Obadaya 1 - Krio Fɔs Oli Baybul

¹ Na di tin dɛn dis we Obadaya si. Na di tin dis we PAPA GƆD we na GƆD, se bɔt Idɔm. Idɔm, PAPA GƆD dɔn sɛn mɛsej to dɛn ɔda neshɔn se dɛn fɔ rɛdi fɔ go fɛt yu, ɛn wisɛf dɔn yɛri.

PAPA GƆD go pɔnish Idɔm

² PAPA GƆD se i go mek Idɔm nɔ ebul fɛt; ɛn nɔbɔdi nɔ go luk am wit bɛtɛ yay.

³ I se di kak we una de kak se nɔbɔdi nɔ ebul una, dɔn mek una ful. Una fil se bikɔs una get ay ay wɔl oba una ed, nɔbɔdi nɔ go ebul una,

⁴ bɔt ivin if una go ɔp lɛk Igul, ɛn bil una os usay di sta dɛn de, PAPA GƆD se, in go briŋ una kam dɔŋ.

⁵ I se, una ɛnimi dɛn go pwɛl una kpatakpata. If tifman go na una os nɔto ɔltin dɛn go tif, ɛn dɛn pipul sɛf we de pik greps kin lɛf sɔm na di tik.

⁶ Di pipul dɛn na Idɔm, we na di sem pipul we na Isɔ in jɛnareshɔn, PAPA GƆD de tɛl una se, una ɛnimi dɛn go fɛn ɔl una jɛntri we una bin ayd.

⁷ Di wan dɛn we una se na una padi dɛn, we fɔ ɛp una, dɔn lay gi una. Una bin abop pan dɛn bɔt naw dɛn dɔn sɛt trap fɔ una, ɛn una nɔ ebul ɔndastand. Na dɛn naw de fos una fɔ muf na una land.

⁸ I se, we i rɛdi fɔ pɔnish una, i go mek una sɛnsman dɛn sɛns lɔs.

⁹ Di sojaman dɛn na Teman go fred ɛn dɛn go kil ɔl di sojaman dɛn na Idɔm.

Wetin mek Idɔm gɛt pɔnishmɛnt

¹⁰ I se ɔl dis bi to una bikɔs una de du bad ɛn una kil una brɔda dɛn we na Jekɔb in yon jɛnareshɔn dɛn. Dat go mek PAPA GƆD insɛf mek shem ɛn disgres mit una.

¹¹ Una bin biev lɛk trenja di tɛm we di ɛnimi dɛn atak dɛn; di tɛm we dɛn fos fɔ go insay di siti, tek dɛn jɛntri ɛn kɛr am go; di tɛm we dɛn ivin gyambul bɔt wetin fɔ bi to Jerusɛlɛm; una jɛs lɛf dɛn to dɛnsɛf lɛk una na trenja.

¹² Usay tru de fɔ tɔk, we una brɔda dɛn de pan trɔbul na Juda; unasɛf nɔ bin fɔ jɔyn fɔ provok dɛn pan dɛn trɔbul.

¹³ Da sem tɛm de, unasɛf jɔyn gɛŋ ɛn fala di pipul we kɔmɔt Babilɔn fɔ atak di siti. Una nɔ provok dɛn nɔmɔ, bɔt unasɛf tek wetin una ebul tek kɔmɔt na di siti.

¹⁴ Una nɔ jɛs jɔyn gɛŋ fɔ pwɛl di siti, una ivin tinap na di jɔnkshɔn fɔ kech di wan dɛn we de rɔnawe; udat una nɔ ebul andova una mek shɔ se una kil dɛn.

PAPA GƆD go jɔj ɔl di neshɔn dɛn

¹⁵ Di de de kam we PAPA GƆD go kam jɔj ɔl di neshɔn dɛn. Lɛk aw dɛn pas am pan dɛn kɔmpin, na so dɛn go pas am pan dɛn.

¹⁶ PAPA GƆD de tɛl di pipul na Juda se lɛk aw dɛn sɔfa na mi oli mawnten, na so ɔl di ɔda neshɔn gɛt fɔ sɔfa ɛn dɛn go sɔfa mɔ. Dɛn go pɔnish lɛk aw pɔsin de drink wayn makoloŋ, dɔn, wɛn i dɔn wit dɛn, dɛn nɔn nɔ go lɛf.

Izrɛl bit in ɛnimi

¹⁷ Bɔt sɔm pipul na Juda nɔ go rɔnawe, dɛn go lɛf na Mawnt Zayɔn, di oli il; dɔn Jekɔb in jɛnareshɔn go gɛt di land bak we na dɛn yon bay rayt.

¹⁸ PAPA GƆD se i go yuz di pipul na Juda ɛn Izrɛl fɔ sho aw in vɛks. In pɔnishmɛnt go kam lɛk faya ɛn na Idɔm go bi di chips. Dɛn go bɔn kpatakpata. Natin nɔ go lɛf, bikɔs na so PAPA GƆD se.

¹⁹ I se di wan dɛn we de na Sawt Juda go tek ova Idɔm; di wan dɛn we de na di Wɛst bɔda, dɛn go tek ova Filistia. Na di Izrɛlayt dɛn go gɛt Ifrem ɛn Sameria; dɔn di pipul dɛn na Bɛnjamin go gɛt Giliad.

²⁰ Di Izrɛlayt dɛn we de ɛgzayl go gɛt Kenan te rich Zarɛfat, di wan dɛn we de ɛgzayl we kɔmɔt Jerusɛlɛm, we de na Sadis, dɛn go tek ova di siti dɛn we de Sawt Juda.

²¹ Pipul dɛn go go sev Mawnt Zayɔn fɔ rul Mawnt Isɔ; ɛn PAPA GƆD go bi kiŋ bak fɔ dɛn ɔl.