gɛt pawa, bɔt yu les go tɔn to lebra.

²⁵ Udat de wɔndrin tumɔs nɔ de api, bɔt if dɛn kɔrej am, i go bɔk ɔp.

²⁶ Pɔsin we de waka tret na PAPA GƆD in yay de gayd in padi, bɔt as fɔ bad pɔsin, nain bad de lid am astre.

²⁷ Udat les, in bɛlɛ nɔ de ful, bɔt yu de wok traŋa de jɛntri.

²⁸ Udat de du tin tret go gɛt lɔŋ layf, bɔt yu we nɔ de waka na di rayt rod, de risk yu layf.