Ozie 8 - Krio Fɔs Oli Baybul

PAPA GƆD Se Na Bad Tin Fɔ Wɔship Ɔda PAPA GƆD Dɛn

¹ PAPA GƆD se fɔ ala lawd lawd wan mek ɔlman yɛri se bikɔs di pipul dɔn brok PAPA GƆD in Kɔvinant ɛn in lɔ dɛn, di ɛnimi dɛn we de pas lɛk yuba de ɔlsay na PAPA GƆD in os.

² Naw dɛn de ala se dɛn no PAPA GƆD.

³ Dɛn dɔn lɛf fɔ du wetin gud so a go mek di ɛnimi dɛn rɔnata dɛn.

⁴ PAPA GƆD se dɛn nɔ de aks am we dɛn wan krawn dɛn kiŋ ɛn ivin we dɛn de pik dɛn bigman dɛn, in nɔ de no sɛf. Dɛn tek dɛn silva ɛn dɛn gold, mek ɔda gɔd dɛn ɛn fɛn dɛn yon waala.

⁵ I se in nɔ want di kaw pikin we dɛn mek na Sameria. Dat go mek i de vɛks mɔ ɛn mɔ. I aks se if Izrɛl go jɛs de pan da kayn layf de nɔmɔ.

⁶ Na mɔtalman yuz skil fɔ mek am. Noto gɔd so dɛn go nyamanyama da kaw pikin de na Sameria.

⁷ We dɛn du smɔl bad, na big wande mit dɛn. Rɛs ed we tinap nɔ gɛt ed, so i nɔ go pul natin fɔ it; if i bin gɛt sɛf, na fɔrina dɛn go it am.

⁸ I se ɔltin dɔn dɔn fɔ Izrɛl, naw dɛn jɛs fiba nɔnɛntiti to di ɔda neshɔn dɛn.

⁹ Dɛn dɔn go ɔp Asiria, lɛk wayl dɔŋki we in wande waka we ɛnitin kin mit am; Ifrem, in gɛt pipul we i pe fɔ lɛk am.

¹⁰ Ɔl we dɛn aya pipul na di ɔda neshɔn dɛn fɔ fɛt fɔ dɛn, a go nyakanyaka dɛn. Da tɛm de dɛn go blo fɔs fɔ de krawn kiŋ dɛn ɛn pik ɔda bigman dɛn.

¹¹ Bikɔs Izrɛl kin sin we dɛn de mek sakrifays, aw dɛn de mek mɔ ɔlta, na so dɛn de sin mɔ.

¹² I se ivin if i mek tɛn tawzin lɔ bɔt di sin we dɛn de sin, dɛn nɔ go bisin sɛf. I go tan lɛk na strenj tin to dɛn.

¹³ Dɛn lɛk fɔ mek sakrifays. Dɛn kin mek sakrifays ɛn it am bak bɔt PAPA GƆD nɔ bisin bɔt dɛn sakrifays. I go mɛmba di bad we dɛn dɔn du ɛn pɔnish dɛn fɔ dat ɛn mek dɛn go bak pan di slev layf we dɛn bin yuz na Ijipt.

¹⁴ I se Izrɛl dɔn fɔgɛt PAPA GƆD we mek dɛn bɔt dɛn bil dɛn fayn os fɔ dɛn kiŋ dɛn; dɛn dɔn bil mɔ ɛn mɔ ples wit traŋa wɔl dɛn na Juda; bɔt in go mek faya kech ɛn bɔn di ples dɛn we dɛn bil ɛn pwɛl pwɛl ɔl wetin dɛn abop pan.