Di Nɔmba Dɛm 34 - Krio Fɔs Oli Baybul

Di Bawndri Dɛn Na Di Land

¹ PAPA GƆD tɛl Mozis se,

² “Gi di Izrɛlayt dɛn dis ɔda, tɛl dɛn se, we dɛn dɔn go insay Kenan, na di bawndri dɛn dis we di say we dɛn gɛt as dɛn prɔpati fɔ gɛt.

³ Sɔm pat pan di ɛmti land we pɔsin nɔ go ebul tap na Zin we de na di bɔda na Idɔm, fɔ de na di sawtan pat. Di ist kɔna pan di sawtan bawndri fɔ bigin usay di Dɛd Si tap;

⁴ krɔs di sawt na Skɔpiɔn Pas te rich Zin ɛn go sawt na Kedɛsh Bania. Dɔn i go to Eza Ada ɛn go oba to Azmɔn,

⁵ usay i go tɔn, ɛn jɔyn to Wadi ɔf Ijipt ɛn ɛnd na di Mɛditarenian Si.

⁶ Di wɛstɛn bawndri go de na di dray land bay di Mɛditarenian Si. Na de di bawndri go de fɔ di wɛst pat.

⁷ Fɔ di bawndri na di nɔth, na fɔ mek layn we bigin na di Mɛditarenian Si te rich Mawnt Ɔ

⁸ ɛn frɔm Mawnt Ɔ to Libo Amath. Dɛn di bawndri fɔ go te rich Zɛdad,

⁹ kɔntinyu to Zifrɔn ɛn ɛnd na Eza Enan. Na dis go bi di bawndri na di Nɔth.

¹⁰ Dɔn di istɛn bawndri, di layn fɔ de frɔm Eza Enan to Shafam.

¹¹ Di bawndri go go dɔŋ frɔm Shafam to Ribla we de na di ist say na Eayn ɛn kɔntinyu bay di slup dɛn we de na di ist pat na di Galili Si.

¹² Di bawndri dɛn go de bay di Riva Jɔdan ɛn ɛnd na di Dɛd Si. Na so di land go de, wit ɔl di bawndri dɛn.

¹³ So Mozis gi di Izrɛlayt dɛn di ɔda. I tɛl dɛn se dɛn fɔ vot fɔ mek dɛn go sheb di prɔpati. I tɛl dɛn se PAPA GƆD dɔn gi dɛn ɔda se, dɛn fɔ sheb am gi nayn ɛn af Izrɛlayt fambul,

¹⁴ bikɔs di Rubɛnayt, di Gadayt ɛn af ɔf Manasɛ in fambul dɛn dɔn gɛt dɛn yon prɔpati.

¹⁵ I se dɛn tu ɛn af fambul de dɔn gɛt dɛn yon prɔpati, ist pat na di Riva Jɔdan we yu de go usay di san de grap.

Di Lida Dɛn We Rɛspɔnsibul Fɔ Sheb Di Land

¹⁶ PAPA GƆD tɛl Mozis se,

¹⁷ “Na di nem dɛn dis fɔ di man dɛn we fɔ sheb di land fɔ bi una prɔpati dat na na Ɛlieza we na di man we de mek sakrifays fɔ pipul sin ɛn Jɔshwa we na Nɔn in bɔypikin.

¹⁸ Dɛn yu fɔ pik wan lida na ɔl di fambul dɛn we go ɛp dɛn du di wok.

¹⁹ Na di nem dɛn dis: Kelɛb we na Jɛfunɛ in bɔypikin fɔ kɔmɔt na Juda in fambul layn;

²⁰ Shɛmuɛl we na Amiɔd in bɔypikin fɔ kɔmɔt na Simiɔn in fambul layn;

²¹ Ɛlidad we na Kislɔn in bɔypikin fɔ kɔmɔt na Bɛnjamin in fambul layn;

²² Buki we na Jɔgli in bɔypikin na di lida we fɔ kɔmɔt na Dan in fambul layn;

²³ Amiɛl we na Ilfɔd in bɔypikin na di lida we fɔ kɔmɔt na Manasɛ we na Josɛf in bɔypikin in fambul layn;

²⁴ Kɛmuɛl we na Shiftan in bɔypikin na di lida we fɔ kɔmɔt na Ifrem we na Josɛf in bɔypikin in fambul layn;

²⁵ Ɛlizafan we na Panak in bɔypikin na di lida we fɔ kɔmɔt na Zɛbyulɔn in fambul layn;

²⁶ Paltiɛl we na Azan in bɔypikin na di lida we fɔ kɔmɔt na Isaka in fambul layn;

²⁷ Aayɔd we na Shelomi in bɔypikin na di lida we fɔ kɔmɔt na Asha in fambul layn;

²⁸ Pɛdaɛl we na Amiɔd in bɔypikin na di lida we fɔ kɔmɔt na Naftali in fambul layn.

²⁹ Na di man dɛn nem dis we PAPA GƆD gi ɔda se fɔ sheb di prɔpati dɛn to di Izrɛlayt insay Kenan.