Ozie 12 - Krio Fɔs Oli Baybul

¹ Ifrem in jɛs de wes in tɛm ol de. Na soso lay ɛn fɔls layf i de pan. Dɛn dɔn mek bagin wit Asiria ɛn dɛn de tredin wit Ijipt.

² PAPA GƆD dɔn pas jɔjmɛnt pan Juda, ɛn i go pɔnish Jekɔb in pipul fɔ wetin dɛn du ɛn na so dɛn go gɛt dɛn pe.

³ Wɛn Jekɔb bin de nain mama in bɛlɛ, nain brɔda i bin de fɛt, dɔn we i big, i fɛt wit PAPA GƆD.

⁴ I rasul wit enjɛl ɛn win am. I kray ɛn beg di enjɛl fɔ blɛs am. I mit PAPA GƆD na Bɛthɛl ɛn dɛn tu tɔk.

⁵ PAPA GƆD we na Ɔlmayti Gɔd, we in pawa pas ɔl, nain nem PAPA GƆD.

⁶ Naw, i want dɛn fɔ kam bak to PAPA GƆD. Lɛ dɛn tek in wɔd fɔ lɛk dɛnsɛf, trit dɛn kɔmpin fayn ɛn jɛs de du wetin PAPA GƆD want.

Ɔda Tin Dɛn We PAPA GƆD Se I Go Du

⁷ PAPA GƆD se, biznɛsman we de rog de ɛnjɔy we i de pas am pan pipul.

⁸ Ifrem in de blɔf se dat dɔn mek i jɛntri bɔt ɔl wetin i dɔn gɛda fɔ insɛf nɔ du fɔ pe fɔ di bad nem we i dɔn gɛt.

⁹ I se in na PAPA GƆD dɛn Gɔd frɔm di tɛm we dɛn de na Ejipt. So in kin stil mek lɛ dɛn tap na dɛn bafa dɛn, tɛm dɛn we dɛn gɛt gladi-gladi.

¹⁰ I mɛmba dɛn se nain bin de tɔk to di prɔfɛt dɛn; i bin lɛ dɛn de gɛt bɔku vishɔn ɛn kin gi dɛn parebul fɔ di pipul.

¹¹ I se if di pipul na Giliad de pan sin, dɛn go pe dia wan fɔ dat; if dɛn de mek sakrifays to ɔda gɔd dɛn na Giliad, i se, i go nyamanyama dɛn ɔlta dɛn we de na dɛn fil dɛn we dɛn dɔn mek fayn.

¹² Ozie se Jekɔb we na bin dɛn fɔstɛm-papa bin rɔnawe go na Aram usay i mɛn ship bifo dɛn gi am wɛf.

¹³ Na wan prɔfɛt PAPA GƆD yuz fɔ pul Izrɛl kɔmɔt Ijipt ɛn na prɔfɛt bak i yuz fɔ mek shɔ se dɛn de du wetin PAPA GƆD want.

¹⁴ Di pipul naw dɔn provok PAPA GƆD te i dɔn vɛks, so PAPA GƆD go jɛs lɛf dɛn to dɛnsɛf ɛn pɔnish dɛn fɔ ɔl wetin dɛn dɔn du.