Ozie 13 - Krio Fɔs Oli Baybul

Di Las Pɔnishmɛnt Fɔ Izrɛl

¹ Wɛn Ifrem kin tɔk man dɛn kin trimbul. Ɔlman na Izrɛl bin rɛspɛkt am so dɛn bin de tɔk in gud nem; bɔt we i bin de wɔship Beal, i fɛn bad nem fɔ insɛf we mek i lɔs in rɛspɛkt.

² Naw dɛn sin dɔn pasmak. Dɛn de mek mɔ tin dɛn fɔ wɔship. Dɛn de yuz dɛn silva dɛn fɔ mek dɛn fayn. Dɔn dɛn se na to dɛn dɛn fɔ mek sakrifays. Mɔtalman dɛn tɔn fɔ de kis di kaw-pikin dɛn we dɛn mek.

³ So dɛn go tan lɛk aw daknɛs kin lɔs ɔ dyu we fɔdɔm kin dray we do klin. Lɛk aw briz kin kɛr chaf chaf go we dɛn de fana ɔ smok kin lɔs afta i pas na winda.

⁴ PAPA GƆD se nain na PAPA GƆD dɛn Gɔd frɔm di tɛm we dɛn de na Ijipt; I tɛl dɛn se nain nɔmɔ dɛn no bikɔs nain wan ebul pul dɛn pan trɔbul.

⁵ I mɛmba dɛn se we dɛn bin de na di ɛmti land we pɔsin nɔ go ebul tap, nain bin de kia fɔ dɛn usay bay rayt wata nɔ de;

⁶ bɔt wɛn dɛn rich usay dɛn kin it ɛn drink ɛn bɛlful aw dɛn want, dɔn dɛn at layt, dɛn fɔgɛt bɔt PAPA GƆD.

⁷ So insɛf go tan lɛk layɔn ɔ lɛpɛt pan dɛn we go de taym dɛn fɔ kech dɛn.

⁸ I se in go biev to dɛn lɛk aw bia we dɛn tif in pikin dɛn kin biev, i go jomp pan dɛn ɛn nyamanyama dɛn lɛk aw layɔn ɔ ɔda wayl animal go nyamanyama bif we i kech.

⁹ I se in go dɔnawe wit Izrɛl ɛn nɔbɔdi nɔ go ebul ɛp dɛn.

¹⁰ I aks dɛn usay di kiŋ ɔ dɛn ɔda aristo de we dɛn bin ala se dɛn want.

¹¹ I se in bin vɛks bɔt in gi dɛn di kiŋ dɛn dɔn we i wan fɔ pɔnish dɛn, i mek dɛn nɔ gɛt kiŋ igen

¹² I se in dɔn kip Ifrem in sin na bank.

¹³ I de biev lɛk fulman. In mama de fil pen fɔ bɔn bɔt i nɔ de gri kɔmɔt na do.

¹⁴ I se in nɔ go ebul fɔ mek dɛn nɔ day. In nɔ go tap day fɔ tek dɛn go, so day kin mek dɛn sik ɛn day. Day kin pwɛl dɛn kpatakpata ɛn in nɔ go sɔri fɔ dɛnsɛf.

¹⁵ I se pan ɔl we nain go kɔmɔt fayn pan ɔl in brɔda dɛn, PAPA GƆD go mek briz kɔmɔt Ist na di ɛmti land we pɔsin nɔ go ebul tap ɛn di briz go dray ɔl dɛn de gɛda wata ɛn dɛn ol we wata kin bɔs, i go ivin mek ɔl wetin i bin dɔn gɛda dɔn.

¹⁶ Sameria go bia wetin gɛt fɔ mit am bikɔs i mek rebɛl pan in PAPA GƆD; dɛn ɔl go day na wa, dɛn go bit di lili pikin dɛn te dɛn day ɛn plit di bɛlɛuman dɛn bɛlɛ opin.