Faylimɔn 1 - Krio Fɔs Oli Baybul

¹ Mi, Pɔl, we de na jel fɔseka Jizɔs Krays, mi ɛn wi brɔda Timoti, de rayt yu, Faylimɔn, wi Kristiɛn brɔda we de ɛp wi pan di wok.

² Dis lɛta ya na fɔ Apfia insɛf we na wi Kristiɛn sista, ɛn Akipɔs we de wok traŋa wan fɔ Krays pan ɔl we pipul de fɛt am, ɛn fɔ dɛn Kristiɛn pipul we de mit na una os.

³ A de pre mek Gɔd we na wi Papa ɛn Masta Jizɔs Krays sho una aw i gud ɛn gi una kol at.

Aw Faylimɔn Bin Lɛk Krays ɛn Biliv Am

⁴ Faylimɔn, ɔltɛm we a de pre, a de tɛl Gɔd tɛnki fɔ yu we na mi Kristiɛn brɔda,

⁵ bikɔs a yɛri se yu lɛk Gɔd in pipul dɛn ɛn yu abop pan Masta Jizɔs.

⁶ A de pre mek di abop we una abop pan Jizɔs ɛp ɔda pipul fɔ sabi mɔ ɛn mɔ bɔt di blɛsin we Gɔd de gi wi we wi gɛt wanwɔd wit Krays.

⁷ Mi brɔda, a kin gladi bad ɛn a kin tek kɔrej wɛn a yɛri aw yu lɛk Gɔd in pipul dɛn, bikɔs yu dɔn mek ɔl Gɔd in pipul dɛn at gladi.

Pɔl Beg fɔ Onɛsimɔs

⁸ We mi na yu Kristiɛn brɔda, a gɛt di pawa fɔ tɛl yu wetin yu fɔ du,

⁹ bɔt bikɔs a lɛk yu, a nɔ de du dat, a jɛs de beg yu nɔmɔ, pan ɔl we a de wok fɔ Jizɔs Krays ɛn naw sɛf a de na jel fɔseka di wok we a bin du fɔ am.

¹⁰ A de beg yu fɔ Onɛsimɔs we Gɔd dɔn mek bi mi pikin. I bi mi pikin frɔm di tɛm we dɛn put mi na jel.

¹¹ Onɛsimɔs nɔ bin de ɛp yu fɔs tɛm, bɔt naw i de ɛp wi ɔl tu.

¹² So a de sɛn am go bak to yu, ɛn i go kam lɛkɛ se na misɛf de kam to yu.

¹³ A bin fɔ lɛk mek Onɛsimɔs de wit mi na ya, naw we a de na jel fɔseka di Gud Nyuz, so dat i kin ɛp mi naw we yu nɔ de wit mi so.

¹⁴ Bɔt a nɔ go kip am wit mi na ya if yu nɔ gri. Na dat mek a de sɛn am go bak to yu, mek i nɔ bi se na fos a de fos fɔ mek i ɛp mi na ya, pas yu gri fɔ mek i du dat.

¹⁵ Sɔntɛm Onɛsimɔs bin lɛf yu fɔ sɔm tɛm so dat wɛn i go bak to yu, i nɔ go lɛf yu igen.

¹⁶ I nɔ de kam bak to yu lɛkɛ slev nɔmɔ, i dɔn pas dat naw. I de kam naw lɛkɛ yu Kristiɛn brɔda fɔseka wi Masta. A lɛk am bad, bɔt yu go lɛk am pas mi naw we i de wok fɔ yu ɛn pantap dat, na yu Kristiɛn brɔda.

¹⁷ If yu tek mi lɛkɛ yu kɔmpin wokman, yu go ol Onɛsimɔs lɛkɛ aw yu bin fɔ ol mi.

¹⁸ If i bin dɔn du yu bad ɔ if i bin gɛt fɔ pe yu, mek a pe fɔ am.

¹⁹ A de sayn na ya wit mi yon an: Mi, Pɔl, go pe yu ɛnitin we Onɛsimɔs gɛt fɔ pe yu. (A nɔ go tɔk bɔt di dɛt we yu gɛt fɔ pe mi, da dɛt de na yu layf.)

²⁰ A de beg yu, mi brɔda, duya, du dis fɔ mi fɔseka wi Masta. Mi na yu Kristiɛn brɔda, duya, mek mi at gladi.

²¹ Lɛkɛ aw a de rayt yu so, a biliv se yu go du wetin a dɔn beg yu fɔ du, ɛn a biliv se yu go du pas wetin a dɔn beg yu fɔ du sɛf.

²² Wan ɔda tin, a want fɔ mek yu rɛdi ples fɔ mi. A op se Gɔd go ansa di pre we una ɔl de pre ɛn pul mi insay dis jel fɔ mek a go mit una bak.

Di Las Adu

²³ Ɛpafras, we wi ɔl tu de jel fɔseka Jizɔs Krays, tɛl una adu.

²⁴ Mak, Aristakɔs, Dimas ɛn Lukas we wi ɔl de wok togɛda dɛnsɛf tɛl una adu.

²⁵ A de pre mek di Masta Jizɔs Krays sho una aw i gud.