Di Nɔmba Dɛm 3 - Krio Fɔs Oli Baybul

Smɔl Tin Bɔt Erɔn In Bɔy Pikin Dɛn

¹ Dis de tɔk bɔt Mozis ɛn Erɔn dɛn famili, di tɛm we PAPA GƆD bin tɔk to Mozis na Mawnt Saynay.

² Erɔn in bɔypikin dɛn na bin Nadab, we na di fɔs wan, Abiu, Ɛlieza ɛn Ithama.

³ Na Erɔn in bɔypikin dɛn nem dɛn wan ya we dɛn bin dɔn Ɔden ɛn anɔynt fɔ bi man dɛn we fɔ mek sakrifays fɔ di pipul dɛn sin.

⁴ Nadab ɛn Abiu bin fɔdɔm day bifo PAPA GƆD we dɛn bin mek wan sakrifays wit faya, we nɔto aw PAPA GƆD bin tɛl dɛn fɔ du am, dɛn du am di tɛm we dɛn bin de na di ɛmti land we pɔsin nɔ go ebul tap na Saynay. Dɛn nɔn nɔ bin gɛt bɔypikin; so na Ɛlieza ɛn Ithama nɔmɔ bin ebul fɔ du dɛn wok as man dɛn we de mek sakrifays fɔ pipul dɛn sin, bifo dɛn papa Erɔn day.

Dɛn Pik Di Livayt Dɛn Fɔ Bi Di Man Dɛn We Fɔ De Mek Sakrifays Fɔ Di Pipul Dɛn Sin

⁵ PAPA GƆD tɛl Mozis se,

⁶ i fɔ kɛr ɔlman na Livay in fambul layn go to Erɔn fɔ mek dɛn de ɛp Erɔn.

⁷ I se dɛn fɔ de wok fɔ Erɔn ɛn fɔ di wanol kɔmyuniti so di wok insay di Tɛnt usay dɛn kin mit am na dɛn go de du am.

⁸ PAPA GƆD se na dɛn fɔ de tek kia ɔf ɔl wetin de insay di Tɛnt usay dɛn kin mit am ɛn na so dɛn go du di wok na di Tɛnt fɔseka ɔl di Izrɛlayt dɛn.

⁹ PAPA GƆD tɛl Mozis se i fɔ gi di Livayt dɛn to Erɔn ɛn in bɔypikin dɛn; i se, na fɔ wok wit Erɔn ɛn in bɔypikin dɛn nɔmɔ dɛn fɔ de.

¹⁰ Erɔn ɛn in bɔypikin dɛn, na dɛn Mozis fɔ pik fɔ bi di wan dɛn we go de mek sakrifays fɔ di pipul dɛn sin; PAPA GƆD se if ɛni ɔda pɔsin du dis wok i fɔ day.

¹¹ PAPA GƆD tɛl Mozis bak se,

¹² in dɔn pik di Livayt dɛn fɔ bi in yon as bay rayt nain fɔ gɛt ɔl di fɔs-bɔy-pikin we ɛni Izrɛlayt uman bɔn.

¹³ I se wɛn i bin gɛt fɔ lɛ di fɔs wan dɛn day na Ijipt, i bin kip di fɔs pikin dɛn pan di Izrɛlayt dɛn fɔ bi in yon, wɛda dɛn na mɔtalman ɔ dɛn na animal. I se nain gɛt dɛn. In na PAPA GƆD.

Dɛn Kɔnt Di Livayt Dɛn

¹⁴ PAPA GƆD tɛl Mozis we i bin de na di ɛmti land we pɔsin nɔ go ebul tap na Saynay,

¹⁵ fɔ kɔnt di Livayt dɛn bay dɛn famili. I se, Mozis fɔ kɔnt ɔl di bɔypikin dɛn wans dɛn dɔn wan mɔnt.

¹⁶ So Mozis insɛf kɔnt dɛn lɛkɛ aw nɔmɔ PAPA GƆD bin tɛl am.

¹⁷ Dis na Livay in yon bɔypikin dɛn nem: Gashɔn, Koath ɛn Mɛrari.

¹⁸ Di wan dɛn we kɔmɔt na Gashɔn in famili na Libnay ɛn Shimɛay.

¹⁹ Di wan dɛn we kɔmɔt na Koath in famili na Amram, Iza, Ɛbrɔn ɛn Uziɛl.

²⁰ Di wan dɛn we kɔmɔt na Mɛrari in famili na Mali ɛn Mushay. Na di Livayt fambul dɛn dis bay dɛn famili.

²¹ Di Libnayt ɛn di Shimɛayt dɛn ɔl kɔmɔt na Gashɔn in famili; so na dɛn na di Gashɔnayt.

²² Di bɔypikin dɛn we dɛn kɔnt we bin dɔn wan mɔnt na 7,500.

²³ Dɛn fɔ kamp na di Wɛstɛn Pat, biɛn di Tɛnt.

²⁴ Di lida fɔ di Gashɔnayt dɛn na Ɛlayasaf we na Laɛl in bɔypikin.

²⁵ Na di Tɛnt usay dɛn kin mit PAPA GƆD, na di Gashɔnayt dɛn bin fɔ di sibɔt di Tɛnt ɛn di klos we de insay wit di wan we de na do, ɛn di doklos na di Tɛnt in domɔt usay dɛn kin mit PAPA GƆD.

²⁶ Dɛn fɔ tek kia ɔf ɔl di klos we de rawnd na di kɔmpawnd, di klos we de na di kɔmpawnd in domɔt bay di say we di tɛnt ɛn di ɔlta de, di rop dɛn ɛn ɔl wetin dɛn fɔ yuz fɔ ɛŋ dɛn.

²⁷ Di Amramayt, di Izaayt, di Ɛbrɔnayt ɛn di Uziɛlayt dɛn ɔl kɔmɔt na Koath in famili; so na dɛn na di Koathayt.

²⁸ Na 8,600 bɔypikin bin de we bin dɔn wan mɔnt. Na di Koathayt dɛn bin rɛspɔnsibul fɔ di Tɛnt usay dɛn kin mit PAPA GƆD.

²⁹ Na di sawtɛn pat na di tɛnt, na de dɛn fɔ kamp.

³⁰ Di lida fɔ di Koathayt dɛn na Ɛlizafan we na Uziɛl in bɔypikin.

³¹ Na dɛn fɔ mek shɔ se di ak, di tebul, di stand dɛn fɔ put lamp, di ɔlta, di ɔda tin dɛn we dɛn gɛt fɔ yuz insay, di klos fɔ ɛŋ, ɛn ɔl ɔda tin rɛdi fɔ yuz na di Tɛnt.

³² Di bigman fɔ di Livayt dɛn na Ɛlieza we na Erɔn in bɔypikin. Nain dɛn pik fɔ de inchaj ɔf di Tɛnt.

³³ Di Malayt ɛn di Mushayt dɛn kɔmɔt na Mɛrari in famili.

³⁴ Di bɔypikin dɛn we dɛn kɔnt, we bin dɔn wan mɔnt na 6,200.

³⁵ Di lida fɔ di Mɛrarayt dɛn na Zuriɛl we na Abiail in bɔypikin; ɛn dɛn bin fɔ kamp na di nɔtan pat na di tɛnt.

³⁶ Dɛn bin pik di Mɛrarayt dɛn fɔ de sibɔt di frem dɛn na di tɛnt, di krɔsba, di post dɛn wit dɛn bes dɛn, wit ɔl di ɔda tin dɛn fɔ yuz wit dɛn tin dɛn ya,

³⁷ plɔs di post dɛn we de rawnd di kɔmpawnd ɛn dɛn bes, di pɛg dɛn fɔ di tɛnt ɛn di rop dɛn.

³⁸ Mozis, Erɔn ɛn in bɔypikin dɛn fɔ de na di Istɛn pat na di tɛnt, bay usay di san de grap, bifo di Tɛnt usay dɛn kin mit PAPA GƆD. Na dɛn nɔmɔ rɛspɔnsibul fɔ tek kia ɔf di Tɛnt fɔseka di Izrɛlayt dɛn. Ɛni ɔda pɔsin we go nia de go day.

³⁹ Ɔl ɛn ɔl, di Livayt dɛn we Mozis ɛn Erɔn kɔnt we PAPA GƆD se dɛn fɔ du, na 22,000. Dɛn bin de bay di famili we dɛn kɔmɔt ɛn ɔl udat bin dɔn ol wan mɔnt bin de pan di kɔnt.

Na Di Livayt Dɛn Tek Di Fɔs Bɔy Pikin Dɛn Ples

⁴⁰ PAPA GƆD tɛl Mozis fɔ kɔnt ɔl di Izrɛlayt man dɛn we na dɛn fɔs dɛn bɔn ɛn rayt dɛn nem dɔŋ wans dɛn dɔn wan mɔnt.

⁴¹ I se fɔ kip ɔl di Livayt dɛn fɔ am fɔ tek di man dɛn we fɔs bɔn dɛn ples wit dɛn animal dɛn we go tek di animal dɛn we bɔn fɔs dɛn ples bikɔs nain we na PAPA GƆD gɛt dɛn.

⁴² So Mozis kɔnt ɔl di Izrɛlayt we bɔn fɔs lɛkɛ aw PAPA GƆD bin se.

⁴³ Ɔl ɛn ɔl, di man dɛn we bin dɔn wan mɔnt ɛn we bin bɔn fɔs, we i rayt dɛn nem dɔŋ na bin 22,273.

⁴⁴ PAPA GƆD tɛl Mozis bak se

⁴⁵ i fɔ kip di Livayt dɛn ɛn dɛn animal dɛn fɔ am. I se, na dɛn fɔ tek ɔl di man ɛn animal we dɛn bɔn fɔs dɛn ples as nain gɛt dɛn. I se, nain na PAPA GƆD.

⁴⁶ Di nɔmba we dɛn kɔnt 273 pas ɔmɔs Livayt de so dɛn kin pe sɔntin fɔ ɛkschenj dɛn.

⁴⁷ Fɔ ich wan, dɛn fɔ pe tu awns silva,

⁴⁸ Mozis fɔ gi dis mɔni to Erɔn ɛn in bɔypikin dɛn.

⁴⁹ So Mozis gɛda di mɔni we dɛn pe, fɔ bay di balans Izrɛlayt we pas di Livayt dɛn.

⁵⁰ Pan di mɔni we i gɛda, na silva we we tati-fayv pawns

⁵¹ Mozis bin gi di mɔni we i gɛda to Erɔn ɛn in bɔypikin dɛn lɛkɛ aw PAPA GƆD bin se.