Prɔvabs 10 - Krio Fɔs Oli Baybul

Kiŋ Sɔlɔmɔn In Parebul Dɛn

¹ Dis na Kiŋ Sɔlɔmɔn in parebul dɛn: Pikin we gɛt sɛns de mek in papa in ed big; bɔt di wan we ful de pwɛl in mami in at.

² Ɛni jɛntri we yu gɛt bay kruk nɔ de mek yu bɛtɛ, bɔt raychɔs layf de gi lɔŋ layf.

³ PAPA GƆD nɔ de mek pɔsin we de waka tret na PAPA GƆD in yay go slip aŋri, bɔt udat bad, i nɔ de mek i gɛt wetin i want.

⁴ If yu les, yu go po, bɔt if yu de wok traŋa, yu go jɛntri.

⁵ Pikin we gɛt sɛns de avɛst, avɛst tɛm; bɔt pikin we de slip avɛst tɛm de mek in famili shem.

⁶ Pɔsin we de waka tret na PAPA GƆD in yay de gɛt blɛsin, bad pɔsin de ayd wetin i mekɔp fɔ du bay wetin i de tɔk.

⁷ Ɔltɛm dɛn go de mɛmba di wan we raychɔs in gud nem, bɔt bad pɔsin in nem go rɔtin.

⁸ Udat gɛt sɛns de tek gud advays, bɔt yu gɛt big tɔk nɔmɔ nain mɔt nɔ de ɛnd fayn.

⁹ Udat de si fa de tek tɛm wit wetin i de du, bɔt dɛn go kech udat de pan dabaru.

¹⁰ Udat de ayd tru wɔd de briŋ kuskas, bɔt yu de tɔk tru gbangbaode de briŋ pis.

¹¹ Wɔd we de kɔmɔt na pɔsin we de waka tret na PAPA GƆD in yay in mɔt na lɛkɛ spriŋ wata we de gi layf, bɔt bad pɔsin de ayd wetin i mekɔp fɔ du bay wetin i de tɔk.

¹² Bad at de briŋ plaba, bɔt lɔv de mek pɔsin fɔgiv.

¹³ Pɔsin we gɛt sɛns nain de tɔk sɛns tɔk, bɔt styupid pɔsin na tik fɔ tek wok am.

¹⁴ Dɛn wan we gɛt sɛns nɔ de taya fɔ lan, bɔt wɛn fulman tɔk, yu no se trɔbul nɔ de fa frɔm am.

¹⁵ If yu gɛt kɔpɔ natin nɔ de ebul yu, bɔt if yu po, waala nɔ de kɔmɔt biɛn yu.

¹⁶ Pɔsin we de waka tret na PAPA GƆD in yay in pe na lɔŋ layf, bɔt bad pɔsin nɔ de ɛnd fayn.

¹⁷ Udat yɛri wɛn dɛn kɔrɛkt am de gɛt lɔŋ layf, bɔt yu nɔ yɛri go si am.

¹⁸ Udat de ayd in bad at na layman, ɛn yu de koŋosa na fulman.

¹⁹ Udat de tɔk tɔk bɔku de lay, bɔt yu de kɔntrol in mɔt gɛt sɛns.

²⁰ Di wɔd we de kɔmɔt na pɔsin we de waka tret na PAPA GƆD in yay in mɔt tan lɛk piɔ silva; bɔt bad pɔsin nɔ de tink bɛtɛ tin.

²¹ Wɛn gud pɔsin de tɔk, plɛnti pipul de bɛnifit, bɔt fulman de day bifo in tɛm, fɔ in ful.

²² Na PAPA GƆD in gres de mek yu jɛntri, i lɛk yu wok traŋa te yu nɔ go jɛntri.

²³ Na fulman de tek bad mek gem, bɔt yu gɛt sɛns de gladi fɔ in gud karakta.

²⁴ Wetin bad pɔsin de fred pas ɔl nain go apin to am, bɔt wetin pɔsin we de waka tret na PAPA GƆD in yay want, PAPA GƆD go gi am.

²⁵ Wɛn big tinada blo i nɔ de lɛf bad pɔsin, bɔt yu raychɔs de tinap deŋ!

²⁶ Nɔ sɛn lesman fɔ du sɔntin fɔ yu, ɔ nɔ so, lɛkɛ aw viniga sawa na mɔt ɛn smok de bɔn yay, na so i go bi fɔ yu.

²⁷ Udat fred PAPA GƆD yu go gɛt lɔŋ layf, bɔt yu bad na shɔt layf i de gɛt.

²⁸ Di op we di pɔsin we de waka tret na PAPA GƆD in yay gɛt de mek i gladi, bɔt yu bad, in plan nɔ de ɛva wok.

²⁹ PAPA GƆD de kɔba udat ɔnɛs, bɔt udat bad i de mek i alaki.

³⁰ Pɔsin we de waka tret na PAPA GƆD in yay nɔ go ɛva staga, bɔt bad pɔsin nɔ go te na di land.

³¹ Pɔsin we de waka tret na PAPA GƆD in yay de tɔk sɛns tɔk, bɔt dɛn go lɔk yu de lay, in mɔt.

³² Wɛn pɔsin we de waka tret na PAPA GƆD in yay de tɔk na wetin pipul wan yɛri, bɔt as fɔ bad pɔsin, na lay nɔmɔ in de lay.