Prɔvabs 1 - Krio Fɔs Oli Baybul

Wetin Du Parebul Gud

¹ Dis na di parebul ɛn advays dɛn we Kiŋ Sɔlɔmɔn na Izrɛl, Devid in bɔypikin gi:

² Dɛn parebul ɛn advays ya go ɛp pɔsin fɔ tich ɛn gɛt sɛns, ɛn dɛn go mek i ɔndastand di dip, dip minin we dɛn gɛt.

³ If yu fala dɛn parebul ɛn advays ya, yu go sabi aw fɔ waka na layf, yu go bi pɔsin we de du tin tret wan, ɛn trit pipul fia wan.

⁴ Dɛn go mek pɔsin kapu sɛns, ɛn ɛp yɔŋ pɔsin sɛf we nɔ gɛt ɛkspiriɛns, fɔ tich ɛn no wetin i de pan.

⁵ Udat we dɔn gɛt sɛns go gɛt mɔ sɛns ɛn udat de si fa, in yay go opin mɔ

⁶ fɔ lɛ i go ɔndastand di parebul dɛn minin.

Advays Fɔ Yɔŋ Pipul

⁷ If yu want fɔ gɛt sɛns na layf, di fɔs tin we yu fɔ du na fɔ biliv PAPA GƆD ɛn fred am; fulman nɔ de tek advays ɛn kɔrɛkshɔn.

⁸ Mi pikin, pe atɛnshɔn to wetin yu papa de tɛl yu, nɔ fɔgɛt wetin yu mama de tel yu.

⁹ Wetin dɛn de tɛl yu go tan lɛkɛ fayn fɛda at na yu ed, ɛn fayn silva chen na yu nɛk.

¹⁰ Mi pikin, if bad pɔsin dɛn tɛmt yu, nɔ gri.

¹¹ If dɛn se lɛ una le ambush fɔ kil, lɛ una jɛs kil inosɛnt pɔsin fɔ kil sek;

¹² we di pɔsin de wit in wɛlbɔdi ɛn layf wan, dɛn se lɛ una sɛn am go ɔdɔun;

¹³ dɔn una go tif ɔl in prɔpati, ɛn ful-ɔp una os wit ɔl wetin una tif;

¹⁴ dɛn se lɛ yu jɔyn dɛn dɔn una ɔl go sheb.

¹⁵ Mi pikin, nɔ fala dɛn; lɛ yu fut sɛf nɔ mas usay dɛn de;

¹⁶ dɛn yon fut dɛn na fɔ de waka du bad, dɛn rɛdi fɔ kil ɔltɛm.

¹⁷ A nɔ si sɛns fɔ tray fɔ kech bɔd we i de wach yu;

¹⁸ di trap we dɛn sɛt nain de kech dɛn, dɛn de fɔdɔm insay de ɛn day.

¹⁹ Udat de tif, na so i de ɛnd; na shɔt layf i de gɛt.

Sɛnsman De Wɔn Pipul

²⁰ Wisdɔm na lɛkɛ sɛnsman. I de ala lawd wan na dɛn trit ɛn dɛn makit;

²¹ i de tɔk lawd na dɛn kot os ɛn dɛn say we pipul kin gɛda. I se,

²² “Fulish pipul! Aw lɔŋ una go de pan fulishnɛs? Aw lɔŋ una nɔ go de tek natin mek natin? Una nɔ de lan sɛns?

²³ Una lisin to wetin a de tɛl una; a go gi una gud advays ɛn tɛl una wetin a sabi.

²⁴ A tɔk to una bɔt una nɔ yɛri; a kɔl una bɔt una nɔ kam,

²⁵ una nɔ yɛri mi advays, ivin we a kɔrɛkt una, una nɔ tek;

²⁶ wɛn trɔbul mit una a go laf una, a go dans we una de pan waala,

²⁷ wɛn big tinada blo ɛn put una pan ɔp ɛn dɔŋ, dɔn di kɔt at bigin de mɔna una lɛkɛ ronsho briz, dɔn una de pan pen ɛn ɛŋ at, a go se i switi.

²⁸ A go de yɛri we una de kɔl so, bɔt a nɔ go ansa; una go de fɛn fɛn mi, bɔt una nɔ go si mi.

²⁹ Bikɔs una nɔ wan tich sɛns, biliv ɛn fred PAPA GƆD,

³⁰ dɔn una nɔ lisin to mi advays ɛn nɔ yɛri we a de kɔrɛkt una,

³¹ wɛl aw una mek una bed, na so una go lidɔm de. Una go kɔlik wit una yon we.

³² Fulish pɔsin de day bikɔs ɔf in dɛf yes; fulman de day bikɔs i nɔ bisin bɔt insɛf,

³³ udat lisin to mi nɔ gɛt natin fɔ fred, i go gɛt kol at ɛn nɔ gɛt wan yagba.”