Di Nɔmba Dɛm 8 - Krio Fɔs Oli Baybul

Dɛn Fiks Di Lamp Dɛn Na Dɛn Ples

¹ PAPA GƆD tɛl Mozis fɔ tɛl Erɔn se

² wɛn i put di sɛvin lamp na dɛn ples, dɛn fɔ layt di eria we de bifo dɛn.

³ Erɔn du wetin PAPA GƆD tɛl Mozis se i fɔ du. I put di lamp dɛn na ples fɔ layt di eria we de bifo dɛn jɛs lɛkɛ aw PAPA GƆD se i fɔ du.

⁴ Dɛn bin mek di stand dɛn fɔ di lamp dɛn jɛs lɛkɛ aw PAPA GƆD bin dɔn sho Mozis. Dɛn kɔba frɔm ɔp kam dɔŋ wit gold we dɛn ama.

Di Livayt Dɛn Gi Dɛnsɛf To PAPA GƆD Ɛn Mek Dɛnsɛf Klin Na In Yay

⁵ PAPA GƆD tɔk to Mozis.

⁶ I se, “Nɔ mek di Livayt dɛn miks wit di ɔda Izrɛlayt dɛn ɛn mek shɔ se dɛn klin na mi yay.

⁷ Fɔ mek dɛn klin na mi yay, na dɛn tin ya yu fɔ du: sprinkul di spɛshal wata pan dɛn we fɔ yuz fɔ klin dɛn, dɔn mek dɛn shev dɛn wanol bɔdi ɛn was dɛn klos dɛn. Na so dɛn go mek dɛnsɛf klin na mi yay.

⁸ Lɛ dɛn tek wan yɔŋ man kaw wit fayn flawa we dɛn miks am wit ɔyl fɔ di gren sakrifays; dɛn fɔ tek wan ɔda yɔŋ man kaw we dɛn go sakrifays fɔ dɛn sin.

⁹ We yu dɔn mek ɔl di Livayt dɛn go tinap frɔnt di Tɛnt we wi kin mit ɛn lɛ ɔl di Izrɛlayt dɛnsɛf gɛda de,

¹⁰ yu fɔ mek di Livayt dɛn tinap bifo PAPA GƆD ɛn ɔl di ɔda Izrɛlayt fɔ le dɛn an pan dɛn ɛn pre fɔ dɛn.

¹¹ Dɔn Erɔn in fɔ gi di Livayt dɛn to mi ɛn as di Izrɛlayt dɛn de wev sakrifays to mi fɔ lɛ dɛn go rɛdi fɔ du mi, PAPA GƆD in yon wok.

¹² Afta di Livayt dɛn dɔn le dɛn an dɛn pan di man kaw dɛn ed, yu fɔ yuz wan pan dɛn as sin sakrifays to PAPA GƆD dɔn dɛn fɔ bɔn di ɔda wan. Dat go mekɔp fɔ ɛni bad we di Livayt dɛn dɔn du.

¹³ “Lɛ di Livayt dɛn tinap bifo Erɔn ɛn in bɔypikin dɛn so dat dɛn go gi dɛn to mi as wev sakrifays.

¹⁴ Na so yu go tek put di Livayt dɛn wan say fɔ mi ɛn na mi go gɛt dɛn ɔl.

¹⁵ Afta we yu dɔn mek di Livayt dɛn klin na mi yay ɛn yu dɔn wev dɛn to mi as sakrifays, mek dɛn go wantɛm insay di Tɛnt ɛn bigin du dɛn wok.

¹⁶ Pan ɔl di Izrɛlayt dɛn, na dɛn fɔ de to mi wit ɔl dɛn at. Na mi nɔmɔ gɛt dɛn. Na dɛn a dɔn tek as mi yon fɔ dɛn fɔs-bɔy-pikin we ɛni Izrɛlayt uman go bɔn.

¹⁷ Bay rayt ɛni pikin we dɛn bɔn fɔs na Izrɛl we na man fɔ bi mi yon wɛda na man ɔ na animal. Di tɛm we a bin mek ɔl dɛn fɔs pikin day na Ijipt na frɔm da tɛm de a bin dɔn se ɔl di fɔs pikin dɛn na Izrɛl go bi mi yon.

¹⁸ A dɔn tek di Livayt dɛn naw fɔseka di fɔs-bɔy-pikin dɛn na Izrɛl.

¹⁹ Pan ɔl di Izrɛlayt dɛn, na di Livayt dɛn a dɔn gi to Erɔn ɛn in bɔypikin dɛn as prɛzɛnt fɔ de ɛp wok na di Tɛnt fɔseka di Izrɛlayt dɛn. Dɛn fɔ de de so dat dɛn go de beg PAPA GƆD fɔ fɔgiv di Izrɛlayt dɛn sin so dat bad sik nɔ go kech ɛniwan pan dɛn we go mistek go nia di oli ples usay PAPA GƆD de.

²⁰ Mozis, Erɔn ɛn di wanol Izrɛl du wetin PAPA GƆD tɛl Mozis fɔ du wit di Livayt dɛn.

²¹ Di Livayt dɛn mek dɛnsɛf klin bifo PAPA GƆD ɛn was dɛn klos dɛn. Dɔn Erɔn in gi dɛn to PAPA GƆD lɛkɛ wev sakrifays ɛn beg PAPA GƆD fɔ lɛ i fɔgiv dɛn sin ɛn mek dɛn klin nain yay.

²² Afta dat, di Livayt dɛn go insay di Tɛnt go wok ɛn na Erɔn ɛn in bɔypikin dɛn bin de supavays dɛn. Dɛn biev to di Livayt dɛn lɛkɛ aw PAPA GƆD bin dɔn tɛl Mozis se dɛn fɔ du.

²³ PAPA GƆD tɛl Mozis.

²⁴ I se, “Dis na fɔ di Livayt dɛn. Ɛni man we ol twɛnti-fayv ia ɔ dɔn pas dat, fɔ kam mek i go de fɔ de wok na di Tɛnt,

²⁵ bɔt we i ol fifti, i nɔ fɔ wok lɛk aw i bin de du. I fɔ ritaya.

²⁶ I kin ɛp in brɔda fɔ du in wok bɔt in ɔf insɛf nɔ fɔ gɛt nɔn wok fɔ du. Na so fɔ tɛl di Livayt dɛn aw fɔ wok.