Prɔvabs 11 - Krio Fɔs Oli Baybul

¹ PAPA GƆD et udat de rog pan mɛzhɔmɛnt, bɔt i kin pliz wit yu de mɛzhɔ kɔrɛkt.

² Udat de kak go de butu in ed na grɔn ɔltɛm, bɔt yu put insɛf dɔŋ gɛt sɛns.

³ Udat tret, nain tret wande gayd am na layf; bɔt yu bɛnbɛn, nain bɛnbɛn wande alaki am.

⁴ Mɔni nɔ de sev pɔsin wɛn in tɛm rich fɔ day, bɔt if i ɔnɛs, PAPA GƆD go sev am.

⁵ Udat de du tin tret wan, nain tret wande ɛp am na layf; bɔt yu bad, nain bad de mek i alaki.

⁶ Udat de du tin tret wan, nain tret wande sev am bɔt na di gridi we yu bɛnbɛn gridi de kech am.

⁷ Wɛn bad pɔsin day, ɔl wetin i abop pan de day go wit am, di jɛntri we i abop pan ɔl na natin.

⁸ PAPA GƆD de sev pɔsin we de waka tret na PAPA GƆD in yay pan trɔbul, bɔt udat bad, trɔbul nɔ de kɔmɔt biɛn am.

⁹ Na udat nɔ no PAPA GƆD de tek in mɔt pwɛl in kɔmpin, bɔt yu gɛt sɛns go sev am na dɛn an.

¹⁰ Wɛn bɛtɛ de fala gud pipul na siti, ɔlman de gladi, semweso wɛn bad pɔsin day, ɔlman de gladi.

¹¹ PAPA GƆD de blɛs di siti we raychɔs pipul de, bɔt wetin bad pipul se kin pwɛl di siti.

¹² Udat de lili in kɔmpin nɔ gɛt sɛns, bɔt udat gɛt sɛns de kip wetin i tink to insɛf.

¹³ Udat gɛt rɔnmɔt, nɔ de kip sikrit, bɔt yu de kɔntrol in mɔt kin sikrit.

¹⁴ Tɔŋ we pipul nɔ de fɔ gi advays, ɔlman de lɔs trak; bɔt usay advaysa dɛn de, di siti de bɛtɛ.

¹⁵ Udat tinap fɔ trenja go gɛt trɔbul; bɔt yu nɔ du dat, de sev insɛf.

¹⁶ Fayn uman we gɛt trenin de gɛt rɛspɛkt. Man we de wok traŋa wande jɛntri.

¹⁷ Yu du gud i du am fɔ insɛf, yu du bad i du am fɔ insɛf.

¹⁸ Bad nɔ de pe ɛnibɔdi gud tin bɔt yu du gud de gɛt gud pe.

¹⁹ Udat mekɔp in maynd fɔ du wetin rayt go gɛt lɔŋ layf, bɔt yu mekɔp fɔ de du bad go gɛt shɔt layf.

²⁰ PAPA GƆD et bad at pɔsin, bɔt as fɔ dɛn wan dɛn we de du di tin tret wan, i lɛk dɛn.

²¹ Nɔn bad pɔsin nɔ de we nɔ de gɛt in pe, bɔt wan krach nɔ go tɔch gud pɔsin.

²² Ɛni fayn uman we nɔ gɛt sɛns tan lɛkɛ ɔg we dɛn put gold riŋ nain nos.

²³ Ɛnitin we gud pɔsin de mekɔp kin kɔmɔt fayn bɔt wɛn bad pɔsin mekɔp sɔntin, ɔlman kin vɛks.

²⁴ Udat gɛt fri an ɛn de du gud de gɛt mɔ; bɔt yu de mek nɔ gɛt nɔ go gɛt.

²⁵ Udat nɔ de skyad fɔ du gud de payl jɛntri fɔ insɛf; ɛn yu de gi in kɔmpin fɔ drink, dɛn go gi insɛf bak fɔ drink.

²⁶ Dɛn wan we de ayd rɛs fɔ big big prɔfit, ɔltɛm dɛn go de tɔk bad bɔt dɛn; bɔt dɛn wan we de put dɛn yon fɔ sɛl de gɛt prez.

²⁷ Udat de du in bɛst fɔ du gud de gɛt rɛspɛkt; bɔt yu de fɛn trɔbul, trɔbul de fɛn am.

²⁸ Udat put in yay pan in jɛntri go fɔdɔm lɛk dray lif; bɔt gud pɔsin go frɛsh lɛkɛ grin lif.

²⁹ If yu briŋ trɔbul kam na yu os, yu nem nɔ de de na wil. Fulman go de bi jakas fɔ sɛnsman ɔltɛm.

³⁰ Udat liv raychɔs layf de mek ɔda pipul bɛnifit; ɛn yu gɛt sɛns de mek pipul de rawnd am.

³¹ If udat raychɔs de gɛt in pe na ya; mɔs no uskayn pe bad pɔsin go gɛt.