Ozie 14 - Krio Fɔs Oli Baybul

Ozie Beg Izrɛl

¹ Izrɛl, una kam bak to PAPA GƆD una Gɔd bikɔs una dɔn fɔm we una sin.

² Una pre to am ɛn kam bak to PAPA GƆD. Una tɛl am ɔl wetin una dɔn du ɛn beg am fɔ sɔri fɔ una ɛn ansa una prea dɔn una go prez am.

³ Tɛl am se Asiria nɔ ebul pul una pan trɔbul ɛn una nɔ go sidɔm pantap ɔs de blɔf igen Una nɔ go kɔl tin dɛn we una tek an mek, PAPA GƆD. Tɛl am se una no se nain de sɔri fɔ udat nɔ gɛt papa.

PAPA GƆD Prɔmis Se I Go Gi Nyu Layf To Izrɛl

⁴ PAPA GƆD se, In go mek di pipul dɛn biliv am; in go lɛk dɛn wit ɔl in at, bikɔs i nɔ vɛks pan dɛn igen

⁵ I se in go tan lɛk dyu to di pipul we go mek dɛn de frɛsh ɛn prɛd lɛk ren sizin bɔlɔgi. Dɛn rut go tan lɛk kɔtintri.

⁶ I go gɛt bɔku branch we go fayn fɔ luk so. I go pul fayn sɛnt lɛk wayn we dɛn mek na Libanɔn.

⁷ I se di pipul go go bak to am dɛn in go mek dɛn frɛsh lɛk gadin; dɛn go bɔn bɔku pikin, ɛn go de pul fayn sɛnt lɛk di wayn na Libanɔn.

⁸ I aks Ifrem se wetin i gɛt fɔ du wit dɛn ɔda gɔd dɛn we dɛn de mek. I mɛmba dɛn se nain na di wan we de ansa dɛn prea ɛn luk afta dɛn. I se in tan lɛk tik we grin ɔltɛm so i kin bia frut ɔltɛm so dɛn fɔ abop pan am fɔ frut.

Fɔ Dɔn

⁹ Udat gɛt sɛns fɔ ɔndastand dɛn tin ya; udat ebul fɔ no wetin i min, lɛ i no; bikɔs PAPA GƆD de du wetin rayt ɛn pipul dɛn we rɛspɛkt PAPA GƆD de du wetin i se bɔt udat nɔ du wetin i se go ambɔg.