Lɛta Fɔ Filipay 4 - Krio Fɔs Oli Baybul

Pɔl de Tɛl Gɔd In Pipul dɛn na Filipay Wetin Dɛn Fɔ Du

¹ Mi Kristiɛn brɔda dɛn we a lɛk ɛn we a aŋri fɔ si, una dɔn mek a gladi ɛn a de bost bɔt una ɔltɛm. Una fɔ tinap traŋa wan ɛn gɛt wanwɔd wit di Masta.

² Yuodia ɛn Sintiche, a de beg una, duya, una fɔ gɛt wanwɔd lɛkɛ sista. Wetin du? Bikɔs una gɛt wanwɔd wit di Masta.

³ Ɛn yu, we na mi tru wokmet, a want mek yu ɛp dɛn tu uman ya, bikɔs dɛn dɔn wok an to an wit mi traŋa wan fɔ prɛd di Gud Nyuz ɔlɔbɔt. Dɛn wok wit mi lɛkɛ aw Klɛmɛnt ɛn sɔm ɔda pipul dɛn ɛp mi pan di wok, ɛn Gɔd dɔn rayt dɛn ɔl nem na di buk we dɛn pipul we gɛt layf sote go dɛn nem de.

⁴ Una fɔ gladi ɔltɛm bikɔs una gɛt wanwɔd wit di Masta. A de tɛl una igen se una fɔ gladi!

⁵ Mek ɔlman si se una ebul bia wit pipul. Una mɛmba se, i nɔ go te igen, di Masta go kam bak.

⁶ Una nɔ fɔ mek ɛnitin wɔri una, bɔt una fɔ de pre bɔt ɔltin. Wɛn una de pre, una fɔ aks Gɔd fɔ ɛnitin we una want ɛn una fɔ tɛl am tɛnki.

⁷ Gɔd go gi una kol at, we mɔtalman nɔ ebul ɔndastand, we nɔ go mek ɛnitin wɔri una, bikɔs una gɛt wanwɔd wit Jizɔs Krays.

⁸ Mi Kristiɛn brɔda dɛn, na di las tin dis we a want tɛl una na dis lɛta: dɛn tin we tru, dɛn tin we rayt na Gɔd yay, dɛn tin we gud we nɔ de mek pipul sin, dɛn tin we de mek pɔsin lɛk in kɔmpin mɔtalman, ɛn dɛn tin we ɔlman si se gud; na dɛn nɔmɔ una fɔ de mɛmba ɛn ɔl dɛn tin we pɔsin kin prez Gɔd fɔ.

⁹ Una fɔ de du dɛn tin we a dɔn lan una. Una fɔ de du dɛn tin we a bin de tɔk se fɔ du ɛn dɛn tin we a bin de du. Ɛn Gɔd we de gi kol at go de wit una.

Pɔl de Tɛl Gɔd In Pipul dɛn na Filipay Tɛnki fɔ we dɛn Ɛp Am

¹⁰ Bikɔs a de waka wit di Masta, a gladi bad. I bin dɔn tek lɔŋ we una nɔ bin de ɛp mi igen, bɔt naw una dɔn gɛt chans fɔ bigin ɛp mi bak. A no se una nɔ bin jɛs tap fɔ ɛp mi nɔmɔ, bɔt na chans una nɔ bin gɛt fɔ stil de ɛp mi.

¹¹ A nɔ want mek una fil se a de grɔmbul bikɔs a want sɔntin bad wan, nɔto so i bi bikɔs a dɔn lan fɔ satisfay wit wetin a gɛt.

¹² Tɛm de we mi an kin dray, tɛm de we ɔltin kin oba fɔ mi. Bɔt a dɔn no wan sikrit, dat na fɔ satisfay ɔltɛm, wɛn a gɛt plɛnti tin fɔ it ɔ wɛn a nɔ gɛt natin fɔ it, wɛn a gɛt mɔni ɔ wɛn a nɔ gɛt.

¹³ A ebul du ɔltin bikɔs Krays de mek a ebul.

¹⁴ Na gud una bin de du we una bin de ɛp mi wɛn a bin de pan trɔbul.

¹⁵ Una dɛn Kristiɛn dɛn na Fili pay, una no se frɔm di tɛm we a kɔmɔt Masidonia, dɛn tɛm we a bin jɛs bigin tɛl pipul di Gud Nyuz, nɔ ɔda chɔch nɔ gi mi natin pas una.

¹⁶ Wɛn a bin de na Tɛsalonayka sɛf, plɛnti tɛm we a kin want sɔntin bad bad, na una kin sɛn am fɔ mi.

¹⁷ Nɔto fɔ se a jɛs want una fɔ gi mi tin dɛn, di tin we go mek a gladi mɔ na we una go gɛt di pe fɔ di gud we una de du.

¹⁸ Una bin dɔn gi mi pas wetin a fɔ gɛt; a gɛt ɔl wetin a want naw we una dɔn sɛn Ɛpafrodaytɔs fɔ kam gi mi di tin dɛn we a bin want bad wan, ɛn wetin una gi mi mek a satisfay, i jɛs tan lɛkɛ sakrifays we una gi Gɔd we Gɔd gri fɔ ɛn we i gladi fɔ.

¹⁹ Mi Gɔd we a de pre to, go gi una ɔl wetin una fɔ gɛt bikɔs nain gɛt ɔltin, ɛn na Jizɔs Krays, Gɔd go mek gi una ɔl wetin una fɔ gɛt.

²⁰ Wi fɔ prez ɛn ɔna wi Gɔd we na wi Papa sote go! Emɛn.

Pɔl Tɛl Gɔd In Pipul dɛn na Filipay Adu

²¹ A tɛl Gɔd in pipul dɛn we gɛt wanwɔd wit Jizɔs Krays, adu. Ɔl di Kristiɛn brɔda dɛn we de wit mi, de tɛl una adu.

²² Ɔl dɛn ɔda Kristiɛn dɛn na ya, pati kla dɛn pipul we de wok na di big Roman Kiŋ in os, tɛl una adu.

²³ Mek Masta Jizɔs Krays sho una ɔl aw i gud ɔltɛm.