Ozie 5 - Krio Fɔs Oli Baybul

¹ I tɔk to di man dɛn we de mek sakrifays fɔ pipul sin. I se mek dɛn lisin to wetin i pipul na Izrɛl de se as bay rayt na dɛn fɔ no ɛn du wetin rayt. I se na dɛn dɔn blɔk we fɔ ɔda pipul we dɛn bin de wɔship dɛn ɔda gɔd dɛn na Mizpa ɛn Tabɔ.

² I se dɛn dig ol fɔ dɛn na Shitim ɛn na ɔlman i go blem.

³ I se in no Ifrem so dɛn nɔn na Izrɛl nɔ gɛt fɔ ayd pan am; fɔ naw i se Ifrem dɔn mek insɛf lɛk rare gyal ɛn dɛn ɔl na Izrɛl dɔn dɔti dɛnsɛf.

Ozie Wɔn Di Pipul Fɔ We Dɛn De Wɔship Ɔda PAPA GƆD Dɛn

⁴ Aw di pipul de liv nɔ de gi dɛn chans fɔ tɔn bak to PAPA GƆD. Di we we dɛn dɔn yus fɔ wɔship ɔda gɔd dɛn so de insay dɛn dat dɛn nɔ bisin bɔt PAPA GƆD igen

⁵ Na di mek we Izrɛl de mek lɛ dɛn tan so; na so Ifrem go bɔk in fut ɛn Juda insɛf go jɔyn dɛn.

⁶ Dɛn go tek dɛn animal dɛn se dɛn de go mek sakrifays to PAPA GƆD bɔt dɛn nɔ go fɛn am bikɔs i dɔn lɛf dɛn to dɛnsɛf.

⁷ Dɛn nɔ biev fayn fɔ lɛf PAPA GƆD bikɔs dɛn ivin go bɔn pikin dɛn we nɔto in yon. Bɛtɛ nɔ go fala dɛn ɛn ɔl wetin dɛn plant sɛf go pwɛl.

Izrɛl Ɛn Juda Fɛt wa

⁸ Una blo di ɔn na Gibia ɛn blast di trɔmpɛt na Rama, Sawnd di alam na Bɛthavɛn; una mach, go bigin di fɛt, pipul we de na Bɛnjamin.

⁹ We di tɛm rich fɔ PAPA GƆD fɔ pɔnish una, Ifrem nɔ go fayn fɔ luk bikɔs a go dɔn nyamanyama dɛn. Ɛn ɔl di fambul dɛn na Izrɛl go no bɔt dat.

¹⁰ Di bigman dɛn na Juda, dɛn ɔl tan lɛkɛ tifman bikɔs dɛn dɔn pul di mak na di bawndri, so dɛn go fil di vɛks we a vɛks lɛkɛ we yu de tɔn wata pan pɔsin.

¹¹ Ifrem de fil bad bikɔs ɔf mi jɔjmɛnt sins i bin dɔn mekɔp in maynd fɔ lɛf mi go wɔship ɔda gɔd dɛn.

¹² Dat mek a tan lɛk bɔgbɔg to Ifrem ɛn to Juda bikɔs a de it dɛn lɛk aw bɔgbɔg de it bod.

¹³ Wɛn Ifrem si se i sik dɔn Juda si di wund we i gɛt, Ifrem go to di kiŋ na Asiria, we i tink se na wɔndaful kiŋ, bɔt i nɔ ebul fɔ mɛn dɛn.

¹⁴ A go tan lɛk layɔn we nyamanyama it we i kech na Ifrem bɔt biev lɛk yɔŋ layɔn to Juda ɛn nɔ pwɛl am bɛtɛ. A nɔ go pwɛl dɛn nɔmɔ, a go tek dɛn go usay a wan go; dɛn go de wit mi ɛn nɔbɔdi nɔ go ebul pul dɛn na mi an.

¹⁵ A go kam bak na ya sote dɛn ebul fɔ gri se dɛn dɔn sin ɛn lɛf fɔ du bad ɛn kam bak to mi wɛn tin dɔn mɔna dɛn na da tɛm de dɛn go want fɔ kam bak.