Ozie 4 - Krio Fɔs Oli Baybul

Wetin Izrɛl du we PAPA GƆD Nɔ Lɛk

¹ Izrɛlayt dɛn, opin una yes ɛn yɛri wetin PAPA GƆD se, bikɔs PAPA GƆD gɛt siriɔs kɔmplen bɔt wetin di Izrɛlayt dɛn de du we i nɔ lɛk. Pipul jɛs de biev adɔnkiadam. Dɛn de wɔship ɔda gɔd dɛn ɛn nɔ bisin fɔ no am na di land;

² dɛn de swɛ, dɛn de lay, dɛn de kil, dɛn de tif ɛn dɛn de kip dɛnsɛf gbay.

³ Dat mek di land de kray, ɛn ɔl udat tap de, de pan mɔnɛ, wit dɛn wayl animal na bush, dɛn bɔd we de flay ɛn ivin dɛn fish na wata, ɔl go day.

PAPA GƆD Blem Dɛn Man We De Mek Sakrifays Fɔ Pipul Sin.

⁴ Lɛ nɔbɔdi nɔ pɔynt fiŋa pan in kɔmpin bikɔs na di man dɛn we de mek sakrifays fɔ pipul sin i de blem.

⁵ I se de tɛm, dɛn go bɔk dɛn fut. Na nɛt, dɛn ɛn di prɔfɛt dɛn go bɔk dɛn fut ɛn in go dɔnawe wit Izrɛl we na dɛn mama.

⁶ Na bikɔs di pipul nɔ no in we na dat mek PAPA GƆD mek dɛn de sɔfa so. I se dɛn dɔn tɔn dɛn bak pan am so insɛf dɔn lɛf di man dɛn we de mek sakrifays fɔ pipul sin to dɛnsɛf. Ɛn bikɔs dɛn nɔ bisin bɔt PAPA GƆD in lɔ dɛn, insɛf nɔ bisin bɔt dɛn.

⁷ I se aw dɛn de bɔku, na so dɛn de du tin we i nɔ lɛk. I se in go mek dɛn gres tɔn to gras.

⁸ I se na di sakrifays we di pipul we sin de ɔfa dɛn liv bay; so dɛn jɛs want dɛn fɔ de sin.

⁹ Da tɛm de di pipul ɛn dɛn man we de mek sakrifays fɔ dɛn sin go fiba dɛnsɛf bikɔs dɛn ɔl gridi. I se in go pɔnish dɛn fɔ wetin dɛn de du ɛn pe dɛn fɔ wetin dɛn wok fɔ.

¹⁰ I se dɛn go it bɔt dɛn nɔ go ɛva satisfay wit wetin dɛn gɛt, dɛn go wɔship ɔda gɔd dɛn bɔt natin nɔ go kɔmɔt biɛn dat; bikɔs dɛn lɛf PAPA GƆD, we na dɛn Gɔd fɔ wɔship ɔda gɔd dɛn.

PAPA GƆD Se Na Bad Tin Fɔ Wɔship Ɔda Gɔd Dɛn

¹¹ I se ɛni kaynaba wayn de mek pipul lɔs dɛn sɛns.

¹² I se in pipul go aks tik bɔt tin we dɛn wan no, ɛn fil se waka tik fɔ tɛl dɛn wetin fɔ du. Na waka waka spirit dɔn pul dɛn kɔmɔt to PAPA GƆD ɛn dɛn lɛf dɛn Gɔd go wɔship dɛn ɔda gɔd dɛn.

¹³ Na ɔp di mawnten dɛn de go mek dɛn sakrifays ɛn na pantap di il, dɛn kin bɔn ɔlkayn insɛns. Dɛn go ivin du wetin dɛn wan du ɔnda di kɔtin tri ɛn ɔda big big tik dɛn, bikɔs dɛn de gi gud shed. I se na dat ɔl mek dɛn yɔŋ gyal dɛn de mek lɛk rare gyal ɛn dɛn mared uman dɛn de lɛf dɛn man dɛn na os, go kip ɔda man.

¹⁴ I se in nɔ go pɔnish di yɔŋ gyal dɛn fɔ we dɛn de biev lɛk rare gyal ɛn di mared uman dɛn fɔ we dɛn de lɛf dɛn man dɛn na os, go kip ɔda man dɛn; bikɔs di man dɛnsɛf de biɛn di rare gyal dɛn, ɛn dɛn de fala di rare gyal dɛn ɛn di ple bɔy dɛn we kin de na di ɔda gɔd dɛn os; ɛn ɛnibɔdi we nɔ ɔndastand wetin de apin, de pwɛl insɛf.

¹⁵ I tɛl Izrɛl se pan ɔl we dɛn de biev lɛk rare gyal, dɛn nɔ fɔ miks di pipul na Juda pan wetin dɛn de du. I se di pipul na Juda nɔ fɔ fala dɛn go na Gilgal ɔ Bɛthavɛn ɛn ivin swɛ to PAPA GƆD.

¹⁶ I se lɛk aw yɔŋ uman kaw kin traŋayes na so Izrɛl traŋayes; na so PAPA GƆD nɔ go ebul fɔ gi dɛn wetin dɛn want ivin if dɛn de usay gras bɔku.

¹⁷ I se fɔ lɛf Ifrem bikɔs i de ɛnjɔy we i de wɔship ɔda gɔd dɛn.

¹⁸ We dɛn dɔn drɔnk, dɛn lɛk fɔ de biɛn dɛn rare gyal. Dɛn de ɛnjɔy da layf de pas di wan we go mek dɛn gɛt rɛspɛkt.

¹⁹ I se na so dɛn go alaki lɛk na big briz blo kɛr dɛn go ɛn dɛn go shem fɔ wetin dɛn de du.