Di Nɔmba Dɛm 4 - Krio Fɔs Oli Baybul

Wetin Di Livayt Dɛn We Kɔmɔt na Koath In Famili Fɔ Du

¹ PAPA GƆD tɛl Mozis ɛn Erɔn

² fɔ kɔnt ɔlman we kɔmɔt na Koath in famili. Dɛn fɔ de bay grup dɔn

³ i fɔ mek shɔ se i kɔnt di man dɛn bitwin tati ɛn fifti ia we de go wok na di Tɛnt usay dɛn kin mit am.

⁴ PAPA GƆD se di wan dɛn we kɔmɔt na Koath in famili, na dɛn fɔ de sibɔt di tin dɛn we oli pas ɔl na di Tɛnt usay dɛn kin mit am.

⁵ We di kamp fɔ muf, Erɔn ɛn in bɔypikin dɛn fɔ pul di klos we kin kɔba di ak ɛn ɛŋ am pan am.

⁶ We dɛn wan put di klos pan di ak, dɛn go put got kanda pan am fɔs, we dɛn go kɔba wit blu matirial, bifo dɛn go put di pol dɛn usay dɛn fɔ de.

⁷ Pan di tebul we dɛn kin put bred fɔ sakrifays to PAPA GƆD, dɛn fɔ prɛd blu tebulklos bifo dɛn put di plet dɛn, di pan ɛn bol dɛn wit di jɔg we fɔ yuz fɔ ɔfa di drink; di bred nɔ fɔ ɛva kɔmɔt de.

⁸ Dɛn fɔ kɔba ɔltin wit brayt rɛd tebulklos, ɛn put got kanda pantap bak bifo dɛn put di pol dɛn usay dɛn fɔ de.

⁹ PAPA GƆD tɛl dɛn igen se, dɛn fɔ tek blu matirial fɔ kɔba di ples we dɛn de put di stand fɔ di lamp dɛn, di tin dɛn we dɛn de tek trim wik, di plet dɛn we kin de ɔnda di lamp, wit di jɔg dɛn ɔl we dɛn kin yuz fɔ put ɔyl insay di lamp dɛn.

¹⁰ Dɔn dɛn fɔ rap di ples we fɔ put di lamp dɛn wit ɔl wetin fɔ yuz wit am insay got kanda ɛn put am na di ples we dɛn mek fɔ tot tin dɛn.

¹¹ PAPA GƆD se dɛn fɔ kɔba di gold ɔlta wit blu bak ɛn put got kanda bifo dɛn put di pol dɛn usay dɛn fɔ de.

¹² Fɔ tek ɔl wetin dɛn de yuz fɔ du di wok insay di Tɛnt ɛn kɔba dɛn wit got kanda, bifo dɛn put dɛn na di ples we dɛn mek fɔ tot tin dɛn.

¹³ I se dɛn fɔ pul di ashis kɔmɔt pan di bras ɔlta dɔn dɛn fɔ kɔba di ɔlta wit pɔpul matirial.

¹⁴ Dɔn dɛn fɔ put ɔl di tin dɛn we dɛn de yuz fɔ du di wok na di ɔlta, pantap. Dɛn fɔ mek shɔ se dɛn put di fraypan dɛn, di fɔk dɛn fɔ di bif, di shɔbul dɛn, di besin dɛn de. Dɛn fɔ kɔba dɛn bak wit got kanda bifo dɛn put di pol dɛn usay dɛn fɔ de.

¹⁵ PAPA GƆD tɛl dɛn se afta we Erɔn ɛn in bɔypikin dɛn dɔn kɔba ɔl wetin oli, ɛn we dɛn dɔn rɛdi fɔ muf di kamp, di Livayt dɛn we kɔmɔt na Koath in famili, na dɛn fɔ tot dɛn. Bɔt dɛn fɔ mek shɔ se dɛn nɔ tɔch ɛni pan di tin dɛn we oli ɔ nɔ so dɛn go day. Di Koathayt dɛn na di wan dɛn we fɔ tot di tin dɛn na di Tɛnt usay dɛn kin mit PAPA GƆD.

¹⁶ Ɛlieza we na Erɔn in bɔypikin, nain fɔ de inchaj ɔf di ɔyl fɔ di layt, insɛns we de pul fayn sɛnt, di sakrifays we dɛn de mek ɛvride wit sid dɛn ɛn di ɔyl we fɔ yuz fɔ anɔynt. PAPA GƆD se na Ɛlieza fɔ de inchaj ɔf di wanol tɛnt ɛn ɔl wetin de insay am, wit ɔl di oli tin dɛn we dɛn de yuz.

¹⁷ PAPA GƆD tɛl Mozis ɛn Erɔn

¹⁸ fɔ mek shɔ se di Livayt dɛn we kɔmɔt na Koath in famili nɔ day lɛf di ɔda Livayt dɛn.

¹⁹ I se, dɛn fɔ mek shɔ se ivin we dɛn go nia di tin dɛn we oli pas ɔl, dɛn nɔ day. Erɔn ɛn in bɔypikin dɛn fɔ go insay di Tɛnt ɛn gi ɔlman wetin i fɔ du.

²⁰ Bɔt di Koathayt dɛn nɔ fɔ go sɛf go luk di tin dɛn we oli fɔ wan minit bikɔs dɛn go day.

Wetin Di Livayt Dɛn We Kɔmɔt Na Gashɔn In Famili Fɔ Du

²¹ PAPA GƆD tɛl Mozis

²² fɔ kɔnt ɔlman we kɔmɔt na Gashɔn in famili. Dɛn fɔ de bay grup

²³ dɔn i fɔ mek shɔ se i kɔnt di man dɛn bitwin tati ɛn fifti ia we de go wok na di tɛnt usay dɛn kin mit am.

²⁴ PAPA GƆD se na di wok dis we di wan dɛn we kɔmɔt na Gashɔn in famili fɔ de du as dɛn de du dɛn wok ɛn de tot lod.

²⁵ Na dɛn fɔ de tot di klos dɛn fɔ di tɛnt, di tɛnt usay dɛn kin mit am, wetin de kɔba am, di kɔba we dɛn tek got kanda mek we de na do, di doklos fɔ di tɛnt usay dɛn kin mit am,

²⁶ di klos dɛn we de de rawnd na di tɛnt in kɔmpawnd ɛn di ɔlta, di ɔda doklos dɛn, di rop ɛn ɔl wetin dɛn kin yuz. Di Gashɔnayt na dɛn fɔ tot ɔl dɛn tin ya.

²⁷ Ɛnitin we dɛn de du wɛda na fɔ de tot ɔ fɔ de du ɔda wok, dɛn fɔ mek shɔ se na wetin Erɔn ɛn in bɔypikin dɛn tɛl dɛn fɔ du, nain dɛn de du. Na dɛn fɔ de gi di Gashɔnayt dɛn wetin dɛn fɔ de tot.

²⁸ Na di wok dis we di Gashɔnayt dɛn gɛt fɔ du na di tɛnt usay dɛn kin mit am. I tɛl dɛn se Ithama, Erɔn in ɔda bɔypikin, nain rɛspɔnsibul fɔ dɛn.

Wetin Di Livayt Dɛn We Kɔmɔt na Mɛrari In Famili Fɔ Du

²⁹ PAPA GƆD tɛl Mozis fɔ kɔnt ɔlman we kɔmɔt na Mɛrari in famili.

³⁰ I fɔ mek shɔ se i kɔnt di man dɛn bitwin tati ɛn fifti ia we de go fɔ wok na di tɛnt usay dɛn kin mit am.

³¹ I se na di wok dis dɛn fɔ du as dɛn de wok na di tɛnt usay dɛn kin mit am. Na dɛn fɔ de tot di tɛnt in frem, di krɔsba dɛn, di post ɛn dɛn bes;

³² wit di post dɛn fɔ di kɔmpawnd ɛn dɛn bes, di pɛg dɛn fɔ di tɛnt, rop ɛn ɔl wetin dɛn kin yuz. Dɛn fɔ tɛl ɔlman wetin i fɔ tot.

³³ PAPA GƆD se na dɛn wok dis na di tɛnt usay dɛn kin mit am, ɛn Ithama we na Erɔn in bɔypikin, nain go de tɛl dɛn wetin fɔ du.

Dɛn Kɔnt Di Livayt Dɛn

³⁴ Mozis, Erɔn ɛn di lida dɛn na di kɔmyuniti bin kɔnt di Koathayt dɛn. Dɛn bin du am bay grup bay dɛn famili dɛn.

³⁵ Ɔl di man dɛn we bin ol bitwin tati ɛn fifti ia we bin kam fɔ wok na di tɛnt usay dɛn kin mit PAPA GƆD,

³⁶ na bin 2,750 we dɛn kɔnt dɛn bay famili.

³⁷ Na di total nɔmba fɔ di Koathayt dɛn dis we bin de wok na di tɛnt usay dɛn kin mit PAPA GƆD. Mozis ɛn Erɔn bin kɔnt dɛn lɛkɛ aw PAPA GƆD bin tɛl dɛn fɔ du.

³⁸ Dɛn kɔnt di Gashɔnayt dɛnsɛf bay grup bay dɛn famili dɛn.

³⁹ Ɔl di man dɛn we bin ol bitwin tati ɛn fifti ia we bin kam fɔ wok na di tɛnt usay dɛn kin mit PAPA GƆD,

⁴⁰ na bin 2,630 we dɛn kɔnt dɛn bay famili.

⁴¹ Na di total nɔmba fɔ di Gashɔnayt dɛn dis we bin de wok na di tɛnt usay dɛn kin mit PAPA GƆD. Mozis ɛn Erɔn bin kɔnt dɛn lɛkɛ aw PAPA GƆD bin tɛl dɛn fɔ du.

⁴² Dɛn bin kɔnt di Mɛrarayt dɛnsɛf bay grup ɛn bay dɛn famili dɛn.

⁴³ Ɔl di man dɛn we bin ol bitwin tati ɛn fifti ia we bin kam fɔ wok na di Tɛnt usay dɛn kin mit PAPA GƆD,

⁴⁴ na bin 3,200 we dɛn kɔnt dɛn bay famili.

⁴⁵ Na di total nɔmba fɔ di Mɛrarayt dɛn dis we bin de wok na di tɛnt usay dɛn kin mit PAPA GƆD. Mozis ɛn Erɔn bin kɔnt dɛn lɛkɛ aw PAPA GƆD bin tɛl dɛn fɔ du.

⁴⁶ Na so Mozis, Erɔn ɛn di lida dɛn na Izrɛl tek kɔnt ɔl di Livayt dɛn bay grup ɛn bay dɛn famili.

⁴⁷ Ɔl di man dɛn we bin ol bitwin tati ɛn fifti ia we bin kam fɔ wok na di tɛnt usay dɛn kin mit PAPA GƆD

⁴⁸ na bin 8,580.

⁴⁹ Dɛn bin tɛl ɔlman us wok in fɔ du ɛn wetin i fɔ tot jɛs lɛkɛ aw PAPA GƆD bin tɛl Mozis se dɛn fɔ du. Na so dɛn kɔnt dɛn ɔl, lɛkɛ aw PAPA GƆD bin tɛl Mozis se dɛn fɔ du.