Di Nɔmba Dɛm 30 - Krio Fɔs Oli Baybul

Wetin PAPA GƆD Tɔk Bɔt Prɔmis

¹ Mozis tɛl di edman dɛn fɔ di difrɛn fambul dɛn na Izrɛl wetin PAPA GƆD se.

² I se PAPA GƆD se wɛn ɛni man de mek prɔmis to PAPA GƆD ɔ wɛn ɛni man de swɛ ɔ mek plɛj fɔ se in go du sɔntin, i fɔ kip in wɔd ɛn du ɔltin we i se i go du.

³ If wan yɔŋgyal we stil tap nain papa in os mek prɔmis to PAPA GƆD ɔ swɛ ɔ mek plɛj fɔ insɛf,

⁴ dɔn we in papa yɛri if i nɔ se natin, dat sho se i fɔ kip to wetin i se,

⁵ bɔt if we in papa yɛri, i tɔk pan am fɔ dat, dɛn ɔl wetin i se go bi fɔ natin; PAPA GƆD sɛf nɔ go mak am fɔ dat bikɔs in papa nɔ gri wit wetin i se.

⁶ If di uman dɔn mared we i mek di prɔmis dɛn wit ɔri ɛn

⁷ in man nɔ se natin afta i yɛri, dɛn i fɔ kip in prɔmis,

⁸ bɔt if we in man yɛri, i put in fut dɔŋ se di uman magomago, PAPA GƆD nɔ go mak am fɔ dat.

⁹ Ɛni uman we in man dɔn day ɔ we in man dɔn dayvɔs am fɔ kip in wɔd pan ɛni prɔmis we i mek.

¹⁰ I se, PAPA GƆD se, we uman tap na os wit in mared man ɛn mek prɔmis ɔ swɛ ɔ plɛj,

¹¹ if we di man yɛri i nɔ se natin ɛn nɔ tɛl am nɔ fɔ du so, dɛn i fɔ kip in prɔmis ɛn du ɔl wetin i se.

¹² If we di man yɛri, i put in fut dɔŋ ɛn se na magomago de kech am ɛn so in nɔ wan no, i nɔ go kip in prɔmis ɛn PAPA GƆD nɔ go mak di uman fɔ dat.

¹³ In man gɛt rayt fɔ gri ɔ nɔ fɔ gri wit am bɔt ɛni prɔmis we i mek.

¹⁴ Bɔt if di man nɔ se natin to am, dat sho se i gri wit am pan ɛni prɔmis we i mek. I de sho dis, we i nɔ se natin wɛn i yɛri bɔt dɛn.

¹⁵ If leta ɔn i chenj in maynd se i nɔ gri, nain fɔ blem fɔ we di uman nɔ kip to wetin i se.

¹⁶ Na dɛn lɔ ya, PAPA GƆD gi Mozis bɔt aw man fɔ de wit in wɛf ɔ aw papa fɔ trit in gyal pikin we stil tap nain os.