Ozie 2 - Krio Fɔs Oli Baybul

¹ So kɔl yu kɔmpin Izrɛlayt dɛn “Mi pɔsin,” ɛn di uman dɛn, kɔl dɛn “A go sɔri fɔ am.”

Goma Na Raregyal - Izrɛl Insɛf De Biev Lɛk Raregyal

² “Beg una mama fɔ mi duya bikɔs in nɔto mi wɛf, ɛn mi nɔto in man– mek i lɛf fɔ rare, ɛn fɔgɛt bɔt di man dɛn we i dɔn kip.

³ Ɔ nɔ so a go trip am nekɛd lɛ ɔlman si am aw in mami bɔn am, so dat nɔn man nɔ go want am we i si am, ɛn a go mek i tan lɛk land we wata nɔ de, ɛn day wit tɔsti.

⁴ A nɔ go sɔri fɔ di pikin dɛn bikɔs na pan di rare wok i bɔn dɛn.

⁵ Dɛn mama na bin rare gyal ɛn na wit da kayn shem de i bɔn dɛn. I se in go fala di man dɛn na we de gi mi it, klos, linin, pafyum ɛn rɔm.

⁶ So naw, a go de wach am, a go lɔk am na os ɛn put babwaya na di fɛnch, so dat i nɔ go ebul kɔmɔt na do.

⁷ I go rɔnata in man dɛn bɔt i nɔ go kech dɛn ɛn i go de luk fɔ dɛn bɔt i nɔ go fɛn dɛn. Na da tɛm de i go se mek i go bak to in maredman bikɔs i bin bɛtɛ fɔ am wɛn dɛn tu de, pas wɛn i de paspas.

⁸ I nɔ bin no se na mi bin de gi am it, drink ɛn pafyum ɛn na mi bin de gi am silva ɔl di gold we dɛn bin de yuz fɔ wɔship Beal.

⁹ Di tɛm de kam we a nɔ go gi am it igen a nɔ go gi am rɔm igen, ɛn a go tek di linin ɛn di pafyum sɛf we i de yuz fɔ kɔba in kanda.

¹⁰ Na naw a go trip am nekɛd frɔnt in man dɛn we i bin de kip ɛn nɔbɔdi nɔ go ebul pul am na mi an

¹¹ Na so a go tek tɛm tap ɔl in ladida we i kin mek fɔ di ful mun fɛstival dɛn, di sɛvin de we na fɔ pre ɛn blo ɛn ɔl dɛn ɔda ɔlide dɛn.

¹² A go pwɛl pwɛl in greps tik dɛn ɛn ivin di fig tik we dɔn bia we na dat kin mek i se, na di tɛnki dat we in man dɛn gi am. I se in go tɔn dɛn to bush, ɛn dɛn wayl animal dɛn go pwɛl dɛn.

¹³ A go mek i sɔfa fɔ dɛn tɛm we i de mek gladi-gladi fɔ Beal we kin mek i bɔn insɛns to am ɛn drɛs wit riŋ ɛn ɔda aŋins ɛn shekins, go mit in man dɛn ɛn fɔgɛt bɔt mi. Na so PAPA GƆD se.

Di Lɛk We PAPA GƆD Lɛk In Pipul

¹⁴ So a go ful in yay wit tinks dɛn ɛn briŋ am kam na di ɛmti land we pipul nɔ go ebul tap, ɛn koks am wit swit swit tɔk.

¹⁵ Na de a go gi am greps gadin dɛn, n a go mek di Trɔbul Vali, we kin gɛt ɔlkayn trɔbul, ples we pɔsin go pas we i abop. Na de i go ansa mi lɛk aw i bin du we in na bin yɔŋgyal, di tɛm we i bin jɛs kɔmɔt Ijipt.

¹⁶ PAPA GƆD se na da de de i go kɔl am in man ɛn i nɔ go yuz di nem we i kin yuz fɔ kɔl Beal, fɔ kɔl am igen

¹⁷ A go pul ɔl di nem dɛn we i bin de kɔl Beal kɔmɔt nain mɔt ɛn i nɔ go kɔl dɛn nem de igen

¹⁸ I se da tɛm de in ɛn ɔl dɛn wayl animal na bush, dɛn bɔd we de flay ɛn dɛn tin sɛf we kin de krip na grɔn go tay bagin ɛn in go mek natin nɔ tɔch am wɛda na bo ɛn aro, ɔ sɔd ɛn if wa fɔdɔm na di kɔntri, so we go lidɔm, natin nɔ go mek i fred.

¹⁹ I se in go mek Izrɛl in wɛf sote go; A go sho am wetin tret ɛn fia wetin tru lɔv min ɛn ɛn wit sɔri at.

²⁰ A go waka tret wit yu insay di mared am, dɔn yu go biliv se in na PAPA GƆD.

²¹ PAPA GƆD se na da sem de de in go ansa di pipul dɛn prea na ɛvin dɔn dɛn go gɛt wetin dɛn bin de pre fɔ.

²² Ren go fɔdɔm, plant dɛn go gro ɛn bia bɔku tin fɔ it dɔn dɛn go gɛt wayn fɔ drink ɛn ɔyl fɔ dɛn bɔdi ɛn wɔd fɔ ansa di pipul na Jɛzril.

²³ A go sho am wetin i min fɔ mek a lɛk di land. A go sɔri fɔ “a nɔ de sɔri fɔ am”; ɛn lɛ “nɔto mi pɔsin” no se in na mi pɔsin, dɔn insɛf go se, “Yu na mi Gɔd.”