Ozie 1 - Krio Fɔs Oli Baybul

Ozie

¹ Di tɛm we Uzaya, Jotham, Eaz ɛn Ɛzikaya dɛn na bin kiŋ na Juda, ɛn wɛn Jɛroboam, we na Joash in bɔypikin, na bin kiŋ na Izrɛl, PAPA GƆD tɔk to Ozie, we na Biiri in bɔypikin.

Ozie In Wɛf Ɛn Pikin Dɛn

² Wɛn PAPA GƆD bin tɔk to Ozie di fɔs tɛm, PAPA GƆD tɛl am se mek i go fɛn wan rare gyal, mared am ɛn bɔn pikin wit am bikɔs na so Izrɛl de biev we dɛn lɛf PAPA GƆD ɛn nɔ bisin bɔt am.

³ Insɛf go fɛn wan gyal we nem Goma we na Diblaim in gyal pikin, Ozie mared am ɛn dɛn bɔn wan bɔbɔ.

⁴ PAPA GƆD tɛl am se i fɔ gi di pikin nem Jɛzril bikɔs i nɔ go tu te igen i go pɔnish Jɛu in pipul fɔ ɔl di blɔd we Jɛu wes na Jɛzril. Dɔn i se in go mek Jɛu in pipul lɛf fɔ rul Izrɛl.

⁵ I se na da de de i go pwɛl ɔl wetin Izrɛl de tek fɛt na di Jɛzril vali.

⁶ Goma gɛt ɔda bɛlɛ bak bɔn titi dis tɛm. PAPA GƆD tɛl Ozie fɔ gi di pikin nem “a nɔ de sɔri fɔ am,” bikɔs in nɔ go sɔri fɔ Izrɛl igen ɛn i nɔ go fɔgiv dɛn wankɔpɔ.

⁷ I se in go sɔri fɔ di wan dɛn na Juda ɛn in PAPA GƆD, we na dɛn Gɔd go pul dɛn pan trɔbul bɔt i nɔ go yus aro ɔ sɔd ɔ wa ɔ ɔs dɛn ɔ di man dɛn we de rayd ɔs.

⁸ Wɛn Goma dɔn pul di pikin we nem “a nɔ de sɔri fɔ am” na bɔbi, i gɛt ɔda bɛlɛ ɛn bɔn ɔda bɔbɔ.

⁹ PAPA GƆD se fɔ gi am nem, “nɔto mi pɔsin,” bikɔs Izrɛl nɔto in pipul igen ɛn in nɔto dɛn Gɔd.

Izrɛl Fɔ Bi Wetin Dɛn Bin Bi

¹⁰ Pan ɔl dis, di Izrɛlayt go bɔku lɛk sansan we nɔbɔdi nɔ ebul kɔnt; ɛn usay dɛn bin kɔl dɛn “nɔto mi pɔsin” na di sem ples dɛn go se “PAPA GƆD we nɔ de day in pikin dɛn.”

¹¹ Di pipul na Juda ɛn di wan dɛn na Izrɛl go mek wanwɔd. Dɛn go pik wan edman ɛn dɛn ɔl go bɛtɛ na di land bikɔs da de de go bi big de na Jɛzril.