Ozie 11 - Krio Fɔs Oli Baybul

PAPA GƆD stil Lɛk Di Pipul Pan Ɔl We Dɛn De Barɔf Pan Am

¹ PAPA GƆD se Frɔm we Izrɛl smɔl nain i lɛk am ɛn frɔm we dɛn de Ijipt, nain i dɔn pik am fɔ bi in yon pɔsin.

² I se, di mɔ we i de drɔ dɛn to insɛf, na di mɔ dɛn de rɔn kɔmɔt frɔm am; dɛn de fɔ de mek sakrifays to di Beal dɛn; ɛn bɔn insɛns to di gɔd dɛn we dɛn mek.

³ I se nain sem wan tich Ifrem fɔ waka. I tot am nain an lɛk bebi bɔt i nɔ bisin fɔ no if na PAPA GƆD mek i tinap so.

⁴ I bin de waka wit dɛn wit sɔri at rop, wit lɛknɛs ankɔf, ɛn na mi bin dɔn bi di pɔsin we mek di ston na dɛn jabon nɔ de at, ɛn a bin butu fɔ fid dɛn.

⁵ Bɔt as dɛn nɔ bisin bɔt am, dɛn go go bak na Ijipt ɛn dɛn kiŋ go de na Asiria.

⁶ Na soso fɛt dɛn go de pan. Dɛn go fɛt na di siti, dɛn go pwɛl di get dɛn ɛn ivin dɛn dɛn traŋa wɔl we dɛn bin bil kin pwɛl.

⁷ I se sins di pipul dɔn mekɔp fɔ lɛf am to insɛf, na dɛnsɛf dɔn pik se tin fɔ traŋa fɔ dɛn ɛn nɔbɔdi nɔ go ebul ɛp dɛm.

⁸ I tɔk se in nɔ go ebul fɔ givɔp pan Izrɛl ɛn in nɔ go lɛf Izrɛl to dɛnsɛf I se i nɔ go trit dɛn lɛk di pipul na Adma ɔ mek dɛn tan lɛk di wan dɛn na Zɛboim. In at nɔ go mek i du dat bikɔs i lɛk dɛn tumɔs.

⁹ I se i nɔ go gri lɛ i vɛks te i du wetin i nɔ go lɛk fɔ du. I nɔ go mek i vɛks pan Ifrem te i dɔnawe wit am; In na PAPA GƆD, in nɔto mɔtalman ɛn i de midul dɛn as di wan we oli, so nɔto dat i de fɔ.

¹⁰ I se in pipul go fala am we in PAPA GƆD go biev lɛk layɔn. I go mek big nɔys, dɔn in pikin dɛn go trimbul kɔmɔt na di wɛst go mit am;

¹¹ dɛn go de trimbul lɛk bɔd dɛn we flay kɔmɔt Ijipt ɛn lɛk dɔv dɛn we flay kɔmɔt Asiria. Na da tɛm de PAPA GƆD go sɛn dɛn go na dɛn os dɛn bak.

PAPA GƆD Tɔk Wetin Izrɛl Ɛn Juda De Du We Bad

¹² PAPA GƆD se Ifrem dɔn de lay pan am gbay ɛn Izrɛl in jɛs de mek am ful; bɔt Juda in de du wetin PAPA GƆD we Oli want ɛn so PAPA GƆD stil de wit dɛn.