Di Nɔmba Dɛm 36 - Krio Fɔs Oli Baybul

Di Mared Uman Dɛn Yon Prɔpati

¹ Di big wan na di famili fɔ Giliad we na Maka in bɔypikin ɛn Manasɛ in grampikin we na Josɛf in jɛnareshɔn go mit Mozis, di lida dɛn ɛn di ɔda big wan dɛn na dɛn yon famili.

² Dɛn se, PAPA GƆD bin se wɛn dɛn de vot fɔ sheb di prɔpati gi di Izrɛlayt dɛn, dɛn brɔda Zɛlofead in prɔpati fɔ go to in gyal pikin dɛn.

³ Dɛn se dat min se if di gyal pikin dɛn mared man we kɔmɔt na ɔda fambul, na dɛn yon prɔpati go go ad to da ɔda fambul de. Dat go mek sɔm pan dɛn yon prɔpati go go to da ɔda fambul de.

⁴ Dɛn se, wɛn di tɛm go kam we ɔl di Izrɛlayt fambul dɛn go gɛt dɛn land dɛn bak, di gyal pikin dɛn land go ad pan di fambul we dɛn mared dɛn land dɔn dɛn go tek dɛn fɔstɛm pipul dɛn prɔpati.

⁵ Mozis tɛl dɛn wetin PAPA GƆD ɔda dɛn se. I se na tru Josɛf in fambul dɛn de tɔk,

⁶ bɔt i tɛl dɛn wetin PAPA GƆD se dat na fɔ mared ɛnibɔdi we dɛn fil fɔ mared wans na pɔsin kɔmɔt na di sem fambul layn we dɛn kɔmɔt.

⁷ I se, PAPA GƆD se nɔbɔdi in prɔpati na Izrɛl nɔ fɔ go to ɔda fambul as ɔlman fɔ mek sho se i kip di prɔpati we i gɛt frɔm in fɔstɛm-papa dɛn fambul.

⁸ Ɛni gyal pikin we gɛt prɔpati pan di Izrɛlayt dɛn prɔpati fɔ mared pɔsin we kɔmɔt usay in papa kɔmɔt, so dat ɛni Izrɛlayt go gɛt pan in fɔstɛm-papa dɛn prɔpati.

⁹ Nɔ prɔpati nɔ fɔ kɔmɔt na wan fambul go to ɔda wan as ɔl di fambul dɛn fɔ kip wetin i gɛt as in yon prɔpati.

¹⁰ So Zɛlofead in gyal pikin dɛn du wetin PAPA GƆD tɛl Mozis,

¹¹ Zɛlofead in gyal pikin dɛn we na Mala, Taza, Ɔgla Milka ɛn Noa mared dɛn kɔzin dɛn na dɛn papa say.

¹² Dɛn mared pipul dɛn we na Josɛf in jɛnareshɔn bay in bɔypikin we na Manasɛ, so dɛn prɔpati lɛf insay to dɛn papa in fambul.

¹³ Na di lɔ dɛn dis we PAPA GƆD gi Mozis fɔ gi di Izrɛlayt dɛn we dɛn de na di flat grɔn na Moab bay Riva Jɔdan na Jɛriko.