Di Nɔmba Dɛm 33 - Krio Fɔs Oli Baybul

Wetin Apin Frɔm We Dɛn Lɛf Ijipt Te Rich Moab

¹ Na di difrɛn tin dis we bi na rod we di Izrɛlayt dɛn kɔmɔt bay grup na Ijipt ɛn na Mozis ɛn Erɔn bin de lid dɛn ɔl.

² Mozis du wetin PAPA GƆD tɛl am, dat na i fɔ rayt dɔŋ ɔl wetin apin na rod. Na di tin dɛn dis we apin as dɛn de go:

³ Di Izrɛlayt dɛn lɛf Ramisis, di de afta di Pasova Fɛstival, dat na di fiftin de na di fɔs mɔnt. Ɔl di Ijipshian dɛn bin de luk dɛn we dɛn de lɛf majɛstikali

⁴ da tɛm de ɔl di Ijipshian dɛn bin de bɛr dɛn fɔs pikin dɛn we day wɛn PAPA GƆD ple wɔwɔ insay Ijipt we i shɔ dɛn gɔd dɛn wetin i kin du.

⁵ We di Izrɛlayt dɛn lɛf Ramisis, dɛn go te rich Sɔkɔt usay dɛn kamp.

⁶ Frɔm Sɔkɔt, dɛn go te rich Itham we de na di ɛmti land we pɔsin nɔ go ebul tap in ɛj ɛn kamp de.

⁷ Dɛn lɛf Itham tɔn bak go Pay Aayrɔth bay di ist pat na Baal Zɛfɔn ɛn kamp nia Migdɔl.

⁸ Dɛn lɛf Pay Aayrɔth ɛn pas bay di si go na di ɛmti land we pɔsin nɔ go ebul tap, dɔn afta dɛn bin dɔn du tri de na di ɛmti land we pɔsin nɔ go ebul tap na Itham, dɛn kamp na Mara.

⁹ Dɛn lɛf Mara go Ɛlim usay twɛlv ples de we gɛt wata we de bɔs na grɔn ɛn sɛvinti koknat tik ɛn kamp de.

¹⁰ Dɛn lɛf Ɛlim go kamp nia di Rɛd Si.

¹¹ Dɛn lɛf di Rɛd Si go kamp na di ɛmti land we pɔsin nɔ go ebul tap na Sin.

¹² Dɛn lɛf di ɛmti land we pɔsin nɔ go ebul tap na Sin go kamp na Dɔfka.

¹³ Dɛn lɛf Dɔfka go kamp na Alush.

¹⁴ Dɛn lɛf Alush go kamp na Refidim usay wata nɔ bin de fɔ di pipul dɛn fɔ drink.

¹⁵ Dɛn lɛf Refidim go kamp na di ɛmti land we pɔsin nɔ go ebul tap na Saynay.

¹⁶ Dɛn lɛf di ɛmti land we pɔsin nɔ go ebul tap na Saynay go kamp na Kibroth Atava.

¹⁷ Dɛn lɛf Kibroth Atava go kamp na Azirɔth.

¹⁸ Dɛn lɛf Azirɔth ɛn kamp na Rithma.

¹⁹ Dɛn lɛf Rithma go kamp na Rimɔn Pɛrɛz.

²⁰ Dɛn lɛf Rimɔn Pɛrɛz go kamp na Libna.

²¹ Dɛn lɛf Libna go kamp na Risa.

²² Dɛn lɛf Risa go kamp na Kiilatha.

²³ Dɛn lɛf Kiilatha go kamp na Mawnt Shɛfa.

²⁴ Dɛn lɛf Mawnt Shɛfa go kamp na Arada.

²⁵ Dɛn lɛf Arada go kamp na Makilɔth.

²⁶ Dɛn lɛf Makilɔth go kamp na Taat.

²⁷ Dɛn lɛf Taat go kamp na Tɛra.

²⁸ Dɛn lɛf Tɛra go kamp na Mithka.

²⁹ Dɛn lɛf Mithka go kamp na Ashmɔna.

³⁰ Dɛn lɛf Ashmɔna go kamp na Mozirɔth

³¹ Dɛn lɛf Mozirɔth go kamp na Bɛnɛ Jeakan.

³² Dɛn lɛf Bɛnɛ Jeakan go kamp na Ɔ Agidad

³³ Dɛn lɛf Ɔ Agidad go kamp na Jɔbatha.

³⁴ Dɛn lɛf Jɔbatha go kamp na Abrona.

³⁵ Dɛn lɛf Abrona go kamp na Iziɔn Geba.

³⁶ Dɛn lɛf Iziɔn Geba go kamp na di di ɛmti land we pɔsin nɔ go ebul tap na Zin na Kedɛsh.

³⁷ Dɛn lɛf Kedɛsh go kamp na Mawnt Ɔ, na di Idɔm bɔda.

³⁸ As PAPA GƆD se, Erɔn, di man we bin de mek sakrifays fɔ pipul sin klem go ɔp Mawnt Ɔ we na de i day. Dat bi di fɔs de, na di mɔnt we mek fiftin insay di ia we mek di Izrɛlayt dɛn foti ia afta dɛn kɔmɔt na Ijipt.

³⁹ Erɔn bin ol wan ɔndrɛd ɛn twɛnti-tri ia we i day pantap Mawnt Ɔ.

⁴⁰ Kiŋ Arad we na di Kenanayt dɛn kiŋ ɛn we bin tap na di Negɛv, dat na di say we big pas ɔl na Kenan, yɛri se di Izrɛlayt dɛn de kam.

⁴¹ Dɛn lɛf Mawnt Ɔ go kamp na Zalmona.

⁴² Dɛn lɛf Zalmona go kamp na Punɔn.

⁴³ Dɛn lɛf Punɔn go kamp na Oboth.

⁴⁴ Dɛn lɛf Oboth go kamp na Iyeabarim Abarim we de na Moab in bɔda.

⁴⁵ Dɛn lɛf Iyeabarim Abarim we dɛn kin kɔl Iyim go kamp na Dibɔn Gad.

⁴⁶ Dɛn lɛf Dibɔn Gad go kamp na Almɔn Diblataim.

⁴⁷ Dɛn lɛf Almɔn Diblataim go kamp na di mawnten dɛn na Abarim, nia Nibo.

⁴⁸ Dɛn lɛf di mawnten dɛn na Abarim go kamp pantap di flat grɔn na Moab bay di Riva Jɔdan.

⁴⁹ Wɛn dɛn de pantap de, dɛn kamp bay Riva Jɔdan frɔm Bɛth Jɛsimɔth te rich Ebɛl Shitim.

Wetin PAPA GƆD Tɛl Dɛn Bifo Dɛn Krɔs Riva Jɔdan

⁵⁰ We dɛn de pantap di flat grɔn bay Riva Jɔdan, PAPA GƆD tɛl Mozis se,

⁵¹ “Tɛl di Izrɛlayt dɛn se we dɛn dɔn krɔs Riva Jɔdan go insay Kenan,

⁵² dɛn fɔ drɛb ɔl udat bin dɔn tap de bifo dɛn. Dɛn fɔ mek shɔ se dɛn dɔnawe wit ɔl di lay lay gɔd dɛn we dɛn bin dɔn mek ɛn pwɛl ɔl di say dɛn we dɛn bin de wɔship dɛn.

⁵³ Dɛn fɔ mek shɔ se dɛn mek di land bi dɛn yon ɛn sɛtul de bikɔs a dɔn gi dɛn di land fɔ bi dɛn yon.

⁵⁴ Dɛn fɔ vot fɔ ebul sheb di land gud. Di big grup fɔ gɛt big ples as prɔpati ɛn di smɔl grup fɔ gɛt smɔl wan. Ɔlman fɔ tek wetin i gɛt we dɛn vot. Dɛn fɔ sheb am bay us Izrɛlayt fambul dɛn blant.

⁵⁵ If dɛn nɔ gri fɔ drɛb di pipul dɛn we dɛn mit de, ɛn lɛf dɛn fɔ tap de ɛn rɔb skin wit dɛn, dɛn go tɔn bon na dɛn trot. Dɛn go did mɔna dɛn na di land we dɛn go de.

⁵⁶ Da tɛm de wetin a bin dɔn plan fɔ du dɛn, na di Izrɛlayt dɛn a go du am to.