Ozie 7 - Krio Fɔs Oli Baybul1 I se i tan lɛk ɛnitɛm we i kin wan gi di Izrɛlayt dɛn wetin dɛn bin gɛt, dɛn kin grap bak wit dɛn kɔrɔpshɔn na Ifrem ɛn dɛn wikɛdnɛs na Sameria, dɔn dɛn kin de pan dɛn dabaru trik, dɛn kin de tif ɛn du ɔlkayn bad tin. 2 Dɛn nɔ bin fil se i de mɛmba ɔl di bad we dɛn dɔn du. Naw na soso dɛn bad i de si. Di Bagin We Dɛn Mek Insay Di Kiŋ In Os 3 Dɛn tek dɛn wikɛdnɛs fɔ ful di kiŋ dɔn in ɛn in pikin dɛn kin gladi. Dɛn ɔl na wan. 4 Dɛn jɛs de fɔ de wɔship ɔda gɔd dɛn. Dɛn tan lɛk ovin we kin dɔn wam bɔt di beka nɔ skata di faya gud, frɔm di tɛm we i de miks di flawa te di bred de rayz. 5 Wɛn di kiŋ gɛt gladi-gladi, di kiŋ in pikin dɛn kin drink te dɛn drɔnk dɔn di kiŋ in kin ivin de ple wit di man dɛn we nɔ gɛt wan rɛspɛkt fɔ am. 6 Dɛn wamat kin tan lɛkɛ ovin we nɔ kol dɔn ol nɛt dɔn na mɔnin, dɛn kin jɛs blez. 7 Na da wamat de dɛn kin mek pan di kiŋ dɛn te dɛn kil dɛn. Dɛn nɔn nɔba mɛmba se PAPA GƆD de. Izrɛl Ɛn Di Ɔda Neshɔn Dɛn 8 Izrɛl de miks wit ɔda pipul we mek dɛn tan lɛk flɔks maŋro. 9 Dɛn nɔ no sɛf se di fala we dɛn de fala fɔrina de ambɔg dɛn. Dɛn tan lɛk we pɔsin dɔn gɛt wet ia bɔt i nɔ no se in trɛnk ɔl dɔn dɔn. 10 Na di prawd we Izrɛl de mek lɛ ɔltin de kɔmɔt bad fɔ am; pan ɔl dat, dɛn nɔ tɔn bak go to PAPA GƆD we na dɛn Gɔd. 11 Di pipul na Izrɛl de biev lɛk bɔd we nɔ gɛt sɛns. Dɛn go fɔs na Ijipt fɔ mek dɛn ɛp dɛn dɔn dɛn flay go Asiria. 12 Bɔt PAPA GƆD se, as dɛn de flay ɔlɔbɔt na so i go kech dɛn nain nɛt, dɔn i go briŋ dɛn kam dɔŋ ɛn pɔnish dɛn fɔ di bad we dɛn dɔn du. 13 I se dɛn dɔn alaki bikɔs dɛn lɛf fɔ fala am. Dɛn dɔn pwɛl dɛnsɛf kpatakpata bikɔs dɛn tɔn dɛn bak pan am. I se pan ɔl we i de tray fɔ pul dɛn pan trɔbul, dɛn de lay pan am. 14 I se dɛn at nɔba de to am wɛn dɛn de pre, bifo dat dɛn kin lidɔm na dɛn bed ol nɛt de kray; we dɛn want dɛn plant dɛn fɔ gro sɛf, dɛn kin fala dɛn ɔda gɔd dɛn we fɔ wɔship ɛn kɔt kɔt dɛnsɛf fɔ gɛt dɛn. 15 Pan ɔl we na PAPA GƆD mek dɛn gɛt trɛnk ɛn mek dɛn bi wetin dɛn bi, dɛn stil de plan bad fɔ PAPA GƆD. 16 Dɛn tɔn fɔ wɔship Beal ɛn nɔ bisin bɔt wetin dɛn de du jɛs lɛk aw bo we de shut aro nɔba bisin bɔt usay i fɔdɔm; dɛn kiŋ pikin dɛn ɔl de day na wa bikɔs dɛn nɔ sabi tɔk, dɔn di Ijipshian dɛn go laf dɛn. |
Krio Bible © The Bible Society of Sierra Leone, 2013.
Bible Society in Sierra Leone