Di Nɔmba Dɛm 5 - Krio Fɔs Oli Baybul

Pipul Dɛn We Nɔ Klin Na PAPA GƆD In Yay

¹ PAPA GƆD tɛl Mozis se i fɔ

² tɛl di Izrɛlayt dɛn nɔ fɔ gri mek ɛni pan dɛn kɔmpin we gɛt sik na dɛn bɔdi we ɔda pɔsin go kech tap insay di kamp. Dɛn fɔ drɛb am. If di pɔsin de pul sɔm kayn bad wata na ɛnisay nain bɔdi ɔ if na pɔsin we nɔ klin bikɔs i dɔn tɔch dedebɔdi sɛf, nɔ fɔ gri mek dɛn ɔl de insay di kamp.

³ I se wɛda dɛn na man ɔ dɛn na uman, na fɔ drɛb dɛn ɔ nɔ so dɛn go mek di kamp nɔ oli ɛn na de i de.

⁴ Di Izrɛlayt dɛn obe ɛn drɛb di pipul dɛn we PAPA GƆD se na do jɛs lɛkɛ aw i bin dɔn tɛl Mozis.

Pipul Dɛn Fɔ Pe Fɔ Di Bad We Dɛn Du

⁵ PAPA GƆD tɛl Mozis

⁶ fɔ tɛl di Izrɛlayt dɛn se, wɛn man ɔ uman du in kɔmpin bad ɛn dat mek i nɔ du wetin PAPA GƆD want, i dɔn sin ɛn

⁷ fɔ kɔnfɛs di sin. I fɔ pe fɔseka dat ɛn put twɛnti pasɛnt mɔ pantap ɛn gi ɔl to di pɔsin we i du bad.

⁸ Bɔt if di wan we i du bad nɔ gɛt ɛni klos fambul we i fɔ pe to, na PAPA GƆD gɛt am so i fɔ pe am to di man we de mek sakrifays fɔ pipul sin. I fɔ pe to am ɛn gi am di manship we bay rayt nain di man fɔ yuz fɔ mek pis wit PAPA GƆD fɔ am.

⁹ Ɔl dɛn kayn kɔntribyushɔn de we di Izrɛlayt dɛn de gi di man we de mek sakrifays fɔ pipul sin, nain gɛt am.

¹⁰ Di wan we di pɔsin gɛt nain yon, bɔt wetin dɛn de gi to di man we de mek sakrifays fɔ pipul sin, nainsɛf yon.

Kes Dɛn We Di Man De Sɔspɛkt In Wɛf

¹¹ PAPA GƆD tɛl Mozis

¹² fɔ tɛl di Izrɛlayt dɛn se if man in wɛf lɛf am ɛn

¹³ go gɛt biznɛs wit ɔda man ɛn di man nɔ no ivin we nɔbɔdi nɔ si am ɔ tɔk bɔt am,

¹⁴ bɔt in man sɔspɛkt am bikɔs i de jɛlɔs ɔ if wan jɛlɔs man de sɔspɛkt in wɛf ivin we di uman nɔ de pan ɛni ɔnda-an biznɛs,

¹⁵ di man ɛn in wɛf dɛn fɔ go to di man we de mek sakrifays fɔ pipul sin. Di man fɔ kɛr lɛkɛ siks kɔp bali to di man we de mek sakrifays fɔ pipul sin fɔ in wɛf. In ɔf insɛf nɔ fɔ put ɔyl ɔ insɛns pan am bikɔs na sakrifays we i de mek bikɔs i de jɛlɔs ɛn want fɔ fɛnɔt if di uman gilti.

¹⁶ PAPA GƆD se, di man we de mek sakrifays fɔ pipul sin in naw fɔ mek di uman tinap bifo PAPA GƆD.

¹⁷ Dɔn i fɔ tek sɔm oli wata kɔmɔt na wan kle jɔg, put dɔst we kɔmɔt na di tɛnt in grɔn insay di wata.

¹⁸ Afta we i bin dɔn put di uman fɔ tinap bifo PAPA GƆD, i fɔ lus in ia ɛn gi am da siks kɔp bali we in man bin briŋ kam, fɔ sho se i de jɛlɔs, fɔ ol. Dɔn in di man we de mek sakrifays fɔ pipul sin fɔ ol di wata we i wan tek fɔ swɛ.

¹⁹ PAPA GƆD se di man we de mek sakrifays fɔ pipul sin, fɔ tɛl di uman fɔ swɛ. I fɔ se “If yu nɔ lɛf yu mared man wande go to ɔda man we go gɛt biznɛs wit yu, mek dis bita wata we yu de drink nɔ du yu natin.

²⁰ Bɔt if yu dɔn lɛf yu mared man ɛn gɛt biznɛs wit ɔda man,

²¹ na ya so i fɔ tɔk wetin di swɛ go bi. “Mek PAPA GƆD lɛ yu pipul dɛn kɔmɔt biɛn yu ɛn fɔsek yu we i go mek yu nɔ bɔn ɛn ɛni bɛlɛ we yu gɛt go wes.

²² Lɛ dis wata we yu de drink so briŋ di swɛ kam pan yu. Dɔn di uman go se “A gri fɔ wetin go bi.

²³ PAPA GƆD se, da tɛm de, di man we de mek sakrifays fɔ pipul sin fɔ rayt wetin na di swɛ dɔŋ na pepa ɛn was di raytin insay di bita wata.

²⁴ I fɔ mek di uman drink di wata we go mek in bɛlɛ at.

²⁵ Di man we de mek sakrifays fɔ pipul sin fɔ pul da tin we di man gi bikɔs i de jɛlɔs, na di uman in an, wev am bifo PAPA GƆD ɛn kɛr am go na di ɔlta.

²⁶ Naw i fɔ tek in an tek sɔm we i go bɔn na di ɔlta fɔ mɛmba wetin bi so. PAPA GƆD se, i fɔ mek di uman drink pan di wata bak.

²⁷ If di uman dɔn mek ɔda man tɔch am apat frɔm in mared man, wɛn i drink di wata we gɛt di swɛ, in bɛlɛ go at am dɔn i go bigin sɔfa. I nɔ go ɛva bɔn ɛn ɛni bɛlɛ we i gɛt go wes dɔn in pipul dɛn nɔ go wan natin fɔ du wit am.

²⁸ If di uman nɔ gilti atɔl, di swɛ nɔ go ol am ɛn i go ebul fɔ bɔn pikin.

²⁹ PAPA GƆD se na dis fɔ de bi we uman want fɔ kɔt rop as mared uman

³⁰ ɔ we man de jɛlɔs bikɔs i de sɔspɛkt in wɛf. Di man we de mek sakrifays fɔ pipul sin fɔ mek di uman tinap bifo PAPA GƆD ɛn pas dis sɛrimɔni pan am.

³¹ Di mared man nɔ go gɛt fɔ fil natin, na di uman nɔmɔ go gɛt fɔ bia wit wetin apin bikɔs ɔf in sin.