Ozie 9 - Krio Fɔs Oli Baybul

Ozie Tɛl Di Izrɛlayt Bɔt PAPA GƆD In Pɔnishmɛnt

¹ Ozie tɛl di Izrɛlayt dɛn se dɛn nɔ fɔ gladi lɛk di ɔda pipul; i se dɛn dɔn mek dɛnsɛf lɛk rare gyal we dɛn lɛf dɛn yon PAPA GƆD go fala ɔda gɔd dɛn. I se dɛn ivin dɔn biev lɛk aw rare gyal kin biev we dɛn aya am ɛn gladi fɔ de pas ɔlɔbɔt na di os we dɛn de mil fɔ gɛt wetin dɛn go it.

² I se di tin dɛn we dɛn de mil ɛn di greps sɛf we dɛn de tek mek wayn nɔ go du fɔ fid dɛn. I se dɛn go disapɔynt.

³ I se dɛn nɔ go lɛf na PAPA GƆD in land we ɔltin de, bɔt Ifrem go go bak na Ijipt ɛn we dɛn de na Asiria, dɛn go it it we nɔ klin na PAPA GƆD in yay.

⁴ Dɛn nɔ fɔ tamisilɛ wit rɔm to PAPA GƆD ɛn nɔ go gladi wit dɛn sakrifays. Dɛn it go tan lɛk it we dɛn pul fɔ dayman; ɛnibɔdi we it am nɔ go klin na PAPA GƆD in yay; bikɔs na dɛnsɛf nɔmɔ go it dɛn it; dɛn nɔ fɔ kɛr am go na PAPA GƆD in os.

⁵ I aks dɛn wetin dɛn go du tɛm we PAPA GƆD se dɛn fɔ mek gladi-gladi.

⁶ If dɛn go na Asiria, Ijipt go fala dɛn go gɛda dɛn de dɔn dɛn go bɛr dɛn na Mɛmfis. Da tɛm de na soso chukchuk go de pan dɛn silva ɛn insay dɛn tɛnt dɛn.

⁷ Izrɛl go no fɔ tru tru se di tɛm dɔn rich we dɛn fɔ pe fɔ ɔl wetin dɛn dɔn du. Dɛn mek PAPA GƆD in prɔfɛt dɛn ful ɛn dɛn ɔda man dɛn we de nia PAPA GƆD, dɛn mek dɛn fiba fulman bikɔs di pipul pasmak pan dɛn sin.

⁸ Di prɔfɛt na wachman fɔ PAPA GƆD in Ifrem pipul bɔt pan ɔl dat, dɛn nɔ tek am mek natin, dɛn ivin de mɔna am na PAPA GƆD in os.

⁹ I se dɛn so dɔn du bad i tan lɛk aw di pipul na Gibia bin biev. I se PAPA GƆD go mɛmba di sin we dɛn de sin ɛn i go pɔnish dɛn fɔ dat.

Wetin Izrɛl Pas Fɔ Di Sin We Dɛn Sin

¹⁰ PAPA GƆD se lɛk aw greps go gro na di ɛmti land we pɔsin nɔ go ebul tap, na so Izrɛl bin tan we i fɛn am. Ɛn lɛk aw di fɔs frut na fig tik kin rɔtin di fɔs tɛm we i bɔn, na so i bin si dɛn fɔstɛm-papa dɛn. Bɔt na so dɛnsɛf bin go na Mawnt Peɔ, go nɔnsɛns dɛnsɛf ɛn gi dɛnsɛf to Beal we mek PAPA GƆD et dɛn bad bad wan

¹¹ I se di glori ɛn aje we Ifrem gɛt go flay go lɛk bɔd ɛn dɛn nɔ go bɔn pikin igen, dɛn nɔ go gɛt bɛlɛ igen ɛn sɛf dɛn nɔ go ɛva tek in.

¹² PAPA GƆD se ivin di pikin dɛn we dɛn gɛt go day. Nɔn nɔ go lɛf. I se dɛn go did alaki we i lɛf dɛn to dɛnsɛf.

¹³ I se in dɔn si se ɔl Ifrem in bɔypikin dɛn go day wan bay wan. I se na Ifrem de fɛn dɛn day fɔ dɛnsɛf.

¹⁴ I aks PAPA GƆD fɔ gi dɛn wetin in wan gi dɛn. Lɛ PAPA GƆD mek dɛn bɛlɛ wes ɛn lɛ ɔl dɛn bɔbi dray.

Aw PAPA GƆD Jɔj Izrɛl

¹⁵ PAPA GƆD se we dɛn bin de Gilgal, na de dɛn bigin du bad so na frɔm da tɛm de dɛn dɔn mek i et dɛn biznɛs. I se bikɔs ɔf di bad we dɛn de du, in go drɛb dɛn kɔmɔt nain os. I se in nɔ go lɛk dɛn igen ɛn dɛn pikin dɛn ɔl de mek rebɛl pan am.

¹⁶ I se ɔltin dɔn dɔn fɔ Ifrem. Dɛn nɔ go ebul fɔ bia frut igen Ivin if dɛn bɔn pikin, PAPA GƆD se i go kil ɔl di pikin dɛn.

Ozie Tɔk Bɔt Izrɛl

¹⁷ Ozie se in PAPA GƆD go lɛf di pipul to dɛnsɛf bikɔs dɛn nɔ de yɛri in wɔd; I se na so dɛn go de ɔlɔbɔt de wɔndrin midul di ɔda neshɔn dɛn.