Ozie 10 - Krio Fɔs Oli Baybul

¹ Izrɛl tan lɛk tik we de gro na gud grɔn - na so i frɛsh ɛn de bia bɔku frut. Bɔt as dɛn de bɔku, na so dɛn de bil mɔ ples fɔ wɔship Beal; as tin de bɛtɛ na di kɔntri, na so dɛn de kɔmɔt biɛn PAPA GƆD.

² Dɛn at nɔ de to PAPA GƆD, so naw dɛn fɔ pe fɔ wetin dɛn du. PAPA GƆD go pwɛl pwɛl dɛn ɔlta dɛn ɛn nyamanyama ɔl wetin dɛn bil fɔ wɔship Beal.

³ Na da tɛm de dɛn go se dɛn nɔ gɛt kiŋ as dɛn nɔ gɛt fred fɔ PAPA GƆD sɛf ɛn aks dɛnsɛf se, if dɛn gɛt kiŋ sɛf, wetin i go du fɔ dɛn.

⁴ Na ɛmti tɔk dɛn de tɔk; dɛn de swɛ fɔ natin se dɛn de mek wanwɔd; so jɔjmɛnt go bɔs pan dɛn lɛk gras we gɛt pɔyzin na di rod dɛn we divayd plant na fam..

⁵ Di pipul na Sameria go fred we dɛn si di kaw-pikin dɛn we dɛn mek na Bɛthavɛn. Di pipul go fil am lɛk se dɛn gɛt bɛrin ɛn dɛn man dɛn we de mek sakrifays to Beal sɛf go fil am we PAPA GƆD dɔn pul di tin we dɛn de blɔf fɔ kɔmɔt to dɛn.

⁶ Dɛn go tek di lay lay gɔd insɛf go Asiria as prɛzɛnt fɔ di kiŋ. Di pipul na Ifrem ɛn Izrɛl go shem so fɔ we dɛn de fala ɔda gɔd dɛn.

⁷ Sameria dɛn kiŋ go tan lɛk aw wata we de kɛr wud chips go.

⁸ Di ples dɛn na Avɛn we dɛn mek fɔ wɔship dɛn ɔda gɔd dɛn go pwɛl, soso chuk chuk nain go de pan dɛn, dɔn da tɛm de dɛn go ala se mek di mawnten dɛn kɔba dɛn ɛn di il dɛn fɔdɔm pan dɛn.

PAPA GƆD Tɔk Aw I Go Pɔnish Izrɛl

⁹ PAPA GƆD se frɔm we Izrɛl bigin sin na Gibia, dɛn nɔ chenj. I se na dat Gibia fɛt dɛn da tɛm de.

¹⁰ I se na dat mek in go pɔnish dɛn fɔ wetin dɛn de du naw, ɛn di ɔda neshɔn dɛnsɛf go mek bagin fɔ fɛt dɛn wɛn i go rɛdi fɔ pɔnish dɛn fɔ dɛn dɔbul sin.

¹¹ Ifrem na lɛk yɔŋ uman kaw we lɛk fɔ de mas mas tin dɛn bɔt a nɔ gri fɔ tay in nɛk to in kɔmpin fɔ wok; bɔt naw, Ifrem gɛt fɔ wok wit in kɔmpin so dɛn go mek Juda jɔyn am fɔ wok. Jekɔb go gɛt fɔ wok insɛf.

¹² So udat plant sid we raychɔs go gɛt lɔv we nɔ de chenj fɔ in avɛst; tɛm dɔn rich we ɔlman fɔ tray no ɛn du wetin PAPA GƆD want dɔn i go mek bɛtɛ fala ɔlman.

¹³ We dɛn dɔn plant di sid dɛn wit sin, na soso kɔrɔpshɔn ɛn lay go bi dɛn frut we go bia. As na dɛn sojaman dɛn ɛn di tin dɛn we dɛn gɛt fɔ fɛt wit, dɛn abop pan,

¹⁴ na soso fɛt fɛt dɛn go de pan, ɔl di tin dɛn we dɛn mek fɔ fɛt wit go pwɛl lɛk aw kiŋ Shalman bin pwɛl Bɛthabɛl we dɛn go fɛt; dɛn bin ivin kil mami ɛn pikin da tɛm de.

¹⁵ PAPA GƆD se na di sem tin go bi to Izrɛl fɔ di bad we dɛn bad. Wɛn di tɛm rich, Izrɛl dɛn kiŋ go day pan di katakata.